བོད་མི་མང་དབུས་གཙང་སྤྱི་འཐུས་བསམ་གཏན་ཆོས་སྒྲོན་ལགས་ཀྱིས་སྤྱི་འཐུས་དམ་འབུལ་ཞུས་པ།

ཉེ་ལམ་བོད་མི་མང་དབུས་གཙང་སྤྱི་འཐུས་ཟླ་བ་ཕུན་སྐྱིད་ལགས་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་གཞན་དུ་བདམས་ཐོན་བྱུང་སྟེ། ཟླ་ ༤ ཚེས་ ༧ ཉིན་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་ཆེ་བ་ཡེ་ཤེས་དབང་མོ་ལགས་ཀྱི་མདུན་དམ་འབུལ་ཞུས་པར་བརྟེན། སྒུག་ཐོའི་བང་རིམ་ལྟར་ཟླ་ ༤ པའི་ཚེས་ ༡༦ ཉིན་བོད་མི་མང་དབུས་གཙང་སྤྱི་འཐུས་བསམ་གཏན་ཆོས་སྒྲོན་ལགས་ཀྱིས། བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་ལགས་ཀྱི་མདུན་ནས་དམ་བཅའ་ཕུལ་གནང་སོང་།

བོད་མི་མང་སྤྱི་འཐུས་བསམ་གཏན་ཆོས་སྒྲོན་ལགས་ཀྱིས་སྤྱི་འཐུས་ཀྱི་དམ་འབུལ་གྲུབ་སྟེ། སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་ལགས་དང་། ཚོགས་གཞོན་སྒྲོལ་མ་ཚེ་རིང་ལགས། སྤྱི་འཐུས་རྒྱུན་ལས་རྣམ་པ་བཅས་ནས་རྟེན་འབྱུང་མཇལ་དར་དང་གསོལ་ཇ་འབྲས་སིལ་སོགས་གནང་རྗེས། སྤྱི་འཐུས་བསམ་གཏན་ཆོས་སྒྲོན་ལགས་ཀྱིས། ནམ་རྒྱུན་སོ་སོའི་ལས་ཀ་གང་ཞིག་བྱས་ཀྱང་བོད་སྤྱི་པའི་དོན་དུ་བསམ་པ་རྣམ་དག་གིས་ཞབས་ཞུ་སྒྲུབ་ཀྱི་ཡོད་པས། སླད་ཕྱིན་གང་ཐུབ་ཅི་ཐུབ་བྱ་འདུན་ཡོད་ཅིང་། བོད་པའི་སྤྱི་ཚོགས་ཁྲོད་ཀྱི་དཀའ་ངལ་ཅི་རིགས་ཐད་ཕན་ཐོགས་སྒྲུབ་ཆེད་གང་ཐུབ་ཅི་ཐུབ་ཀྱིས་འབད་བརྩོན་གནང་རྒྱུ་ཡིན་ཞེས་འདི་ག་རླུང་འཕྲིན་ཁང་ལ་འགྲེལ་བརྗོད་གནང་བྱུང་།

ཕྱོགས་མཚུངས་སྤྱི་ཁྱབ་རྩིས་ཞིབ་པ་བཀྲ་ཤིས་སྟོབས་རྒྱལ་ལགས་ནས་ཀྱང་གཞི་རྩའི་སྤྱི་ཟླ་༤པའི་ཚེས་༧ཉིན་གྱི་བཅའ་ཁྲིམས་ཀྱི་དགོངས་དོན་བཞིན། ཆེས་མཐོའི་ཁྲིམས་ཞིབ་པ་ཆེ་བའི་མདུན་དམ་བཅའ་བླངས་ཡོད་ནའང་། དེ་རིང་ཟླ་ ༤ ཚེས་ ༡༦ ཉིན་ཁྲིམས་ཞིབ་པ་ཆེ་བ་ཡེ་ཤེས་དབང་མོ་ལགས་ཀྱི་མདུན་ནས་གསང་རྒྱའི་དམ་འབུལ་ཞུས་ཡོད་པ་རེད།

གསར་འགོད་པ། བློ་བྷེ།

རྩོམ་སྒྲིག་པ། བདེ་སྐྱིད་ཀུན་སྒྲོལ།

དྲྭ་ཐོག་སྤེལ་མཁན། བདེ་སྐྱིད་ཀུན་སྒྲོལ།