ཨ་རི་དང་༸གོང་ས་མཆོག་དབར་མཛའ་འབྲེལ་ཇེ་བཟང་དུ་འགྲོ་བཞིན་ཡོད། ཨ་རིའི་གཞུང་ཚབ་པ།

ཨ་རིའི་གཞུང་ཚབ་ཆེན་མོ་ཀེན་ཇས་ཊར་མཆོག་གིས་ཁོང་ནས་བོད་ཀྱི་སྐུ་ཚབ་དོན་གཅོད་མཇལ་འཕྲད་གནང་བ་དེ་ནི་ཨ་རི་དང་སྤྱི་ནོར་༸གོང་ས་༸སྐྱབས་མགོན་ཆེན་པོ་གཉིས་དབར་མཛའ་འབྲེལ་ཇེ་བཟང་དུ་འགྲོ་བཞིན་པ་མ་ཟད། དེ་ནི་ཨ་རིའི་མི་མང་དང་བོད་མི་མང་གཉིས་ཀྱི་འབྲེལ་ལམ་རྒྱ་བསྐྱེད་གཏོང་ཕྱིར་ཡིན་པ་སོགས་གསུངས་འདུག

རྒྱ་གར་གྱི་རྒྱལ་ས་ལྡི་ལིའི་ནང་བཅའ་བཞུགས་ཨ་མི་རི་ཀའི་གཞུང་ཚབ་ཆེན་མོ་ཀེན་ཇས་ཊར་Ken Juster མཆོག་གིས་ལྡི་ལི་སྐུ་ཚབ་དོན་གཅོད་བཀའ་ཟུར་འབྲོང་ཆུང་དངོས་གྲུབ་ལགས་དང་དོན་གཅོད་ཁང་གི་དྲུང་ཆེ་གསར་པ་རྒྱལ་པོ་ལགས་རྣམ་གཉིས་རེས་གཟའ་པ་སངས་ཉིན་མཇལ་འཕྲད་གནང་འདུག རྒྱ་གར་ནང་བཅའ་བཞུགས་ཨ་རིའི་གཞུང་ཚབ་ཆེན་མོ་ཀེན་ཇས་ཊར་མཆོག་གིས་ཁོང་ནས་བོད་ཀྱི་སྐུ་ཚབ་དོན་གཅོད་མཇལ་འཕྲད་གནང་བ་དེ་ནི་ཨ་རི་དང་སྤྱི་ནོར་༸གོང་ས་༸སྐྱབས་མགོན་ཆེན་པོ་གཉིས་དབར་མཛའ་འབྲེལ་ཇེ་བཟང་དུ་འགྲོ་བཞིན་པ་མ་ཟད། དེ་ནི་ཨ་རིའི་མི་མང་དང་བོད་མི་མང་གཉིས་ཀྱི་འབྲེལ་ལམ་རྒྱ་བསྐྱེད་གཏོང་ཕྱིར་ཡིན་པ་གཞུང་ཚབ་ཆེན་མོ་ཀེན་ཇས་ཊར་མཆོག་གིས་ཊུ་ཝི་ཊར་twitter དྲ་ཚིགས་ཐོག་གསུངས་འདུག ཁོང་གིས་ད་དུང་ལྡི་ལི་སྐུ་ཚབ་དོན་གཅོད་འབྲོང་ཆུང་དངོས་གྲུབ་ལགས་དང་དྲུང་ཆེ་རྒྱལ་པོ་རྣམ་གཉིས་མཇལ་འཕྲད་བྱུང་བར་ཐུགས་དགྱེས་ཚོར་བྱུང་སྐོར་ཡང་གསུངས་འདུག

སྤྱིར་འདི་ཟླའི་ཚེས་༦ཉིན་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་དགུང་གྲངས་༨༥ཕེབས་པའི་སྐུའི་འཁྲུངས་སྐར་དུས་ཆེན་ཉིན་ཨ་རིའི་གཞུང་ཚབ་ཆེན་མོ་ཀེན་ཇས་ཊར་མཆོག་གིས་༧གོང་ས་མཆོག་ལ་འཚམས་འདྲི་ཞུས་པའི་བརྙན་ཐུང་ཞིག་བཟོས་གནང་ཡོད་པ་རེད་ལ། ཨ་རིའི་ཕྱི་སྲིད་ལས་ཁུངས་ཀྱི་དབུས་ཨེ་ཤེ་ཡའི་ལས་དོན་སྡེ་ཚན་གྱིས་རྒྱ་གར་གཞུང་ནས་ཕྱི་ལོ་༡༩༥༩ལོ་ནས་བཟུང་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་མགྲོན་བདག་གནང་བར་ཐུགས་རྗེ་ཆེ་ཞུས་གནང་ཡོད་པ་རེད།        །