ཨང་སན་སུ་ཀིས་བཙོན་འཇུག་དེ་ཁྲིམས་འགལ་ཡིན་པ་གསུངས།

༄༅༎དེ་རིང་འབར་མའི་དམངས་གཙོ་དོན་གཉེར་བའི་དབུ་ཁྲིད་ལྕམ་ཨང་སན་སུ་ཀི་མཆོག་གིས་ཉེ་དུས་ཁོང་ལོ་བདུན་རྗེས་བཟང་བཙོན་དོ་དམ་འོག་ནས་གློད་བཀྲོལ་བཏང་བ་དེ་འབར་མའི་དྲག་པོའི་གཞུང་གིས་ལོ་ངོ་བཅུ་ཕྲག་མང་པོའི་རིང་དབང་འཛིན་བྱས་པའི་ལངས་ཕྱོགས་གུ་ཡངས་ཏུ་ཕྱིན་པའི་རྟགས་ཚན་ཞིག་མ་རེད་ཅེས་གསུངས་བཞག

ཨེ་པི་གསར་ལས་ཁང་གིས་ལྕམ་སུ་ཀི་མཆོག་ལ་གནས་འདྲི་ཞུ་སྐབས་ ཁོང་ད་བར་བཟང་བཙན་གྱི་གནས་སྟངས་འོག་བཞག་པ་དེ་ནི་ཁྲིམས་འགལ་ཡིན་པ་དང་ ཉེ་ཆར་གློད་བཀྲོལ་བཏང་ཡག་དེ་ཡང་ཁོང་ཐོག་བཟང་བཙོན་གྱི་ལོ་དུས་བཟོས་པ་དེ་མཇུག་སྒྲིལ་ཟིན་ནས་གློད་བཀྲོལ་གཏོང་དགོས་བྱུང་བ་ལས་དེ་མིན་རྒྱུ་མཚན་གཞན་མེད་པའི་སྐོར་གསུངས་འདུག

ཡང་ལྕམ་སུ་ཀི་མཆོག་གིས་ཁོང་གློད་བཀྲོལ་བྱུང་བའི་རྗེས་དྲག་པོའི་གཞུང་གིས་ཁོང་གློད་བཀྲོལ་ཐད་ལེགས་ཉེས་གང་ཡང་བརྗོད་མེད་སྟབས་ ཁོང་ཚོའི་བསམ་ཚུལ་མཁྱེན་རྟོགས་བྱུང་མེད་སྐོར་གསུངས་བཞག འོན་ཀྱང་ཁོང་གིས་འབར་མའི་ནང་དམངས་གཙོ་སླར་གསོ་བྱུང་བ་མ་གཟིགས་བར་བཞུགས་དགོས་གནང་གི་རེད་ཅེས་འགྲེལ་བརྗོད་གནང་བཞག།