ཀརྨ་ཚེ་བརྟན་ལ་གོ་གནས་སྤྲད་པ་ཙམ་ལས་སྲིད་དབང་ཐག་གཅོད་ཀྱི་དབང་ཆ་གང་ཡང་མེད་པ། ཉམས་ཞིབ་པས་འགྲེལ་བརྗོད་གནང་གི་འདུག

ཕྱི་ཟླ་ ༡ ཚེས་ ༢༢ ཉིན་ནག་གཞུང་གིས་བོད་རང་སྐྱོང་ལྗོངས་སྐབས་བཅུ་གཉིས་པའི་མི་དམངས་འཐུས་མི་ཚོགས་ཆེན་གྱི་གྲོས་ཚོགས་ཐེངས་གསུམ་པའི་སྟེང་། རྒྱ་ནག་གཞུང་གིས་བོད་རིགས་དམར་ཤོག་འགོ་ཁྲིད་ཀརྨ་ཚེ་བརྟན་བོད་རང་སྐྱོང་ལྗོངས་མི་མང་སྲིད་གཞུང་ཟེར་བའི་འགོ་གཙོར་དངོས་སུ་བསྐོ་བཞག་གཏན་འཁེལ་བྱས་ཡོད་པ་དང་། བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་ཟླ་བ་ཚེ་རིང་ལགས་ནས། ཀརྨ་ཚེ་བརྟན་བོད་རིགས་གཙང་མ་ཡིན་པའི་རྣམ་པས། བོད་རང་སྐྱོང་ལྗོངས་མི་དམངས་སྲིད་གཞུང་ཟེར་བའི་འགོ་ཁྲིད་ལ་བསྐོས་ཡོད་ན་ཡང་། སྲིད་གཞུང་གི་འགོ་ཁྲིད་གཙོ་བོ་དེ་དམར་ཤོག་ཚོགས་པའི་ཚོགས་གཙོས་དབང་ཆ་འཛིན་གྱི་ཡོད་པས་། ཀརྨ་ཚེ་བརྟན་དམར་ཤོག་ཚོགས་པས་ཐག་གཅོད་དག་ལག་བསྟར་བྱེད་མཁན་ལས། དམིགས་བསལ་དབང་ཆ་གང་ཡང་མེད་པ་འགྲེལ་བརྗོད་གནང་གི་འདུག

ཀརྨ་ཚེ་བརྟན་ནི་སྔ་ལོའི་ཕྱི་ཟླ་ ༡༡ ནང་བོད་རང་སྐྱོང་ལྗོངས་མི་མང་སྲིད་གཞུང་གི་འགོ་གཙོ་ཡན་ཅན་ཧའེ་ཟེར་བ་བརྗེ་སྤོར་གྱིས། མི་མང་སྲིད་གཞུང་གི་འགོ་གཙོའི་ལས་ཚབ་ཏུ་བསྐོ་བཞག་བྱས་ཡོད་པ་རེད་ལ། ཀརྨ་ཚེ་བརྟན་གྱིས་དེ་སྔ་བོད་རང་སྐྱོང་ལྗོངས་མི་མང་འཐུས་མི་ཚོགས་པའི་རྒྱུན་ལས་དང་། རང་སྐྱོང་ལྗོངས་འཐབ་ཕྱོགས་གཅིག་གྱུར་ཁང་དུ་ལས་གཉེར་བྱས་མྱོང་ཡོད་པ་རེད། ཕྱི་ལོ་ ༢༠༢༤ ཟླ་ ༡ ནང་ཀརྨ་ཚེ་བརྟན་བོད་རང་སྐྱོང་ལྗོངས་སྲིད་གཞུང་གི་དམར་ཤོག་ཚོགས་པའི་དྲུང་ཆེར་བསྐོ་བཞག་སྐབས། རྒྱལ་སྤྱིའི་བོད་དོན་ལས་འགུལ་ཁང་གི་ཉམས་ཞིབ་སྡེ་ཚན་གྱི་འགན་འཛིན་བུ་ཆུང་ཚེ་རིང་ལགས་ཀྱིས། ཡོང་རྒྱུའི་དུས་ཚོད་ནང་ཀརྨ་ཚེ་བརྟན་གྱི་གོ་གནས་མཐོ་བའི་འགན་འཁུར་རྒྱུའི་རྣམ་པ་འདུག་ན་ཡང་། བོད་རིགས་འགོ་ཁྲིད་ཚོར་གོ་གནས་མཐོ་སར་ཕྱིན་ཀྱང་དབང་ཆ་ཐག་གཅོད་ཀྱི་ཕན་ཐོགས་མེད་སྐོར། འདི་ག་ཨེ་ཤེ་ཡ་རང་དབང་རླུང་འཕྲིན་ཁང་འགྲེལ་བརྗོད་གནང་ཡོད་པ་རེད།

