༸གོང་ས་མཆོག་སྐུའི་འཕྲོད་བཞེས་བརྟག་དཔྱད་གནང་སྐོར།

༄༅༎བོད་ཀྱི་བླ་ན་མེད་པའི་དབུ་འཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཉིན་ཤས་སྔོན་ཕྱག་ངར་ལ་ཕྲན་བུ་སྙུང་གཞི་ལྟ་བུ་བྱུང་རྗེས་སྐུའི་བླ་སྨན་པ་རྣམ་པས་གསོལ་འདེབས་ཞུས་དོན་ལྟར་རྒྱ་གར་གྱི་རྒྱལ་ས་ལྡི་ལིའི་ཨ་པོ་ལོའོ་སྨན་ཁང་དུ་སྐུའི་བརྟག་དཔྱད་ཆེད་ཆིབས་བསྒྱུར་བསྐྱངས་གནང་མཛད་པ་དང་གཟའ་མིག་དམར་ཉིན་ཕྱག་ངར་གྱི་སྙུང་གཞི་ཧ་ལམ་མེད་པའི་ཐོག་ནས་བཞུགས་སྒར་རྡ་རམ་ས་ལར་ཕེབས་འབྱོར་བདེ་བར་ཟིན་ཡོད་པ་རེད།

གཟའ་ཟླ་བའི་ཉིན་ལྡི་ལིའི་སྨན་ཁང་དེའི་ནང་གི་བརྟག་དཔྱད་ཞུ་མཁན་གྱི་སྨན་པ་ཚོས་ཕྱག་ངར་ལ་སྐྱོན་ཆ་གང་ཡང་མེད་པ་དང་ཉིན་ཤས་ནང་ཚུད་སྙུང་གཞི་རང་བཞིན་གྱི་ཡལ་འགྲོ་རྒྱུ་ཡིན་པ་གསལ་བཤད་ཞུས་ཡོད་པ་རེད།

དེ་རིང་གཟའ་མིག་དམར་ཉིན་རྒྱ་གར་གྱི་རྒྱལ་ས་ལྡི་ལི་ནས་ཆིབས་ཐོན་མ་གནང་གོང་གསར་འགོད་པ་ཚོར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་སྙུང་གཞི་དྲག་སྐྱེད་ཀྱིས་ཧ་ལམ་རྣམ་ཀུན་ལྟར་ཡིན་པ་བཀའ་གསལ་གནང་འདུག་ལ་དཔལ་ལྡན་སྐུ་སྒེར་ཡིག་ཚང་གི་སྐུ་བཅར་གྲས་སྟག་ལྷ་བསྟན་འཛིན་རྣམ་དག་ལགས་ཀྱིས་རིང་མིན་༸གོང་ས་༸སྐྱབས་མགོན་ཆེན་པོ་མཆོག་ཡོ་རོབ་ཀྱི་ཡུལ་གྲུ་ཇར་མན་དང་ཨི་ཊ་ལི་དེ་རྗེས་རྒྱ་གར་ལྷོ་ཕྱོགས་ཁུལ་གྱི་ཆིབས་བསྒྱུར་མཛད་འཆར་ལ་འགྱུར་བ་གང་ཡང་འགྲོ་རྒྱུ་མིན་པ་གསལ་བཤད་གནང་འདུག