༧གོང་ས་མཆོག་རྒྱ་གར་ལྷོ་ཕྱོགས་ཧུན་སུར་དུ་ཆིབས་བསྒྱུར།

༄༅༎སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་ཟླ་བ་འདིའི་ཕྱི་ཚེས་༧ ནས་སོག་ཡུལ་ནང་གི་མཛད་འཆར་ཁག་ལེགས་གྲུབ་ཀྱིས་ཕྱི་ཟླ་༡༢ པའི་འགོ་སྟོད་དུ་རྒྱ་གར་ལྷོ་ཕྱོགས་ཧུན་སུར་བོད་མིའི་གཞིས་ཆགས་སུ་ཆིབས་བསྒྱུར་བསྐྱང་གནང་གི་ཡོད་པའི་སྐོར་ལ་དེ་རིང་བཙན་བྱོལ་བོད་མིའི་སྒྲིག་འཛུགས་ཀྱི་དྲ་རྒྱའི་ཐོག་གནས་ཚུལ་སྤེལ་ཡོད་པ་རེད།
དེ་ཡང་རྒྱ་གར་ལྷོ་ཕྱོགས་ཧུན་སུར་རབ་རྒྱས་གླིང་བོད་མིའི་གཞིས་ཆགས་སུ་ཆགས་པའི་བརྒྱུད་སྨད་གྲ་ཚང་གིས་ཇི་ལྟར་གསོལ་འདེབས་ཞུས་དོན་བཞིན། བཀའ་བཞེས་བཟང་པོ་ཐོབ་ཏེ། རིང་མིན་ཕྱི་ཟླ་༡༢ པའི་ཚེས་༤ ཉིན་ཧུན་སུར་རབ་རྒྱས་གླིང་གཞིས་ཆགས་སུ་ཆིབས་བསྒྱུར་གྱིས། ཕྱི་ཚེས་༥ ནས་དང་༦ ཉིན་གཉིས་རིང་དཔལ་གསང་བ་འདུས་པའི་རིགས་ལྔའི་འགྲེལ་བའི་བཀའ་ཆོས་སྩལ་རྒྱུ་དང༌། དེ་ཡང་ཉིན་དེའི་སྔ་དྲོའི་ཕྱག་ཚོད་༩ པ་ནས་ཕྱེད་ཡོལ་ཕྱག་ཚོད་༣ བར་བཀའ་ཆོས་སྕལ་གནང་རྒྱུ་ཡིན་ཞིང༌། དེ་ནས་ཕྱི་ཚེས་༧ ཉིན་གྱི་སྔ་དྲོའི་ཕྱག་ཚོད་༩ པའི་ཐོག་མགོན་པོ་གང་ཉིད་ལ་བརྟན་བཞུགས་འདེབས་འབུལ་ཞུ་རྒྱུ་དང༌། དེ་རྗེས་ཕྱེད་ཡོལ་ཕྱག་ཚོས་༡ པོའི་ཐོག་བརྒྱུད་སྨད་གྲ་ཚང་གི་རིག་གནས་སློབ་གྲ་དབུ་འབྱེད་དང་རབས་གནས། བཀའ་སློབ་བཅས་གནང་རྒྱུའི་མཛད་འཆར་ཡོད་པ་རེད།