དྲུང་འཕར་ཀརྨ་དགྲ་འདུལ་ལགས་ཁྲིམས་ཞིབ་པ་ལ་གསར་བསྐོས་གནང་འདུག

ཆོས་རིག་དྲུང་འཕར་ཀརྨ་དགྲ་འདུལ་ལགས་སྐབས་༡༦པའི་བོད་མི་མང་སྤྱི་འཐུས་ལྷན་ཚོགས་གྲོས་ཚོགས་ཚོགས་དུས་༦པའི་ཐོག་ཁྲིམས་ཞིབ་པ་ལ་གསར་བསྐོས་གནང་འདུག
དེ་ཡང་ཕྱི་ཟླ་༩ཚེས་༡༩བོད་མི་མང་སྤྱི་འཐུས་གྲོས་ཚོགས་ཀྱི་ལས་རིམ་ཉིན་གཉིས་པའི་སྔ་དྲོའི་ཚོགས་མཐུན་ཐོག་དབུས་བོད་མིའི་སྒྲིག་འཛུགས་ཀྱི་ཆེས་མཐོའི་ཁྲིམས་ཞིབ་པ་གཞན་ངག་དབང་ཆོས་གྲགས་ལགས་བགྲེས་ཡོལ་ཞུས་པའི་ཚབ་ཏུ་ཁྲིམས་ཞིབ་ཁང་གི་ཁྲིམས་ཞིབ་པ་གསར་བསྐོའི་འོས་མི་ནང་སྲིད་ལས་ཁུངས་ཀྱི་དྲུང་ཆེ་ལས་འཕར་ཤོ་ཟུར་ཚེ་དབང་སྒྲོལ་མ་ལགས་དང་ཆོས་རིག་ལས་ཁུངས་ཀྱི་དྲུང་ཆེ་ལས་འཕར་སྐར་མ་དགྲ་འདུལ་ལགས་སུ་གྲོས་ཚོགས་ཀྱི་འཐུས་མི་ཚོས་འོས་འཕངས་ནས་དང་པོ་འོས་གྲངས་ ༢༡/༢༡ བྱུང་ཞིང་། འཐུས་མི་གཅིག་བར་བཞུགས་བྱས་པར་བརྟེན་འོས་འཕེན་རིམ་པ་དང་པོར་ཐག་གཅོད་བྱུང་མེད་ཅིང་།  དེ་རྗེས་སླར་ཡང་འོས་བསྡུ་རིམ་པ་གཉིས་པ་བྱས་པའི་གྲུབ་འབྲས་སུ། དྲུང་འཕར་ཀརྨ་དགྲ་འདུལ་ལགས་སུ་འོས་གྲངས་ ༢༡ དང་དྲུང་འཕར་ཚེ་དབང་སྒྲོལ་མ་ལགས་སུ་འོས་གྲངས་ ༡༩  བྱུང་སྟེ་དྲུང་འཕར་ཀརྨ་དགྲ་འདུལ་ལགས་སུ་ཁྲིམས་ཞིབ་པར་འདེམས་ཐོན་བྱུང་ཡོད་པ་རེད།
དབུས་བོད་མིའི་སྒྲིག་འཛུགས་ཀྱི་ཁྲིམས་ཞིབ་པར་གསར་འདུ་འདེམས་བསྐོ་བྱུང་བ་ཀརྨ་དགྲ་འདུལ་ལགས་ཀྱིས། ད་བར་འཛིན་སྐྱོང་ཁོ་ནའི་ནང་གི་ལས་བྱེད་ཅིག་ཡིན་པས། ད་ལྟ་མང་གཙོའི་ཀ་བ་གསུམ་གྱི་ནང་ཚན་ཁྲིམས་ཞིབ་པ་ལ་བསླེབས་སྐབས། ཁྲིམས་སྒྲིག་གི་ཐོག་ལས་དོན་གང་འདྲ་བྱས་པ་ཡིན་ན། ཐོག་མཐའ་བར་གསུམ་ལ་དབྱེ་འབྱེད་མེད་པ་དང་དྲང་པོ་དྲང་བཞག་གནང་རྒྱུའི་འདུན་པ་བརྟན་པོ་ཡོད་ཅེས་གསུངས་འདུག

གསར་འགོད་པ་བློ་བྷེ།