༸གོང་ས་མཆོག་ལ་ནོ་བེལ་གཟེངས་རྟགས་ཕུལ་བའི་དུས་དྲན།

༄༅༎ཨོ་སེ་ཀྲེ་ལི་ཡའི་ནང་༧གོང་ས་༧སྐྱབས་མགོན་ཆེན་པོ་མཆོག་ལ་ནོ་བེལ་ཞི་བདེའི་གཟེངས་རྟགས་འབུལ་བཞེས་གནང་བའི་དུས་དྲན་སྲུང་བརྩིའི་ཐོག་ཆིབས་བསྒྱུར་གནང་ཡོད་འདུག

བོད་ཀྱི་བླ་ན་མེད་པའི་དབུ་འཁྲིད་༧སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ཨོ་སེ་ཀྲེ་ལི་ཡའི་ནང་གི་མཛད་འཆར་ཉིན་མཐའ་མ་དེར་དེ་རིང་བོད་དོན་རྒྱབ་སྐྱོར་བ་བརྒྱ་སྐོར་ཞིག་གི་འདུ་འཛོམས་ཐོག་ནོ་བེལ་ཞི་བདེའི་གཟེངས་རྟགས་འབུལ་བཞེས་གནང་ནས་ལོ་ངོ་ཉི་ཤུ་འཁོར་བའི་མཛད་སྒོར་༧གོང་ས་མཆོག་མཉམ་ཞུགས་གནང་ཡོད་འདུག

སྐབས་དེར་༧གོང་ས་༧སྐྱབས་མགོན་ཆེན་པོ་མཆོག་གིས། ཨོ་སེ་ཀྲེ་ལི་ཡའི་ནང་གི་ས་སྐྱེས་རྡོ་སྐྱེས་སམ་གདོད་མའི་མི་རིགས་ཚོར་རང་གི་སྐད་ཡིག་དང་། རིག་གཞུང་མི་ཉམ་གོང་འཕེལ་གཏོང་ཐབས་བྱེད་རྒྱུ་གལ་འགངས་ཆེན་པོ་ཡིན་པ་སྨོས་མེད་ཐོག་གཙོ་བོ་ཤེས་ཡོན་ཡར་རྒྱས་གཏོང་རྒྱུ་ཧ་ཅང་གལ་ཆེན་པོ་ཡིན་ལུགས་བཀའ་གནང་འདུག། དེ་དང་ཕྱོགས་མཚུངས་༧གོང་ས་༧སྐྱབས་མགོན་ཆེན་པོ་མཆོག་གིས། འཛམ་གླིང་ནང་དབུལ་ཕྱུག་གི་ཁྱད་པར་ཧ་ཅང་ཆེན་པོ་ཡོད་པ་དེ་མེད་པ་བཟོ་ཐབས་སུ་ནུབ་ཕྱོགས་རྒྱལ་ཁབ་ཚོས་མཐུན་འགྱུར་བྱེད་ཀྱི་ཡོད་པ་དེ་ཡག་པོ་ཞེ་དྲག་རེད། ཡིན་ནའང་དེ་དག་གི་འགོག་རྐྱེན་གཙོ་བོ་དེ་ནི་ཤེས་ཡོན་གྱི་མི་ལྡེང་པ་དེས་ཡིན་པ་རེད་ཅེས་གསུངས་ནས་གང་ལྟར་ཨཕ་རི་ཀ་དང་ཨོ་སེ་ཀྲེ་ལི་ཡའི་ནང་གི་གདོད་མའི་མི་རིགས་སོགས་ཀྱི་དཀའ་ངལ་ཐོག་ཐུགས་འཚབ་གནང་ཡོད་པ་རེད།

༧སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ཟླ་བ་འདིའི་ཚེས་གཅིག་ཉིན་ཐོག་མར་ཨོ་སེ་ཀྲེ་ལི་ཡའི་གྲོང་ཁྱེར་སིདྲ་ནི་དང་། དེ་ནས་རིམ་པས་ནིའུ་ཛ་ལེན་དྲེ། དེའི་རྗེས་སུ་ཨོ་སེ་ཀྲེ་ལི་ཡའི་གྲོང་ཁྱེར་མེལ་སྦོན་ནང་ཆིབས་བསྒྱུར་གྱིས་མཛད་འཕྲིན་ཁག་ལེགས་པར་གྲུབ་གནང་ཏེ་སང་ཉིན་རྒྱ་གར་རུ་ཆིབས་ཞལ་སྒྱུར་གནང་གི་ཡོད་པ་རེད།