སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ལ་དྭགས་གླེ་རུ་ཡོད་པའི་ཇོ་ཁང་དང་ཡེ་ཤུའི་ལྷ་ཁང་། ཁ་ཆེའི་ཕྱག་ཁང་བཅས་ལ་ཆིབས་བསྒྱུར་གནང་ཡོད་པ།

བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ད་རིང་ཕྱི་ཟླ་བདུན་པའི་ཚེས་ཉི་ཤུ་གསུམ་གཟའ་སྤེན་པའི་སྔ་དྲོ་ལ་དྭགས་གླེ་རུ་ཡོད་པའི་ནང་པའི་ཇོ་ཁང་དང་ཡེ་ཤུའི་ལྷ་ཁང་། ཁ་ཆེའི་ཕྱག་འཚལ་ཁང་བཅས་པར་གནས་གཟིགས་སུ་ཆིབས་བསྒྱུར་གནང་འདུག ༧གོང་ས་སྐྱབས་མགོན་ཆེན་པོ་མཆོག་གིས་ཇོ་ཁང་ལ་ཆིབས་བསྒྱུར་སྐབས་མགོན་པོ་གང་ཉིད་སླར་ཡང་ལ་དྭགས་སུ་ཆིབས་བསྒྱུར་གནང་ཐུབ་པ་དང་མང་ཚོགས་ཀྱི་དད་གུས་ཞུ་སྟངས་ལ་དགྱེས་ཚོར་ཆེན་པོ་བྱུང་ཞེས་བཀའ་གནང་བ་དང་ཆབས་ཅིག་ནང་པའི་བསྟན་པ་ཟེར་དུས་ཁ་འདོན་བྱེད་པ་གཅིག་པུ་མ་ཡིན་པར་ནང་ཆོས་ལ་བསླབ་པ་སློབ་གཉེར་དང་འཛིན་སྐྱོང་སྤེལ་གསུམ་བྱེད་དགོས་རྒྱུ་གལ་ཆེན་པོ་ཡིན་པ་དེ་སྔ་ནས་ཧི་མ་ལ་ཡའི་རི་རྒྱུད་མི་མང་ཚོར་བཀའ་སློབ་གནང་གི་ཡོད་ཅེས་བཀའ་གནང་འདུག
དེ་དང་ཕྱོགས་མཚུངས་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་ཁ་ཆེའི་ཕྱག་འཚལ་ཁང་ཁག་གཉིས་ཙམ་ནང་གནས་གཟིགས་ཕེབས་ཡོད་པའི་སྐབས་དེར། ༧གོང་ས་སྐྱབས་མགོན་ཆེན་པོ་མཆོག་གིས་ཆོས་ལུགས་མི་འདྲ་བའི་དབར་མཐུན་སྒྲིལ་དམ་ཟབ་དགོས་རྒྱུ་གལ་ཆེན་པོ་རེད་ལ་མགོན་པོ་གང་ཉིད་ཀྱི་དགོངས་གཞི་གཅིག་ནི་ཆོས་ལུགས་ཕན་ཚུན་དབར་མཐུན་བསྒྲིལ་ཡོང་ཐབས་སུ་འབད་བརྩོན་གནང་གི་ཡོད་ཅེས་བཀའ་གནང་བ་དང་ཆབས་ཅིག་ཆོས་ལུགས་དང་ཆོས་རྒྱུད་མི་འདྲ་བའི་དབར་འཁོན་འཛིན་དང་བསད་རེས་བྱེད་པའི་གནས་ཚུལ་རྣམས་ཧ་ཅང་ཐབས་སྡུག་རེད་ཅེས་བཀའ་གནང་སྟེ་ཆོས་ལུགས་མཐུན་སྒྲིལ་དམ་ཟབ་དགོས་པའི་བཀའ་སློབ་གནང་འདུག
ཡང་གླེ་རུ་ཡོད་པའི་ཡེ་ཤུའི་ལྷ་ཁང་ལ་ཆིབས་བསྒྱུར་གནང་སྐབས་ཐོག་མར་༧གོང་ས་མཆོག་ལ་ཆེ་བསྟོད་ཀྱི་བསྟོད་གླུ་ཕུལ་བ་དང་དེ་ནས་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་བཀའ་སློབ་ཕེབས་པའི་ནང་འཛམ་གླིང་ནང་མི་འབོར་ཐེར་འབུམ་བདུན་ཡོད་པ་དེ་དག་ཚང་མ་སྐྱེས་འཆི་རང་བཞིན་གཅིག་མཚུངས་ཡིན་པ་དང་། འགྲོ་བ་མིའི་རིགས་ལ་ད་ལྟའི་དུས་ཚོད་འདིར་དཀའ་ངལ་ཆེན་པོ་འཕྲད་བཞིན་པའི་དུས་ཚོད་འདིར་ཕན་ཚུན་སྤུན་ཉེའི་འདུ་ཤེས་བཟུང་སྟེ་གཅིག་ཕན་གཅིག་རོགས་བྱེད་དགོས་ལུགས་གསུངས་པ་དང་འབྲེལ་རྒྱ་གར་རྒྱལ་ཁབ་འདི་བཞིན་ཆོས་ལུགས་དང་མི་རིགས་འདྲ་མིན་ཡོད་མིན་ལ་མ་ལྟོས་པར་ཆུང་ཙག་རིགས་མ་གཏོགས་གཏན་ལྷིང་ཡོད་པ་བཅས་ལ་བརྟེན་མགོན་པོ་གང་ཉིད་ཀྱང་སྐུ་ཚེ་བདེ་སྐྱིད་ངང་འཚོ་ཞིང་ཡོད་ཅེས་གསུངས་འདུག དེ་དང་ཕྱོགས་མཚུངས་འཛམ་གླིང་ནང་ཚ་དྲོད་ཆེ་རུ་འགྲོ་བའི་དཀའ་ངལ་ལ་གདོང་ལེན་དང་བཅོས་ཐབས་ཀྱི་ལས་འགུལ་སྤེལ་དགོས་པའི་སྐོར་ཡང་བཀའ་གནང་འདུག།
གསར་འགོད་པ། ཪིག་འཛིན་ཆོས་སྒྲོན།
རྩོམ་སྒྲིག་པ། རྡོ་རྗེ་དགྲ་འདུལ།
དྲ་ཐོག་སྤེལ་མཁན། རྟ་མགྲིན་དབང་ཕྱུག