ལྕམ་ནེན་སི་ པེ་ལོ་སི་མཆོག་དུས་ཡུན་རིང་པོར་བོད་དོན་རྒྱབ་སྐྱོར་གནང་མཁན་གྱི་མི་སྣ་གལ་ཆེ་ཞིག་ཡིན།

ཨ་རིའི་གྲོས་ཚོགས་ཀྱི་ཚོགས་གཙོ་ཟུར་པ་ལྕམ་ནན་སི་ པེ་ལོ་སི་མཆོག་ནི་ཨ་རིའི་ཆབ་སྲིད་ནང་དུས་ཡུན་རིང་པོར་མི་སྣ་གལ་ཆེན་ཞིག་ཏུ་གྱུར་ཡོད་པ་དང་། ཁོང་གིས་༧གོང་ས་༧སྐྱབས་མགོན་ཆེན་པོ་མཆོག་དང་བོད་མི་ཚོ་དང་མཉམ་གྱི་འབྲེལ་ལམ་དེ་བཞིན་ཁོ་མོས་དྲང་བདེན་དང་རང་དབང་ལ་ལྷག་བསམ་རྣམ་དག་གིས་རྒྱབ་སྐྱོར་གནང་བའི་འབད་རྩོན་གྱི་དཔང་རྟགས་ཤིག་ཡིན་པ་མ་ཟད། རྒྱ་ནག་གིས་བོད་མི་གཙོས་པའི་རྒྱ་ནག་མི་དམངས་ཀྱི་འགྲོ་བ་མིའི་ཐོབ་ཐང་ལ་བཙན་གནོན་བྱེད་བཞིན་པར་སྐྱོན་བརྗོད་གནང་མཁན་གྱི་མཚོན་རྟགས་ཤིག་ཀྱང་ཡིན་པའི་སྐོར་༧སྐུའི་གཅེན་པོ་རྒྱལ་ལོ་དོན་གྲུབ་ལགས་ཀྱི་སྲས་མཁས་གྲུབ་དོན་གྲུབ་ལགས་ཀྱིས་ཕྱི་ཟླ་ ༨ ཚེས་ ༡༨ ཉིན་སྤེལ་བའི་ཆེད་རྩོམ་ནང་བཀོད་འདུག

ཆེད་རྩོམ་དེའི་ནང་མུ་མཐུད་བཀོད་དོན་དུ། ཨ་རིའི་གྲོས་ཚོགས་ཀྱི་ཚོགས་གཙོ་ཟུར་པ་ལྕམ་ནན་སི་པེ་ལོ་སི་མཆོག་གིས་༧གོང་ས་༧སྐྱབས་མགོན་ཆེན་པོ་མཆོག་དང་། དེ་བཞིན་བོད་དོན་ཐད་ཀྱི་རྒྱབ་སྐྱོར་གནང་པའི་འབྲེལ་བ་དེ་ཡང་ལོ་ངོ་བཅུ་ཕྲག་ཁ་ཤས་གོང་ནས་བྱུང་ཡོད་པ་དང་། ཕྱི་ལོ་ ༡༩༨༩ ལོར་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་ནོ་སྦེལ་ཞི་བདེའི་གཟེངས་རྟགས་དགྱེས་བཞེས་མཛད་པའི་རྗེས་ཨ་རིའི་ཆབ་སྲིད་པ་མི་སྣའི་ཁྲོད་ནས་ལྩམ་པེ་ལོ་སི་མཆོག་ནི་༧གོང་ས་༧སྐྱབས་མགོན་ཆེན་པོ་མཆོག་དང་མཇལ་ཕྲད་ཞུ་མཁན་ཐོག་མའི་གྲས་ཤིག་ཡིན་ཞིང་། སྐབས་དེ་དུས་ཀྱི་མཇལ་འཛོམས་ནི་ཡུན་རིང་གི་མཛའ་གྲོགས་དང་བོད་མིའི་འགྲོ་བ་མིའི་ཐོབ་ཐང་གི་འཐབ་རྩོད་ཀྱི་འགོ་འཛུགས་ས་ཞིག་ཀྱང་ཆགས་ཡོད་པ་རེད་ཅེས་དང་། ལྕམ་པེ་ལོ་སི་མཆོག་གིས་བོད་དོན་རྒྱབ་སྐྱོར་གནང་པའི་དུས་སྐབས་གཙོ་བོ་གཅིག་ནི་ཕྱི་ལོ་ ༢༠༠༨ ལོར་པེ་ཅིང་ཨོ་ལིམ་པིཀསི་རྩེད་འགྲན་གྱི་སྐབས་ཡིན། ཕྱི་འབྲེལ་གྱི་ཐོག་ནས་འབྲེལ་ལམ་སྡུག་པོར་གྱུར་པའི་གནད་དོན་བྱུང་སྲིད་པའི་གནས་སྟངས་ལ་མ་ལྟོས་པར་ཁོང་མོས་གྲོས་ཚོགས་ཀྱི་སྐུ་ཚབ་ཚོགས་པ་ཞིག་སྣེ་ཁྲིད་དེ་བཙན་བྱོལ་བོད་གཞུང་གི་བསྟི་གནས་དྷ་རམ་ས་ལར་ཕེབས་ནས་༧གོང་ས་༧སྐྱབས་མགོན་ཆེན་པོ་མཆོག་དང་མཇལ་འཕྲད་ཞུས་ཏེ་བོད་མི་མང་ལ་གདུང་སེམས་མཉམ་སྐྱེད་ཀྱི་རྣམ་འགྱུར་བཏོན་གནང་ཡོད་ཅིང་། ལྕམ་པེ་ལོ་སི་མཆོག་གིས་རྒྱུན་ཆད་མེད་པར་ཆབ་སྲིད་ཀྱི་སྟེགས་བུའི་ཐོག་ནས་རྒྱ་ནག་གི་བཙན་གནོན་སྲིད་བྱུས་ལ་སྐྱོན་བརྗོད་དང་བོད་མི་རིགས་ཀྱི་ཐོབ་ཐང་རྩོད་ལེན་ལ་རྒྱབ་སྐྱོར་གནང་དང་གནང་མུས་ཡིན་པ་རེད་ཅེས་བཀོད་འདུག

