སེམས་ལ་འགྱུར་བཅོས་གཏོང་ཐབས་ཀྱི་སློབ་སྦྱོང་ཡང་སྤྲོད་དགོས།

༄༅༎བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་འཛམ་གླིང་འདིའི་སྟེང་བདེ་སྐྱིད་དང་། རྒྱལ་ཁབ་ཕན་ཚུན་དབར་མཛའ་མཐུན། དེ་བཞིན་མ་འོངས་པར་འགྲོ་བ་མིའི་སྤྱི་ཚོགས་ཡར་རྒྱས་གོང་འཕེལ་གྱི་ཕྱོགས་སུ་བསྐྱོད་དགོས་ན་དེང་དུས་ཀྱི་ཤེས་ཡོན་མཉམ་དུ་མིའི་སེམས་ལ་བསྒྱུར་བཅོས་གཏོང་ཐབས་ཀྱི་སློབ་སྦྱོང་ཡང་སྤྲོད་དགོས་པ་གལ་གནད་ཆེན་པོ་ཡིན་པའི་དགོངས་ཚུལ་གསུངས་འདུག  དེ་ཡང་ཁ་ས་ཕྱི་ཚེས་ ༡༣ རེས་གཟའ་ཟླ་བ་ཉིན་ཤེས་ཡོན་སྤྲོད་ཕྱོགས་ཐད་༸གོང་ས་༸སྐྱབས་མགོན་ཆེན་པོ་མཆོག་གིས་དགོངས་ཚུལ་གསུང་པའི་ཆེད་རྩོམ་ཞིག་ཨ་རིའི་ Los Angeles Times ཉིན་རེའི་གསར་ཤོག་ཐོག་འདོན་སྤེལ་བྱས་པའི་ནང༌། དེང་དུས་ཀྱི་ཤེས་ཡོན་སྤྲོད་ཕྱོགས་དེ་ཕྱི་དངོས་པོའི་རིན་ཐང་དང་ཕྱི་དངོས་པོའི་གོ་རྟོགས་ཡར་རྒྱས་གཏོང་རྒྱུ་ཁོ་ནར་དམིགས་ཀྱི་ཡོད། འོན་ཀྱང་དངོས་ཡོད་ཀྱི་གནས་སྟངས་ལ་འགྲོ་བ་མིའི་སྤྱི་ཚོགས་ནང་ཞི་བདེ་དང་བདེ་སྐྱིད་དགོས་ན་ཕྱི་དངོས་པོའི་གོ་རྟོགས་གཅིག་པུས་མི་འདང་བར་ནང་སེམས་ཡར་རྒྱས་གཏོང་རྒྱུར་གལ་གནད་ཆེ་བ་སྤྲོད་དགོས་པ་ཡིན། ཆོས་ལུགས་གང་འདྲ་ཞིག་ལ་དད་མོས་བྱེད་མཁན་ཡིན་རུང༌། ང་ཚོ་འགྲོ་བ་མི་ཚང་མའི་རྒྱུད་ལ་བཟང་སྤྱོད་ཀྱི་རྨང་གཞི་ཞིག་ཡོད་པ་ཡིན་ཙང༌། བཟང་སྤྱོད་ཀྱི་རྨང་གཞི་དེ་དག་ཡར་རྒྱས་གོང་འཕེལ་གཏོང་དགོས་པ་ཡིན། དེ་ལྟར་ཡོང་རྒྱུར་འཛམ་གླིང་ཁྱོན་ཡོངས་ལ་དེང་དུས་ཀྱི་ཤེས་ཡོན་མཉམ་དུ་ནང་སེམས་ཡར་རྒྱས་གཏོང་རྒྱུའི་སློབ་སྦྱོང་ཡང་སྤྲོད་དགོས་པ་ཡིན། ངོས་ཀྱིས་མ་འོངས་པའི་དུས་གཅིག་ལ་སྔོན་འགྲོ་དང་། གཞི་རིམ། མཐོ་སློབ་བཅས་པ་ཚང་མའི་ནང་རྒྱུན་ལྡན་གྱི་སློབ་སྦྱོང་སྤྲོད་སྐབས་བྱམས་པ་དང་། སྙིང་རྗེ། དྲང་བདེན། བཟོད་བསྲན་བཅས་པའི་ཐོག་དོ་སྣང་ཆེ་ཙམ་སྤྲོད་པའི་རེ་བ་བྱེད་ཀྱི་ཡོད་ཅེས་གསུངས་ཡོད་པའི་གནས་ཚུལ་ཞིག་བོད་མིའི་སྒྲིག་འཛུགས་ཀྱི་དྲ་རྒྱའི་ཐོག་འདོན་སྤེལ་གནང་འདུག།
གསར་འགོད་པ་ངག་དབང་ཆོས་འཕེལ།