བོད་རིགས་ན་གཞོན་འདུ་འཛོམས་ཐེངས་དང་པོ་རྡ་རམ་ས་ལར་སྐོང་འཚོགས་གནང་བཞིན་འདུག

བོད་རིགས་ན་གཞོན་འདུ་འཛོམས་ཞིག་རྒྱ་གར་ནང་གི་ཨ་མི་རི་ཀའི་རྒྱལ་ཡོངས་མང་གཙོ་ལྟེ་གནས་ཁང་གིས་གོ་སྒྲིག་གནང་སྟེ། རྡ་རམ་ས་ལར་སྤྱི་ཟླ་༦པའི་ཚེས་༣༠ནས་སྤྱི་ཟླ་༧པའི་ཚེས་༦བར་གནང་བཞིན་པའི་དབུ་འབྱེད་མཛད་སྒོར་སྤྱི་ཚེས་༡ཉིན་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་ལགས་ཆེད་ཕེབས་ཀྱིས། བོད་རིགས་གཞོན་སྐྱེས་ཚོས་ཕྱོགས་ཡོངས་ཀྱི་གནས་ཚུལ་ཅི་མང་ལ་ལོ་ཆུང་གི་སྐབས་ནས་རྒྱུས་ལོན་གནང་ཐུབ་ན། སོ་སོའི་མི་ཚེ་སྐྱེལ་བ་དང་བོད་ཀྱི་རྩ་དོན་ལའང་ཕན་ཐོགས་འབྱུང་གི་རེད་ཅེས་གསལ་སྟོན་གནང་སོང་།
བོད་རིགས་ན་གཞོན་གྱི་འདུ་འཛོམས་དེར་བོད་མིའི་སྒྲིག་འཛུགས་དང་གཞོན་སྐྱེས་ཚོའི་བར་འབྲེལ་ལམ་ཇེ་ཉེར་གཏོང་བའི་ཆེད། འབྲེལ་ཡོད་ཁག་གིས་བོད་མིའི་སྒྲིག་འཛུགས་ཀྱི་སྲིད་བྱུས་གཏན་འབེབས་དང་ལག་བསྟར་གྱི་ཕན་འབྲས་སོགས་ངོ་སྤྲོད་གནང་རྒྱུ་མ་ཟད། བོད་མིའི་ངོ་བོ་དང་གཞོན་སྐྱེས་ཚོས་མང་གཙོའི་སྤྱི་ཚོགས་སུ་ཆ་ཤས་ལེན་སྟངས། གཞོན་སྐྱེས་ཚོའི་དབར་འབྲེལ་མཐུད་མཉམ་རུབ་སོགས་ཀྱི་སྐོར་ཀྱང་ཟབ་སྦྱོང་ཕུལ་གྱི་ཡོད་པ། རྡ་རམ་ས་ལ་ས་གནས་ཀྱི་རྒྱལ་ཡོངས་མང་གཙོ་ལྟེ་གནས་ཀྱི་ལས་འཆར་འགན་འཛིན་ཀརྨ་ཕུན་ཚོགས་ལགས་ནས་འགྲེལ་བརྗོད་གནང་གི་འདུག

ཚོགས་ཞུགས་པ་ལྡི་ལི་མཐོ་སློབ་ནས་ཡིན་པ་བསྟན་འཛིན་ཡར་འཕེལ་ལགས་ནས། བོད་རིགས་ན་གཞོན་གྱི་འདུ་འཛོམས་འདི་ཐེངས་མ་དང་པོ་དང་། གཞོན་སྐྱེས་ཚོར་འདུ་འཛོམས་འདིས་དམིགས་བསལ་ཆབ་སྲིད་ཀྱི་གོ་རྟོགས་དང་བོད་མིའི་སྒྲིག་འཛུགས་ཀྱི་སྲིད་བྱུས་སོགས་ཤེས་རྒྱུར་གལ་འགངས་ཆེན་པོ་འདུག་ཅེས་འགྲེལ་བརྗོད་གནང་བྱུང་།
ཡང་ལ་དྭགས་ས་གནས་ཀྱི་ཤ་ཚ་ཚོགས་པའི་ཟླ་སྒྲོན་ལགས་ནས་ཀྱང་། བོད་མིའི་སྒྲིག་འཛུགས་དང་གཞོན་སྐྱེས་ཀྱི་བར་སྟོང་ཆ་གང་མཚམས་ཤིག་ཡོད་པར་མཐོང་གི་ཡོད་པས། འདུ་འཛོམས་འདི་བརྒྱུད་ནས་བོད་མིའི་སྒྲིག་འཛུགས་དང་གཞོན་སྐྱེས་ཀྱི་བར་འབྲེལ་མཐུད་ཀྱི་ཟམ་པ་ལྟ་བུ་ཞིག་ཆགས་ཐུབ་པའི་རེ་ཡོད་པ་འགྲེལ་བརྗོད་གནང་བྱུང་།
བོད་རིགས་ན་གཞོན་གྱི་འདུ་འཛོམས་འདིར་རྒྱ་གར་དང་བལ་བོའི་ནང་གི་ཚོགས་པ་ཁག་༢༤ནས་བོད་རིགས་གཞོན་སྐྱེས་༣༠ལྷག་ཆེད་དུ་བཅར་ཡོད་པ་དང་། ད་རེའི་འདུ་འཛོམས་ཐོག་བོད་མིའི་སྒྲིག་འཛུགས་ཀྱི་བཀའ་བློན་ཟུར་པ་དང་དྲུང་ཆེ། སྤྱི་འཐུས་བཅས་གནད་ཡོད་མི་སྣ་ཁག་ཕེབས་ནས་བོད་མིའི་སྒྲིག་འཛུགས་ཀྱི་སྒྲོམ་གཞི་དང་སྲིད་བྱུས་སྣ་ཚོགས། མང་གཙོའི་ལམ་ལུགས་དང་གཞོན་སྐྱེས་ཀྱི་དཀའ་ངལ་སྣ་མང་། བོད་མི་རིགས་ཀྱི་ངོ་བོ་ངོས་འཛིན་བཅས་ཀྱི་ཐོག་གོ་བསྡུར་གནང་གི་ཡོད་པ་རེད།།

གསར་འགོད་པ། བློ་བྷེ།
རྩོམ་སྒྲིག་པ། བཀྲ་ཤིས་དབང་ཕྱུག
དྲྭ་ཐོག་རྩོམ་སྒྲིག་པ། དཔལ་ལྡན་རྒྱལ།
དྲྭ་ཐོག་སྤེལ་མཁན། ཀླུ་འབུམ།