༸གོང་ས་མཆོག་ནས་བོད་ཀྱི་གནས་སྟངས་སྐོར་བཀའ་གནང་བ།

༄༅༎བོད་ཀྱི་བླ་ན་མེད་པའི་དབུ་ཁྲིད་༧སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་དེང་སང་འདི་ག་རྒྱལ་ས་ཝ་ཤིང་ཀྲོན་དུ་དཔལ་དུས་ཀྱི་འཁོར་ལོའི་དབང་ཆེན་བསྩལ་གནང་བཞིན་ཡོད་པའི་དུས་ཚོད་དང་བསྟུན། ཁ་ས་རེས་གཟའ་ཟླ་བའི་ཉིན་འདི་ག་ཨེ་ཤ་རང་དབང་རླུང་འཕྲིན་ཁང་དུ་གཟིགས་སྐོར་ཆིབས་བསྒྱུར་གནང་བ་མ་ཟད་། འདི་གའི་རྒྱ་སྐད་སྡེ་ཚན་ནས་བཅར་འདྲི་དང་ལན་ཞུས་ཡོད་པ་རེད།

བཅར་འདྲི་ཞུས་པའི་ཁོངས་སུ། བོད་ཀྱི་གནས་སྟངས་འདི་མུར་ལུས་པ་ཡིན་ན་གནས་ཚུལ་ག་འདྲ་ཞིག་ཆགས་ཀྱི་རེད་དགོངས་ཀྱི་ཡོད་དམ་ཞེས་བཀའ་འདྲི་ཞུས་པར། ༧གོང་ས་མཆོག་གིས། ལོ་ངོ་དྲུག་བཅུའི་རིང་རྒྱ་ནག་གི་འགོ་འཁྲིད་རིམ་པ་བྱུང་ཡོད་པ་དང་། རྒྱ་ནག་གི་རྩ་ཁྲིམས་དང་ལམ་ལུགས་ལ་འགྱུར་བ་གང་ཡང་ཕྱིན་མེད་ཀྱང་འགོ་འཁྲིད་སོ་སོའི་ཐོག་ནས་དུས་ཚོད་དང་བསྟུན་ནས་འགྱུར་བ་བཏང་ཡོད་རེད། དཔེར་ན། ཏིང་ཤའོ་ཕིང་སྐབས་དཔལ་འབྱོར་གྱི་བཅོས་བསྒྱུར་བཏང་ཡོད་པ་དང་།དེ་དང་ཕྱོགས་མཚུངས་ཅང་ཛེ་མིན་སྐབས་བཅོས་བསྒྱུར་གསུམ་ཟེར་བ། ད་ཆ་སྲིད་བློན་ཝན་ཇ་བྷ་འོས་མང་གཙོའི་བཅོས་བསྒྱུར་གཏོང་དགོས་ལུགས་ཡང་ནས་ཡང་དུ་གསུངས་པ་སོགས་དུས་ཚོད་དང་བསྟུན་ནས་འགྱུར་བ་ཕྱིན་ཡོད་རེད། དེ་འདྲ་ཡིན་དུས་རྒྱ་ནག་གཞུང་ཡིན་ནའང་མི་མང་གི་མངོན་འདོད་དང་མཚུངས་པས་འགྱུར་བ་མི་གཏོང་ཐབས་མེད་ཆགས་ཀྱི་རེད་ཅེས་བཀའ་ལན་གནང་ཡོད་པ་རེད།།