ཀརྨ་པ་མཆོག་གིས་ཁེ་ཎ་ཊའི་མཛད་འཕྲིན་ལེགས་པར་འགྲུབ་འདུག

ཀརྨ་པ་མཆོག་ཁེ་ཎ་ཊའི་ནང་གི་སྔ་འགྱུར་རྙིང་མའི་དཔལ་ཡུལ་ལྷ་སྤྲུལ་རིན་པོ་ཆེའི་ཆོས་ཚོགས་སུ་ཕེབས་ནས་བཀའ་སློབ་གནང་འདུག
དེ་ཡང་ས་གནས་ནས་དབུས་ལྗོངས་བཀྲ་ཤིས་དགའ་བས་གནས་ཚུལ་སྤེལ་བར་གཞིགས་ན། ཟླ་བ་འདིའི་ཚེས་ ༢༧  ཉིན་དཔལ་༧རྒྱལ་དབང་ཀརྨ་པ་མཆོག་ལ་སྔ་འགྱུར་རྙིང་མའི་དཔལ་ཡུལ་ལྷ་སྤྲུལ་རིན་པོ་ཆེའི་ཆོས་ཚོགས་ནས་ཇི་ལྟར་གསོལ་འདེབས་ཞུས་པ་བཞིན་ཞབས་སོར་འཁོད་སྐབས། དཔལ་ཡུལ་ལྷ་སྤྲུལ་རིན་པོ་ཆེ་དང་། མཁན་བླ་སློབ་ཚོགས་ཟུང་ནས་ཕེབས་བསུ་ཟབ་རྒྱས་ཞུས་ནས་ལྷ་ཁང་ཆེན་མོར་གདན་འདྲེན་ཞུས་ཤིང་། ༧རྒྱལ་དབང་ཀརྨ་པ་མཆོག་ནས་དགོན་པར་རབ་གནས་དང་། རྟེན་གཙོར་སྙན་ཤལ་ཐུགས་སྨོན་གནང་རྗེས་ཆོས་ཚོགས་ཀྱི་སློབ་མ་རྣམས་ལ་བཀའ་སློབ་དང་མཇལ་ཁ་གནང་འདུག་ལ་དྲན་རྟེན་སྐུ་པར་ལྷན་དུ་སྒྲོན་བཞེས་གནང་འདུག
ཡང་ཚེས་ ༢༦ ཉིན། དཔལ་༧རྒྱལ་དབང་ཀརྨ་པ་མཆོག་གིས་ཁེ་ཎ་ཊའི་(Vancover)གྲོང་ཁྱེར་ནང་ཡོད་པའི་ཁྲ་འགུ་དགོན་གྱི་གཙུག་ལག་ཁང་དུ་ཡོངས་འཛིན་མཁན་ཆེན་ཁྲ་འགུ་སྐུ་ཕྲེང་དགུ་པ་ཀརྨ་བློ་གྲོས་ལུང་རིགས་སྨྲ་བའི་སེངྒེ་རིན་པོ་ཆེ་མཆོག་དགུང་ན་ཆེས་སྨིན་པས་སླད་བསྟན་འགྲོའི་དོན་དུ་སྐུ་ཚེ་ཡུན་དུ་བརྟན་པའི་ཕྱིར་དུ་དོན་བརྒྱུད་དཔལ་ལྡན་འབྲུག་པ་བཀའ་བརྒྱུད་པའི་༧སྐྱབས་རྗེ་འབྲུག་པ་ཡོངས་འཛིན་རིན་པོ་ཆེ་དང་། ༧སྐྱབས་རྗེ་སྒྲུབ་དཔོན་བདེ་ཆེན་རིན་པོ་ཆེ་སྐུ་ཕྲེང་གཉིས་པས་དབུས་པའི་མཁན་བླ་འདུས་པ་ཡོངས་ནས་རྩ་གསུམ་དྲིལ་སྒྲུབ་ཀྱི་ཆོ་ག་དབུ་ཚུགས་གནང་ནས་༧སྐྱབས་རྗེ་ཡོངས་འཛིན་མཁན་ཆེན་ཁྲ་འགུ་རིན་པོ་ཆེ་སྐུ་བགེགས་ཐམས་ཅད་ཞི་ཞིང་བསྟན་འགྲོའི་དོན་དུ་སྐུ་ཚེ་ཡུན་དུ་བརྟན་པའི་བརྟན་བཞུགས་རྒྱས་པ་ཞིག་བསྟར་འབུལ་ཞུས་གནང་ནས་ཐེངས་འདིའི་༧རྒྱལ་དབང་ཀརྨ་པ་མཆོག་གི་ཁེ་ཎ་ཊའི་ནང་གི་ཆོས་ཕྱོགས་ཀྱི་མཛད་འཕྲིན་རྣམས་ལེགས་པར་འགྲུབ་འདུག

གསར་འགོད་པ་ཚེ་དབང་དངོས་གྲུབ།