བལ་བོད་ས་མཚམས་སུ་བོད་མི་ལས་འགུལ་བ་འཛིན་བཟུང༌།

༄༅༎བལ་ཡུལ་ནང་བོད་མི་ཁག་ཅིག་གིས་བོད་རང་བཙན་གྱིས་ལས་འགུལ་སྤེལ་རྒྱུའི་ཆེད་དུ་བོད་ནང་ཞི་བའི་གོམ་བགྲོད་བྱ་རྒྱུའི་འབད་བརྩོན་བྱེད་པའི་སྐབས་དེར་བལ་པོའི་ཉེན་རྟོག་པས་བུད་མེད་བརྒྱད་གཙོས་པའི་བོད་མི་༣༥བོད་ཀྱི་ས་མཚམས་ནས་འཛིན་བཟུང་བྱས་ཡོད་པ་རེད།

བོད་མི་དེ་རྣམས་ནས་ཁག་ཅིག་གིས་གསུང་ན་ཁོང་ཚོར་བལ་ཡུལ་ནང་གནས་སྡོད་ཆོག་པའི་ཆབ་འབངས་མི་སེར་ལག་འཁྱེར་ཡོད་པ་དང་ངོ་སྦྱོར་ཡོད་མཁན་ཡིན་པ་དང་དེ་རིང་སྔ་དྲོ་ཚོུད་བཞི་པའི་ཐོག་བལ་ཡུལ་རྒྱལ་ས་ནས་འགྲུལ་སྐྱེལ་མོ་ཊ་ཞིག་གླས་ཏེ་བོད་ཀྱི་ས་མཚམས་ཕྱོགས་སུ་ཐོན་བསྐྱོད་བྱས་ཏེ་བལ་བོད་ས་མཚམས་འགྲམ་འགག་སྒོར་འབྱོར་བའི་སྐབས་བལ་པོའི་ཉེན་རྟོག་པས་བཀག་འགོག་བྱས་ཡོད་པའི་གནས་ཚུལ་འགྲེལ་བརྗོད་བྱས་ཡོད་ཅིང་ད་རེས་ཁོང་ཚོས་བོད་དུ་བསྐྱོད་རྒྱུའི་ཞི་བའི་ལས་འགུལ་གཙོ་བོ་དེ་ནི་བོད་ནང་ཞི་བདེ་མེད་པ་དང་རྒྱ་ནག་གཞུང་གིས་མུ་མཐུད་བོད་མི་ཚོར་ཉེས་རྡུང་དང་མནར་གཅོད་གཏོང་བ་མ་ཟད་དམར་གསོད་གཏོང་བའི་བྱ་སྤྱོད་ལ་ང་ཚོས་བོད་ཀྱི་ས་ཐོག་ཏུ་བསྐྱོད་དེ་ཞི་བའི་ཐོག་ནས་ངོ་རྒོལ་ལས་འགུལ་སྤེལ་རྒྱུའི་འཆར་གཞི་ཡོད་ཀྱང་བལ་པོའི་ཉེན་རྟོག་པས་འཛིན་བཟུང་བྱས་པའི་འགྲེལ་བརྗོད་བྱས་ཡོད་པ་རེད། དེ་མིན་གྱི་བོད་མི་གཞན་ཚོས་ལག་ཏུ་འཁྱེར་བའི་རྒྱ་ནག་གཞུང་ལ་ངོ་རྒོལ་གྱི་བརྗོད་ཚིག་བཀོད་པའི་ཡིག་ཆེན་གནམ་ལ་འཕྱར་ཏེ་བོད་རང་བཙན་ཡིན།རྒྱ་ནག་གཞུང་གིས་བོད་ནང་བཙན་གནོན་གཏོང་རྒྱུ་མཚམས་འཇོག་བྱེད་དགོས་ཞེས་པའི་འབོད་ཚིག་སྒྲོག་པ་དང་འགྲིམས་འགྲུལ་གྱི་འགྲོ་ལམ་བཀག་ཏེ་ཁོང་ཚོའི་རོགས་པ་འཛིན་བཟུང་བྱས་པ་རྣམས་འཕྲལ་དུ་གློད་འགྲོལ་གཏོང་དགོས་པའི་ལས་འགུལ་སྤེལ་བཞིན་ཡོད་པ་རེད་འདུག བལ་པོའི་ས་མཚམས་ཉེན་རྟོག་དཔོན་རིགས་ཨ་བ་ཡ་ཇོ་ཤི་ཡིས་ང་ཚོར་ཉེན་རྟོག་པའི་ལས་ཁུངས་ཨ་མ་ནས་གནས་ཚུལ་མ་འབྱོར་བ་ཏུ་བོད་མི་དེ་རྣམས་འཕྲལ་སེལ་ཉེན་རྟོག་པའི་དོ་དམ་ཁང་དུ་བཀག་ཉར་བྱེད་རྒྱུ་ཡིན་ཞེས་བཤད་ཡོད་པ་རེད།