༧གོང་ས་མཆོག་ལ་ཆེས་མཐོའི་མི་སེར་གྱི་ཕྱག་འཁྱེར་འབུལ་འདུག

ཁོ་སུ་ཊ་རེ་ཁཱ་Costa Rica་རྒྱལ་ཁབ་ཀྱི་སྲིད་འཛིན་ཟུར་བ་Mr Óscar Arias Sánchez་མཆོག་གིས་༧གོང་ས་མཆོག་ལ་ཁམས་འདྲི་ཞུ་བཞིན་པ། ༢༠༡༦།༡༠།༡༩ པར།Olivier Adam

ཨི་ཊཱ་ལིའི་མི་ལཱན་གྲོང་ཁྱེར་གྱིས་བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ལ་གྲོང་ཁྱེར་གྱི་ཆེས་མཐོའི་མི་སེར་གྱི་ཕྱག་འཁྱེར་ཕུལ་སྟེ་ཆེད་བསྟོད་ཞུས་ཡོད་པ་དང་། ཨི་ཊཱ་ལིའི་རྒྱ་ནག་གཞུང་ཚབ་ཁང་གིས་དེར་ངོ་རྒོལ་ཡོད་པའི་བསྒྲགས་གཏམ་ཞིག་སྤེལ་འདུག
རྒྱ་ནག་གཞུང་ཚབ་ཁང་གིས་སྤེལ་བའི་བསྒྲགས་གཏམ་དེའི་ནང་། དེས་རྒྱ་ནག་མི་དམངས་ཀྱི་ཚོར་བར་རྨ་ཁ་ཆེན་པོ་ཞིག་བཟོས་པ་ཞིག་རེད་ཅེས་དང་། ཨི་ཊཱ་ལི་དང་རྒྱ་ནག་ཕྱོགས་གཉིས་དབར་གྱི་འབྲེལ་ལམ་དང་ཕན་ཚུན་མཉམ་འབྲེལ་གྱི་ལས་དོན་ལ་ཤུགས་རྐྱེན་ངན་པ་ཡོང་རྒྱུ་ཡིན་པའི་ཉེན་བརྡ་བཏང་འདུག།
༧གོང་ས་༧སྐྱབས་མགོན་ཆེན་པོ་མཆོག་ཅེཀ་སྤྱི་མཐུན་རྒྱལ་ཁབ་ཀྱི་མཛད་འཆར་ཁག་ལེགས་གྲུབ་ཀྱིས་དེ་རིང་ཕྱི་ཟླ་༡༠་ཚེས་༢༠་ཉིན་ཨི་ཊཱ་ལིའི་གྲོང་ཁྱེར་མི་ལཱན་དུ་ཞབས་སོར་འཁོད་གནང་མཛད་པ་དང་། མི་ལཱན་གྱི་གནམ་ཐང་དུ་ཕེབས་འབྱོར་སྐབས་མི་ལཱན་གྱི་གྲོང་ཁྱེར་སྤྱི་ཁྱབ་པ་འཇུ་སེཔ་པེ་ས་ལ་(Giuseppe Sala)་མཆོག་ཕེབས་བསུའི་འཚམས་འདྲི་ཞུས་ཐོག་མཇལ་འཕྲད་གྲོས་མོལ་གནང་ཞིང་། ༧གོང་ས་༧སྐྱབས་མགོན་ཆེན་པོ་མཆོག་ལ་མི་ལཱན་གྲོང་ཁྱེར་གྱི་ཆེས་མཐོའི་མི་སེར་གྱི་ཕྱག་ཁྱེར་དེ་མི་ལཱན་སྦི་ཀོ་ཀ་(Milan-Bicocca)་མཐོ་རིམ་སློབ་གྲྭའི་ནང་གྲོང་ཁྱེར་སྤྱི་ཁྱབ་པའི་ཕྱག་ནས་འབུལ་བཞེས་གནང་འདུག།
༧གོང་ས་༧སྐྱབས་མགོན་ཆེན་པོ་མཆོག་ཚེས་༢༠་སྔ་དྲོ་གནམ་ཐང་ནས་ཐད་ཀར་མི་ལཱན་གྲོང་ཁྱེར་ཡེ་ཤུའི་བླ་ཆེན་ཨན་ཇེ་ལོ་སོཀོ་ལའི་གཟིམ་ཁང་དུ་ཆིབས་བསྒྱུར་གྱིས་བླ་ཆེན་ཁོང་དང་མཇལ་འཕྲད་གནང་ཞིང་། དེ་རྗེས་ད་རེས་ཨི་ཊཱ་ལིར་ཆིབས་བསྒྱུར་གདན་ཞུ་ཕུལ་མཁན་༧སྐུ་བཅར་རྣམ་རྒྱལ་གྲྭ་ཚང་གི་མཁན་པོ་འཁྲུམ་ཐོག་རིན་པོ་ཆེས་བཙུགས་གནང་པའི་དགེ་འཕེལ་གླིང་ནང་ཆོས་རིག་གཞུང་ལྟེ་གནས་ཁང་ཆིབས་བསྒྱུར་བསྐྱངས་ཤིང་། ཆེད་འབོད་ལྟེ་གནས་ཁང་དེའི་ཚོགས་མི་དང་དམིགས་བསལ་སྐུ་མགྲོན་ཚོར་༧གོང་ས་༧སྐྱབས་མགོན་ཆེན་པོ་མཆོག་ནས་མུ་འཐུད་ནང་ཆོས་ལ་སློབ་གཉེར་བྱ་དགོས་པའི་བཀའ་སློབ་ཕེབས་ཡོད་པ་རེད། ཉིན་གུང་ལྗགས་སྨིན་དེ་ཕྱོགས་སུ་གནང་པ་དང་། ལྗགས་སྨིན་གྲུབ་རྗེས་མི་ལཱན་སྦོ་ཀ་ཀོ་མཐོ་རིམ་སློབ་གྲྭར་ཆིབས་བསྒྱུར་གྱིས་མང་ཚོགས་ལ་བླང་དོར་གྱི་བཀའ་སློབ་སྩལ་གནང་མཛད་ཡོད་པ་རེད།
ཕྱི་ཚེས་༢༡་དང་༢༢་སོ་སོར་རྟེན་འབྲེལ་བསྟོད་པའི་སྒོ་ནས་ཆོས་འབྲེལ་གསུང་ཆོས་དང་སྤྱན་རས་གཟིགས་ཀྱི་དབང་ཆེན་བསྩལ་གནང་མཛད་རྒྱུ་ཡིན་ལ། ཕྱི་ཚེས་༢༢་ཉིན་གྱི་ཕྱི་དྲོ་མང་ཚོགས་ལ་བདེ་སྐྱིད་ཀྱི་འབྱུང་ཁུངས་ངོ་མ་ཅེས་པའི་བརྗོད་གཞིའི་སྒོ་ནས་མང་ཚོགས་ལ་བཀའ་སློབ་བསྩལ་རྒྱུ་སོགས་ཀྱི་མཛད་འཆར་ཡོད་པ་རེད།

གསར་འགོད་པ་འགན་འཛིན་གཞོན་པ་སྐལ་ལྡན་བློ་གྲོས།