༸གོང་ས་༸སྐྱབས་མགོན་ཆེན་པོ་མཆོག་བཞུགས་སྒར་ནས་རྒྱ་གར་གྱི་རྒྱལ་ས་ལྡི་ལི་བརྒྱུད་རྒྱ་གར་ལྷོ་ཕྱོགས་སུ་ཆིབས་ཞལ་བསྒྱུར་བ།

རྒྱ་གར་ལྷོ་ཕྱོགས་སྦེལ་ཀོབ་བོད་མིའི་གཞིས་ཆགས་སུ་སྐུ་ལྷོད་བཞུགས་ཆེད་བོད་མིའི་བླ་ན་མེད་པའི་དབུ་ཁྲིད་༸གོང་ས་༸སྐྱབས་མགོན་ཆེན་པོ་མཆོག་ཕྱི་ལོ་ ༢༠༢༥ ཟླ་ ༡ ཚེས་ ༣ ཉིན་བཞུགས་སྒར་༸རྒྱལ་བའི་ཕོ་བྲང་ནས་ཆིབས་ཐོན་གྱིས་བཞུགས་སྒར་ཉེ་འཁྲིས་གྷ་གལ་གནམ་ཐང་བརྒྱུད་རྒྱ་གར་རྒྱལ་ས་ལྡི་ལིར་ཆིབས་སྒྱུར་གནང་ཡོད་ཅིང་། སྐབས་དེར་བཞུགས་སྒར་རྡ་རམ་ས་ལའི་མེག་གྷན་དང་། གངས་སྐྱིད། ཀང་རའི་གྷ་གལ་གནམ་ཐང་བཅས་སུ་བོད་མི་དང་ཕྱི་རྒྱལ་མི་རིགས་བཅས་དད་ལྡན་པ་སྟོང་ཕྲག་མང་པོས་ལག་ཏུ་དཀར་གཙང་གི་མཇལ་དར་དང་དྲི་ཞིམ་གྱི་བདུག་སྤོས་སོགས་བཟུང་སྟེ། དགའ་དད་སྤྲོ་གསུམ་གྱི་སྒོ་ནས་ཕེབས་སྐྱེལ་ཞུས་ཡོད་པ་ལྟར། ཀང་རའི་གྷ་གལ་གནམ་ཐང་དུ་ཞལ་མཇལ་ཞུ་མཁན་འཇར་མན་གྱི་བཙུན་མ་ཐུབ་བསྟན་སྒྲོལ་དཀར་ལགས་ནས། ང་ཚོ་༸རྒྱལ་བ་རིན་པོ་ཆེ་སངས་རྒྱས་དངོས་ལ་མཇལ་ཐུབ་པར་འཛམ་གླིང་ནང་གི་བསོད་ནམས་ཆེ་ཤོས་སུ་ཚོར་གྱི་ཡོད་པ་དང་། ༸རྒྱལ་བ་རིན་པོ་ཆེ་བཞུགས་སྒར་ནས་ཆིབས་ཐོན་མཛད་པར་སེམས་ནང་སྐྱོ་སྣང་ཅུང་ཙམ་ཡོད་ནའང་། གང་མགྱོགས་ཚུར་ཆིབས་ཞལ་བསྒྱུར་རྒྱུའི་རེ་བ་ཡོད་པ་འགྲེལ་བརྗོད་གནང་གི་འདུག

བོད་མི་བསྟན་འཛིན་ཆོས་འཛིན་ལགས་ནས་༸གོང་ས་མཆོག་དགུང་ལོ་མཐོན་པོ་ཡིན་པར་བརྟེན། ཕར་ཚུར་མང་པོ་ཕེབས་དགོས་བྱུང་ན་༸སྐུའི་འཕྲོད་བཞེས་ཀྱི་ཐོག་སེམས་ཁྲལ་གང་འཚམ་ཡོང་གི་འདུག་ཅིང་། དེང་སང་མགོན་པོ་གང་ཉིད་ཀྱི་ཞལ་མཇལ་གསུང་ཐོས་ཀྱི་གོ་སྐབས་དཀོན་པོ་ཡིན་པས། ད་ལམ་ཞལ་མཇལ་བྱུང་བར་སེམས་ནང་ཧ་ཅང་དགའ་ཚོར་བྱུང་བ་འགྲེལ་བརྗོད་གནང་གི་འདུག

བོད་མིའི་བླ་ན་མེད་པའི་དབུ་ཁྲིད་༸གོང་ས་༸སྐྱབས་མགོན་ཆེན་པོ་མཆོག་ཟླ་ ༡ ཚེས་ ༥ ཉིན་རྒྱ་གར་ལྷོ་ཕྱོགས་ཀྱི་སྦེལ་ཀོབ་བོད་མིའི་གཞིས་ཆགས་སུ་ཞབས་སོར་འཁོད་དེ། གཞིས་ཆགས་དེ་གར་ཆགས་པའི་གདན་ས་བཀྲ་ཤིས་ལྷུན་པོ་རུ་དུས་ཡུན་གང་འཚམ་རིང་སྐུ་ལྷོད་བཞུགས་གནང་གཏན་ཁེལ་ཡོད།

གདན་ས་བཀྲ་ཤིས་ལྷུན་པོ་ནི་ཕྱི་ལོ་ ༡༤༤༧ ལོར་༸རྒྱལ་དབང་༸སྐུ་ཕྲེང་དང་པོ་རྗེ་དགེ་འདུན་གྲུབ་པས་དངོས་སུ་ཕྱག་བཏབ་ཅིང་། ཕྱིས་སུ་༸པཎ་ཆེན་སྐུ་ཕྲེང་རིམ་བྱོན་གྱིས་བདག་སྐྱོང་དང་གདན་ས་གཙོ་བོ་ཆགས་ཡོད་ལ། མགོན་པོ་གང་ཉིད་སྦེལ་ཀོབ་གཞིས་ཆགས་སུ་དེ་སྔ་ཕེབས་ཐེངས་མཐའ་མ་ནི་ཕྱི་ལོ་༢༠༡༧ ལོའི་ཟླ་ ༡༢ པའི་ནང་ཡིན་པ་རེད། །

རྒྱ་གར་ལྷོ་ཕྱོགས་བོད་མིའི་གཞིས་ཆགས་ཁག་ཏུ་གྲ་སྒྲིག་གནང་བཞིན་པའི་གནས་ཚུལ།

གསར་འགོད་པ། བློ་བྷེ། 

རྩོམ་སྒྲིག་པ། བསྟན་འཛིན་བསྟན་སྐྱོང་།

དྲྭ་ཐོག་སྤེལ་མཁན། བདེ་སྐྱིད་ཀུན་སྒྲོལ།