བཞུགས་སྒར་དུ་རྒྱལ་སྤྱིའི་དབང་པོ་སྐྱོན་ཅན་གྱི་ཉིན་མོ་སྲུང་བརྩི་ཞུ་བཞིན་པ།

ཕྱི་ཟླ་ ༡༢ ཚེས་ ༣ ཉིན་ལོ་ལྟར་རྒྱལ་སྤྱིའི་དབང་པོ་སྐྱོན་ཅན་གྱི་ཉིན་མོར་སྲུང་རྩིས་ཞུ་བཞིན་ཡོད་པས། དེ་རིང་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་གི་རྒྱལ་སྒོའི་ཉེ་འགྲམ་དུ་རྡ་སར་རྟེན་གཞི་བྱས་ཡོད་པའི་བོད་མི་ནུས་གསོ་ལྟེ་གནས་ཁང་གིས་དབང་པོ་སྐྱོན་ཅན་གྱི་ཐོབ་ཐང་འདྲ་མཉམ་དང་ཁོང་རྣམ་པར་མི་གཞན་ཚོ་དང་གཅིག་མཚུངས་སུ་ངོས་འཛིན་གནང་དགོས་པའི་ཐད་མི་མང་ལ་གོ་རྟོགས་སྤེལ་རྒྱུའི་ལས་འགུལ་ཞིག་སྤེལ་ཡོད་པ་དང་།

ཐེངས་འདིར་བོད་མི་ནུས་གསོ་ལྟེ་གནས་ཁང་གིས་རྒྱལ་སྤྱིའི་དབང་པོ་སྐྱོན་ཅན་ཀྱི་ཉིན་མོ་སྲུང་བརྩི་ཞུས་པ་དང་སྦྲགས། མི་མང་གི་བསམ་ཚུལ་བསྡུ་རུབ་དང་སྤྱི་ཚོགས་དྲྭ་ལམ་ཁག་ཏུ་ལས་འགུལ་དེ་ལྟར་སྤེལ་དོན་ནི། གཙོ་བོ་དབང་པོ་སྐྱོན་ཅན་རྣམས་ལ་མི་གཞན་དང་གཅིག་མཚུངས་ཀྱི་འདུ་ཤེས་དང་ཁོང་ཚོར་འདྲ་མཉམ་ཀྱི་རྩིས་མཐོང་དགོས་རྒྱུ། དེ་བཞིན་སློབ་སྦྱོང་དང་འཕྲོད་བསྟེན། ཆབ་སྲིད། རིག་གཞུང་སོགས་ཀྱི་ནང་གཅིག་མཚུངས་ཀྱི་མཉམ་ཞུགས་ཆོག་པ་དང་། ཁོང་ཚོར་ལས་ཀའི་གོ་སྐབས་སོགས་མི་གཞན་དང་གཅིག་མཚུངས་བསྐྲུན་ཐབས་བྱ་རྒྱུ་གལ་ཆེན་ཡིན་པར་ངོས་འཛིན་གྱིས་སྤེལ་བ་ཞིག་ཡིན་ཞིང། རང་རེའི་སྤྱི་ཚོགས་ནང་གནད་དོན་དེ་འབྲེལ་གོ་རྟོགས་སྤེལ་རྒྱུ་གལ་ཆེ་ཡིན་པ་རེད་ཅེས། བོད་མི་ནུས་གསོ་ལྟེ་གནས་ཁང་གི་འགན་འཛིན་བདེ་ལེགས་དབང་མོ་ལགས་ཀྱིས། འདི་ག་ཨེ་ཤེ་ཡ་རང་དབང་རླུང་འཕྲིན་ཁང་ལ་འགྲེལ་བརྗོད་གནང་བྱུང་། དེ་ཡང་ཁོང་གིས། བོད་པའི་སྤྱི་ཚོགས་ནང་དབང་པོ་སྐྱོན་ཅན་ཡིན་མཁན་མི་ཉུང་ཞིག་ཡོད་པར་བརྟེན། དེ་འདྲའི་གོ་རྟོགས་གོང་སྤེལ་གྱི་ལས་འགུལ་དེ་གལ་ཆེན་པོ་ཞིག་ཏུ་ངོས་འཛིན་གནང་གི་ཡོད་པ་དང་། བོད་མི་ཡོངས་ནས་ང་ཚོའི་སྤྱི་ཚོགས་ནང་གི་དབང་པོ་སྐྱོན་ཅན་རིགས་ལ་ཤེས་ཡོན་དང་དཔལ་འབྱོར་དང་སོགས་ཀྱི་མཐུན་རྐྱེན་འདྲ་མཉམ་ཡོང་ཐབས་སུ་ཕྱར་གྲུ་མཉམ་འདེབས་ཞུ་དགོས་པའི་ཞེན་བསྐུལ་གནང་སོང་།

རྩ་བའི་རྒྱལ་སྤྱིའི་དབང་པོ་སྐྱོན་ཅན་གྱི་ཉི་མོ་དེ་ནི་ཕྱི་ལོ་ ༡༩༩༢ ལོར་འཛམ་གླིང་མཉམ་རྒྱལ་ཚོགས་ཀྱི་གཏན་འབེབས་གནང་བ་ཞིག་ཡིན་ཞིང་། ཉིན་མོ་དེར་དབང་པོ་སྐྱོན་ཅན་གྱི་གནད་དོན་ཐོག་གོ་རྟོགས་སྤེལ་རྒྱུ་དང། དབང་པོ་སྐྱོན་ཅན་རྣམས་ཀྱི་ཆེ་མཐོང་དང། ཐོབ་ཐང། བདེ་དོན་བཅས་ཀྱི་ཆེད་རྒྱབ་སྐྱོར་སྒྲུབ་ཐབས་བྱེད་ཀྱི་ཡོད་པ་རེད་ལ། ལོ་ལྟར་མཉམ་འབྲེལ་རྒྱལ་ཚོགས་ཀྱིས་རྒྱལ་སྤྱིའི་དབང་པོ་སྐྱོད་ཅན་གྱི་ཉིན་མོ་དེ་བཞིན་བརྗོད་གཞི་འདྲ་མིན་ཐོག་སྲུང་རྩིས་ཞུས་ཀྱི་ཡོད་པ་ལྟར། འདི་ལོའི་བརྗོད་གཞི་ནི་དབང་པོ་སྐྱོན་ཅན་གྱི་མི་རྣམས་ལ་འགོ་ཁྲིད་ཀྱི་ནུས་པ་སྐྱེད་སྲིང་དང་རྒྱུན་འཁྱོང་ཐུབ་ཆེད་ནུས་པ་མཉམ་སྤུངས་དང་ཤུགས་སྣོན་རྒྱབ་སྐྱོར་དགོས་ཞེས་པ་དེ་ཡིན་པ་རེད་འདུག།

གསར་འགོད་པ། རྡོ་རྗེ་སྒྲོལ་མ།

རྩོམ་སྒྲིག་པ། བསྟན་འཛིན་བདེ་སྐྱིད།

དྲྭ་ཐོག་རྩོམ་སྒྲིག་པ། དཔལ་ལྡན་རྒྱལ།

དྲྭ་ཐོག་སྤེལ་མཁན། པ་སངས་དོན་ལྡན།