ཨ་རིའི་གྲོས་ཚོགས་ཀྱི་ཚོགས་གཙོ་ཟུར་པ་ལྕམ་པེ་ལོ་སི་མཆོག་གིས་ཨ་རིའི་གྲོས་ཚོགས་འོག་མའི་ཚོགས་གཙོའི་འགན་འཁུར་མཁན་བུད་མེད་ཐོག་མ་དེ་ཡིན་པའི་ཆ་ནས་བུད་མེད་ཀྱི་ཆབ་སྲིད་ནང་ལམ་སྟོན་པ་ཞིག་ཀྱང་ཆགས་ཡོད་པ་རེད། ལྕམ་པེ་ལོ་སི་མཆོག་གིས་རྒྱ་ནག་ཐོག་འཛིན་པའི་བཞེངས་ཕྱོགས་དེ་དམིགས་བསལ་གྱི་དོ་སྣང་བྱེད་འོས་པ་ཞིག་ཏུ་གྱུར་ཡོད་ཅིང་། ཁོང་གིས་རྒྱ་ནག་གི་འགྲོ་བ་མིའི་ཐོབ་ཐང་གི་གནས་བབ་དང་། རྒྱུན་ཆད་མེད་པར་རྒྱ་ནག་ལ་ལངས་ཕྱོགས་དམ་པོར་འཛིན་དགོས་པའི་འབོད་སྐུལ་བྱས་ཏེ་འགྲོ་བ་མིའི་ཐོབ་ཐང་དང་མང་གཙོའི་རིན་ཐང་ལ་སྐུལ་འདེད་གཏོང་བཞིན་ཡོད་པའི་ཁར། འགྲོ་བ་མིའི་ཐོབ་ཐང་དང་དྲང་བདེན་གྱི་ཁས་ལེན་རྒྱུན་འཁྱོངས་བྱེད་པའི་སྐབས་རྒྱལ་སྤྱིའི་ཆབ་སྲིད་ཀྱི་མགོ་རྙོག་ཅན་གྱི་གནས་སྟངས་ལ་འགྱུར་ལྡོག་གཏོང་ཐུབ་མཁན་གྱི་འཛམ་གླིང་ནང་གི་གལ་ཆེའི་ཆབ་སྲིད་མི་སྣ་ཞིག་ཏུ་འགྱུར་ཡོད་པའི་སྐོར་སོགས་མཁས་གྲུབ་དོན་གྲུབ་ལགས་ཀྱིས་ཆེད་རྩོམ་དེའི་ནང་མུ་མཐུད་བཀོད་འདུག ཡང་མཁས་གྲུབ་དོན་གྲུབ་ལགས་ཀྱིས་ Sunday guardain ཞེས་པའི་གསར་ལམ་ཐོག་དཔྱད་རྩོམ་གཞན་ཞིག་སྤེལ་ཡོད་པའི་ནང་ཨ་རིའི་སྲིད་འཛིན་འཇོ་བྷཡེཌན་མཆོག་གིས་༧གོང་ས་༧སྐྱབས་མགོན་མཆོག་ལ་དེ་སྔོན་ཁོང་གིས་ཁས་ལེན་བྱེད་པ་ལྟར་ངེས་པར་དུ་མཇལ་དགོས་ངེས་ཤིག་ཡིན་ཡང་ད་ལེན་གོ་སྐབས་དེ་ཤོར་བ་རེད་ཅེས་བྲིས་འདུག

གསར་འགོད་པ། འཆི་མེད།
རྩོམ་སྒྲིག་པ། རྡོ་རྗེ་དགྲ་འདུལ།
དྲྭ་ཐོག་རྩོམ་སྒྲིག་པ། བཀྲིས་དབང་ཕྱུག
དྲྭ་ཐོག་སྤེལ་མཁན། པ་སངས་དོན་ལྡན།