བལ་ཡུལ་གྱི་སྲིད་བློན་དགོངས་ཞུ་གནང་བའི་གནས་ཚུལ།

༄༅༎བལ་ཡུལ་གྱི་སྲིད་བློན་དགོངས་ཞུ་གནང་བ་དེས་སླར་ཡང་ཡུལ་ནང་དཀའ་ངལ་ཆེན་པོ་ཆགས་སྲིད་པའི་ཚོད་རྩིས་བྱེད་ཀྱི་ཡོད་འདུག

ཁ་ས་རེས་གཟའ་ཉི་མའི་ཉིན་བལ་ཡུལ་གྱི་སྲིད་བློན་ཇ་ལ་ནའཐ་ཁ་ནལ་མཆོག་ནས་ཞི་འགྲིགས་ཡོང་ཐབས་སུ་མནའ་འབྲེལ་ཚོགས་པའི་དབུ་འཁྲིད་ཚོ་དང་གྲོས་མོལ་ལམ་ལྷོང་མ་བྱུང་སྟབས་སྲིད་འཛིན་ལ་དགོངས་ཞུ་ཕུལ་ཡོད་ལུགས་ཁོང་གི་དྲིལ་བསྒྲགས་སློབ་སྟོན་པ་སྐུ་ཞབས་སུར་ཡ་ ཐ་པས་འགྲེལ་བརྗོད་བྱེད་ཡོད་འདུག དེ་ཡང་ཁོང་གིས། སྲིད་བློན་མཆོག་གི་ཞི་འགྲིགས་ཀྱི་ལས་དོན་མུ་མཐུད་ནས་སྤེལ་ཐུབ་ཐབས་དང་། རྩ་ཁྲིམས་ཟིན་བྲིས་བཟོ་ཐབས་སུ་དམིགས་ནས་མཐའ་མའི་བར་གྲོས་མོལ་གནང་ཡང་གྲོས་མཐུན་མ་བྱུང་སྟབས་དགོངས་ཞུ་གནང་དགོས་བྱུང་ཡོད་ལུགས་གསུངས་འདུག ཁོང་གི་སྣེ་འཁྲིད་པའི་མནའ་འབྲེལ་གཞུང་གི་ནང་། ཚོགས་པ་གསུམ་ཡོད་པའི་ནང་། མའོའི་ཚོགས་པ་ཡང་ཡོད་པ་རེད། བལ་ཡུལ་ནང་མནའ་འབྲེལ་གཞུང་དང་ལྷག་པར་དུ་གྲོས་ཚོགས་ནས་རྩ་ཁྲིམས་གཏན་འབེབས་བྱེད་དགོས་ཀྱི་ཡོད་ཀྱང་དུས་ཚོད་རྒྱས་བཅད་ནས་ཐེངས་གཉིས་ཙམ་གྲོས་མཐུན་མ་བྱུང་བའི་རྐྱེན་གྱིས་ལམ་ལྷོང་བྱུང་མེད་པ་རེད། ད་ཆ་སླར་ཡང་སྲིད་བློན་མེད་པའི་གནས་སྟངས་སུ་གྱུར་ནས་ཆབ་སྲིད་ཚོགས་པ་ཚོའི་དབར་མོས་མཐུན་ཡག་པོ་ཞིག་མ་བྱུང་བ་ཡིན་ན་བལ་ཡུལ་རྒྱལ་ཁབ་འདི་བཞིན་སླར་ཡང་གཞུང་གཏན་པོ་མེད་པ་དང་། རྩ་ཁྲིམས་ལ་འགྱུར་བཅོས་གཏོང་མ་ཐུབ་པ་། དཔལ་འབྱོར་དང་ཁྲིམས་ཀྱི་ལམ་ལུགས་སོགས་གང་ས་ཅིའི་ཐད་ནས་དོ་ཕོག་ཐེབས་ནས་གཙོ་བོ་མང་ཚོགས་ལ་གྱོང་གུན་ཆེན་པོ་ཐེབས་རྒྱུའི་ཉེན་ཁ་ཡོད་པའི་དཔྱད་ཞིབ་བྱེད་ཀྱི་ཡོད་འདུག