བཀའ་ཁྲི་དང་ཧི་མ་ཅའི་མངའ་སྡེའི་སྤྱི་ཁྱབ་མཇལ་འཕྲད།

༄༅༎བོད་མིའི་སྒྲིག་འཛུགས་ཀྱི་བཀའ་བློན་ཁྲི་པ་བློ་བཟང་སེངྒེ་མཆོག་ནས་ རྒྱ་གར་བྱང་ཕྱོགས་ཧི་མ་ཅལ་མངའ་སྡེའི་སྤྱི་ཁྱབ་བློན་ཆེན་སྐུ་ཞབས་པེ་རེམ་ཀུ་མའར་རྡུ་མལ་དང་ཁ་སང་ཕྱི་ཚེས་ ༧ ཉིན་མཇལ་འཕྲད་གནང་སྟེ་ སིམ་ལ་ཁུལ་དང་ སོ་ལན་ས་ཁུལ་དུ་གནས་སྡོད་བོད་མི་ཚོར་རྒྱབ་སྐྱོར་ཡོང་བའི་རེ་འདུན་ཞུས་གནང་འདུག་ལ། དམིགས་བསལ་ཉེ་ཆར་ཧི་མ་ཅལ་མངའ་སྡེའི་གཞུང་གིས་ རྒྱལ་བ་ཀརྨ་པ་རིན་པོ་ཆེ་མཆོག་སྔ་ལོ་ཚུར་ཕུ་བླ་བྲང་ནས་ཕྱི་རྒྱལ་གྱི་དངུལ་འབོར་ཆེ་ཐོན་པའི་གྱོད་གཞི་དང་འབྲེལ་བ་རྩ་བ་ནས་མེད་པ་གཙང་བཟོས་གནང་པར་ཐུགས་རྗེ་ཆེ་ཞུས་གནང་འདུག།
དུས་ཡུན་སྐར་མ་ ༤༥ རིང་གི་མཇལ་འཕྲད་དེའི་སྐབས་བཀའ་བློན་ཁྲི་པ་མཆོག་གིས་ ཧི་མ་ཅལ་མངའ་སྡེའི་སྤྱི་ཁྱབ་བློན་ཆེན་ལ་ སིམ་ལའི་སྤྱི་སྤྱོད་རླངས་འཁོར་བབས་ཚུགས་ཀྱི་ཉེ་འགྲམ་དུ་གནས་པའི་བོད་མི་ཚོའི་དཀའ་ངལ་དང་ཁོང་ཚོ་གནས་སྤོ་བྱ་ཡུལ་དང་ཁོང་ཚོའི་འཚོ་ཐབས་གཉེར་ཕྱོགས་སྐོར་སོགས་གསལ་བཤད་དང་བཀའ་བསྡུར་ཞུས་ཡོད་འདུག་ལ།  དེ་བཞིན་སིམ་ལའི་ཕྱོགས་གཞན་དུ་གནས་པའི་བོད་མི་ཚོ་དང་ དེ་བཞིན་སོ་ལན་ས་ཁུལ་དུ་གནས་པའི་བོད་མི་ཚོའི་དཀའ་སྡུག་སྙན་སེང་ཞུས་གནང་པ་དང་སྦྲགས། ཁོང་ཚོའི་དཀའ་ངལ་གང་མགྱོགས་སེལ་རྒྱུར་དགོངས་བཞེས་ཡོང་བའི་འབོད་སྐུལ་ཡང་ཞུས་གནང་འདུག།
མངའ་སྡེའི་སྤྱི་ཁྱབ་བློན་ཆེན་མཆོག་གིས་ མངའ་སྡེའི་གཞུང་གི་ངོས་ནས་ བོད་མི་ཚོར་འདས་པའི་ལོ་ངོ་ ༥༠ རིང་མཐུན་རྒྱུར་རོགས་རམ་གནང་པ་ལྟར། མུ་འཐུད་བོད་མིའི་བདེ་དོན་ཐད་རོགས་རམ་གནང་རྒྱུའི་ཞལ་བཞེས་གནང་ཡོད་པ་བོད་མིའི་སྒྲིག་འཛུག་གི་དྲ་རྒྱའི་ཐོག་གནས་ཚུལ་སྤེལ་འདུག།
དེ་ནས་བཀའ་བློན་ཁྲི་པ་མཆོག་ནས་ སིམ་ལ་ ཀུ་སུམཔ་ཏི་ས་ཁུལ་དུ་ཡོད་པའི་བོད་མིའི་གཞིས་ཆགས་དབྱངས་ཅན་དགའ་ཚལ་གླིང་དུ་གནས་སྡོད་བོད་མི་ཚོར་ ༧གོང་ས་༧སྐྱབས་མགོན་ཆེན་པོ་མཆོག་གིས་ བོད་མིའི་འཐབ་རྩོད་ཀྱི་ངོ་བོ་སྲ་བརྟན་རྒྱུན་འཁྱོངས་བརྟན་པོ་ཡོང་ཐབས་སུ་གཟིགས་ཏེ་ སྔ་ལོ་༧གོང་ས་༧སྐྱབས་མགོན་ཆེན་པོ་མཆོག་གིས་ཆབ་སྲིད་ཀྱི་༧སྐུ་དབང་ཡོངས་རྫོགས་རྩིད་སྤྲོད་གནང་པའི་དགོངས་དོན་དང་བོད་མིའི་སྒྲིག་འཛུགས་ཀྱི་ལས་དོན་གནང་ཕྱོགས་སོགས་སྐོར་འགྲེལ་བརྗོད་གནང་ཞིང༌། བཀའ་ཤག་གི་གསར་གཏོད་དང༌། རང་ཁ་རང་གསོ། ཆིག་སྒྲིལ་བཅས་ཀྱི་ལྟ་གྲུབ་འོག་ཕྱག་ལས་གནང་ཕྱོགས་གསལ་བཤད་གནང་ཡོད་པ་རེད།