ཧོང་ཀོང་གིས་དེབ་ཚོང་བར་སྲུང་སྐྱོབ་དང་ལེན་བྱས་འདུག

ཟླ་བ་བརྒྱད་ཙམ་རིང་རྒྱ་ནག་གིས་བཀག་ཉར་བྱས་རྗེས་གློད་བཀྲོལ་བྱུང་བའི་ཧོང་ཀོང་དེབ་ཚོང་ཁང་གི་ལས་བྱེད་ལ་བསྐྱར་དུ་རྒྱ་ནག་གིས་ཉེན་བརྡ་བཏང་བར་བརྟེན། དེ་རིང་ཧོང་ཀོང་གི་ཉེན་རྟོག་པས་ཁོ་པར་སྲུང་སྐྱོབ་བྱ་རྒྱུའི་དང་ལེན་གནང་འདུག
དེ་ཡང་ཧོང་ཀོང་གི་དེབ་ཚོང་ཁང་གི་ལས་བྱེད་Lam Wing-kee་རྒྱ་ནག་གིས་ས་མཚམས་ནས་འཛིན་བཟུང་བྱས་ནས། རྒྱ་ནག་ནང་ཁྲིད་དེ་ཟླ་བ་བརྒྱད་ཙམ་རིང་བཀག་ཉར་བྱས་ཡོད་པ་དང་། དུས་ཡུན་དེའི་རིང་ཁོ་པར་ཁྲིམས་རྩོད་པ་སོགས་དང་འབྲེལ་བ་བྱེད་དུ་བཅུག་མེད་པ་རེད། རྒྱ་ནག་གིས་འཛིན་བཟུང་བྱེད་དགོས་དོན་ནི། རྒྱ་ནག་ནང་ཚོང་མི་ཆོག་པའི་དེབ་རྒྱ་ནག་ནང་ཚོང་ཐབས་བྱས་པའི་ཆ་ནས་འཛིན་བཟུང་བྱས་པ་ཞིག་ཡིན་ལུགས་བཤད་ཀྱི་ཡོད་པ་རེད།
རྒྱ་ནག་གིས་Lam Wing-kee་གློད་དཀྲོལ་བཏང་སྐབས་ཆ་རྐྱེན་བཞག་པའི་ནང་དོན་དང་འགལ་བའི་ལས་ཀ་བྱེད་ཀྱི་ཡོད་ལུགས་བཤད་ནས་ཉེན་བརྡ་བཏང་ཡོད་འདུག
ལོ་ན་༦༡་ལ་སོན་པའི་ཧོང་ཀོང་དེབ་ཚོང་ཁང་གི་ལས་བྱེད་Lam Wing-kee་ནི། སྔ་ལོ་ཡ་མཚན་ཆེན་པོའི་ཐོག་ནས་གར་སོང་ཆ་མེད་དུ་གྱུར་པའི་ཧོང་ཀོང་དེབ་ཚོང་ཁང་གི་ལས་བྱེད་ལྔ་ནས་གཅིག་ཡིན་པ་དང་། ཟླ་བ་མང་པོའི་རྗེས་སུ་ཁོང་རྣམས་རྒྱ་ནག་གི་བཙོན་ཁང་ནང་ཡོད་པ་ཤེས་རྟོགས་བྱུང་ཡོད་སྟབས། ཧོང་ཀོང་མི་མང་ཚོས་རྒྱ་ནག་གིས་ཧོང་ཀོང་ཐོག་དམ་འཛིན་བྱ་ཤུགས་ཆེ་རུ་འགྲོ་བཞིན་པའི་བློ་འཚབ་བྱེད་བཞིན་ཡིན་འདུག Lam Wing-kee གློད་བཀྲོལ་བྱུང་ནས་ཧོང་ཀོང་དུ་ཕྱིར་ལོག་བྱུང་བའི་རྗེས་སུའང་ཁོ་པས་ཁོང་རང་གི་སྲོག་ལ་ཉེན་ཁ་ཡོད་པའི་ཞེད་སྣང་བྱེད་བཞིན་ཡིན་པ་དང་། དེའི་དབར་རྒྱ་ནག་གི་གསང་མྱུལ་བས་ཧོང་ཀོང་གི་དེབ་ཚོང་ཁང་གཞན་ཞིག་གི་ལས་བྱེད་ཧོང་ཀོང་ནས་རྒྱ་ནག་ནང་བཙན་ཁྲིད་བྱས་པའི་གནས་ཚུལ་ཡང་བྱུང་ཡོད་པ་རེད། ཧོང་ཀོང་གི་ཉེན་རྟོག་པའི་སྤྱི་ཁྱབ་གཞོན་པ་Tony Wong་ལགས་ཀྱིས། གལ་སྲིད་Lam Wing-kee་ཁོང་རང་ལ་འདོད་པ་ཡོད་ན་ང་ཚོས་ཁོང་ལ་སྲུང་སྐྱོབ་ཀྱི་མཐུན་རྐྱེན་གནང་རྒྱུ་ཡིན་ཞེས་ཚེས་༦ཉིན་གསུངས་འདུག

གསར་འགོད་པ་ཚེ་རིང་དངོས་གྲུབ།