སྔ་ལོར་ཀརྨ་ཚེ་བརྟན་གྱི་གོ་གནས་བརྗེ་སྤོ་བྱེད་སྐབས། རྒྱ་ནག་གཞུང་གིས་དེ་སྔའི་བོད་རང་སྐྱོང་ལྗོངས་མི་མང་སྲིད་གཞུང་གི་འགོ་གཙོ་ཡན་ཅིན་ཧའེ་ཟེར་བས་དགོངས་ཞུ་བྱས་ཡོད་པ་བསྒྲགས་འདུག་པ་ལས། ཁོང་བསྐྱར་དུ་གོ་གནས་ག་འདྲ་ཞིག་ལ་བསྐོ་མིན་སོགས་གསལ་ཁ་བཀོད་མེད་ན་ཡང་། ཐེངས་འདིར་ཡན་ཅིན་ཧའེ་བོད་རང་སྐྱོང་ལྗོངས་མི་དམངས་འཐུས་ཚོགས་རྒྱུན་ལས་ལྷན་ཁང་གི་མགོ་གཙོར་བསྐོ་བྱས་བྱས་ཡོད་སྐོར་བསྒྲགས་ཡོད་པ་དང་།  ཀརྨ་ཚེ་བརྟན་ནི་བོད་རང་སྐྱོང་ལྗོངས་ཀྱི་ཚོགས་འདུ་ཆེ་ཁག་ཡོངས་ལ་རྒྱུན་དུ་མཉམ་ཞུགས་དང་། ཁོང་གིས་དེ་སྔ་རང་སྐྱོང་ལྗོངས་འཐབ་ཕྱོགས་གཅིག་གྱུར་གྱི་གོ་གནས་འཁུར་སྐབས། སློབ་གྲྭ་ཁག་ཏུ་དམར་ཕྱོགས་ཚོགས་པའི་སྲིད་དབང་སྐོར་གྱི་ཟབ་སྦྱོང་དང་། ཁ་བྲལ་བར་འཐབ་རྩོད་ཀྱི་ཚོགས་འདུ་ཁག་ལ་མཉམ་ཞུགས་དང་གཙོ་སྐྱོང་བྱས་པའི་གནས་ཚུལ་ཡོད་པ་རེད།

ཀརྨ་ཚེ་བརྟན་ནི་ཕྱི་ལོ་ ༡༩༦༧ ལོ་བོད་ཀྱི་འཇོ་མདའ་རུ་སྐྱེས་ཤིང་། ཁོང་གིས་དེ་སྔ་བོད་རང་སྐྱོང་ལྗོངས་ནག་ཆུ་ས་གནས་ཀྱི་རྒྱུན་ལས་འགོ་གཙོ་གཞོན་པ་དང་། ནག་ཆུ་ས་གནས་སྲིད་ཁྲིམས་ལས་ཁུངས་ཀྱི་འགོ་ཁྲིད། བོད་རང་སྐྱོང་ལྗོངས་སྲིད་གཞུང་གི་དྲུང་ཡིག་ཆེན་མོ་གཞོན་པའི་ལས་གནས་འཁུར་ཡོད་པ་དང་། ཕྱི་ལོ་ ༢༠༢༡ ནས་བཟུང་བོད་བོད་རང་སྐྱོང་ལྗོངས་སྲིད་གྲོས་ཀྱི་རྒྱུན་ལས་ཚོགས་མི་དང་། བོད་རང་སྐྱོང་ལྗོངས་འཐབ་ཕྱོགས་གཅིག་གྱུར་ཁང་གི་འགོ་གཙོའི་ལས་གནས་གཉེར་ཡོད་འདུག་ལ། ཕྱི་ལོ་ ༢༠༢༤ ཟླ་ ༥ ནས་བཟུང་ཁོང་གིས་བོད་རང་སྐྱོང་ལྗོངས་སྲིད་གཞུང་གི་རྒྱུན་ལས་འགོ་གཙོ་གཞོན་པར་བསྐོ་གཞག་གིས་ད་བར་ལས་གནས་དེ་གཉེར་ཡོད་འདུག

གསར་འགོད་པ། རྡོ་རྗེ་སྒྲོལ་མ།

རྩོམ་སྒྲིག་པ། བདེ་སྐྱིད་ཀུན་སྒྲོལ།

དྲྭ་ཐོག་སྤེལ་མཁན། བསྟན་འཛིན་བསྟན་སྐྱོང་།