༧གོང་ས་༧སྐྱབས་མགོན་ཆེན་པོ་མཆོག་གིས་རྩོམ་རིག་དུས་སྟོན་ཐོག་གསུང་འཕྲིན་བསྩལ་གནང་མཛད་ཡོད་པ།

ཟླ་འདིའི་ཕྱི་ཚེས་༢༦ཉིན་བཞུགས་སྒར་རྡ་རམ་ས་ལའི་རྫོང་དཔོན་ལས་ཁུངས་ཀྱིས་རྡ་ས་ཁུལ་དུ་རྩོམ་རིག་དར་འཕེལ་ལ་དམིགས་ཏེ། རྡ་རམ་ས་ལར་རྩོམ་རིག་དུས་སྟོན་ཐོག་མ་དེ་སྐོང་ཚོགས་གནང་ཡོད་པ་དང་། བོད་མིའི་སྒྲིག་འཛུགས་ཀྱི་མགྲིན་ཚབ་པ་བསྟན་འཛིན་ལེགས་བཤད་ལགས་ཀྱིས་རྩོམ་རིག་དུས་སྟོན་དེའི་ཐོག་༧གོང་ས་༧སྐྱབས་མགོན་ཆེན་པོ་མཆོག་གིས་བསྩལ་བའི་གསུང་འཕྲིན་སྒྲོག་སྦྱང་གནང་བའི་ནང་། མགོན་པོ་གང་ཉིད་འདས་པའི་ལོ་ངོ་ ༦༠ ལྷག་རིང་བཞུགས་ཡུལ་གྱི་གྲོང་སྡེ་རྡ་རམ་ས་ལའི་ནང་རྩོམ་རིག་དུས་སྟོན་ཞིག་སྤེལ་ཐུབ་པ་དེར་ཐུགས་དགྱེས་ཚོར་ཆེན་པོ་བྱུང་གནང་བ་དང་འབྲེལ་དུས་སྟོན་དེའི་ཐོག་ཞུགས་མཁན་རྣམས་ལ་འཚམས་འདྲི་ཡོད་ཅེས་དང་། རྡ་སའི་རྩོམ་རིག་དུས་སྟོན་འདི་བཞིན་དཔེ་ཆ་དང་དཔེ་ཀློག་སྲུང་བརྩི་ཞུ་རྒྱུའི་དུས་ཚིགས་ཤིག་ཏུ་འགྱུར་རྒྱུ་ཙམ་མ་ཡིན་པར། ཚང་མས་སེམས་དང་སེམས་ཚོར་སྐོར་གྱི་རྒྱ་གར་གྱི་གནའ་བོའི་རིག་གཞུང་ཕྱུག་པོ་ཡོད་པ་དེ་དག་གིས་ཉོན་མོངས་ལ་ཁ་གཏད་ཇི་ལྟར་གཅོག་གི་ཡོད་མེད་སྐོར་ལ་དོ་སྣང་ཡོང་བའི་ཐུགས་རེ་གནང་གི་ཡོད་པ་བཀའ་གནང་སྟེ། མདོར་བསྡུས་ན། རྒྱ་གར་གྱི་གནའ་བོའི་རིག་གཞུང་དེར་འཛམ་གླིང་ནང་ཞི་བདེ་དང་བདེ་སྐྱིད་བསྐྲུན་ཐུབ་པའི་ནུས་པ་ཡོད་པ་མ་ཟད། རྒྱ་གར་དང་འཛམ་གླིང་གི་ས་ཕྱོགས་གཞན་གྱི་དེང་རབས་རྩོམ་རིག་ནི་གསུང་རབས་ཀྱི་ནང་དུ་ཡོད་པ་ཙམ་མིན་པར། རྩོམ་རིག་ནང་ལོ་རྒྱུས་དང་། བརྩམས་སྒྲུང་། གཏམ་བརྗོད་ཟློས་གར། སྙན་ངག ཁོར་ཡུག་བཅས་ཚུད་ཡོད་པ་དང་། རྩོམ་རིག་བརྒྱུད་ནས་མི་གཞན་གྱི་འཚོ་བར་རྒྱུས་ལོན་བྱེད་ཐབས་དེས། ས་འབབ་དང་གནམ་གཤིས། སྤྱི་ཚོགས་ཀྱི་གོམས་སྲོལ་འདྲ་མིན་ལས་ཐོན་པའི་སྣ་མང་རིག་གཞུང་ཁག་ལ་གོ་རྟོགས་ཡོང་རྒྱུར་ཕན་ཐོགས་ཡོད་པ་བཀའ་བསྩལ་གནང་མཛད་འདུག རྡ་ཤོད་ཀྱི་རྒྱ་གར་མཐོ་རིམ་སློབ་གཉེར་ཁང་དུ་སྤེལ་བའི་རྩོམ་རིག་དུས་སྟོན་དེར། རྒྱ་གར་གྱི་རྩོམ་པ་པོ་དང་སྙན་ངག་པ་རྣམས་ཀྱིས་གཏམ་བཤད་གནང་འདུག་ལ། བོད་རང་བཙན་འཐབ་རྩོད་པ་བསྟན་འཛིན་བརྩོན་འགྲུས་ལགས་དང་། སྙན་ངག་པ་དང་ཉམས་ཞིབ་པ་ཚེ་རིང་བཀྲ་ཤིས་ལགས་གཉིས་ཀྱིས་བོད་ཕྱི་ནང་གི་རྩོམ་རིག་སྤྱིའི་གནས་བབས་སྐོར་གཏམ་བཤད་གནང་ཡོད་པ་དང་། སྙན་ངག་པ་བསྟན་འཛིན་ཆོས་དབྱིངས་ལགས་ཀྱིས་སྙན་ངག་གྱེར་འདོན་གནང་འདུག
གསར་འགོད་པ། འཆི་མེད།
རྩོམ་སྒྲིག་པ། རིག་ལྡན་སྒྲོལ་མ།
དྲ་ཐོག་སྤེལ་མཁན། རྟ་མགྲིན་དབང་ཕྱུག