གནམ་གཤིས་འགྱུར་བས་འབྲུག་ཡུལ་ལ་གནོད་གཞིའི་ཉེན་བརྡ།

• 
  2011-08-24

༄༅༎འབྲུག་ཡུལ་གྱི་སྲིད་བློན་འཇིགས་མེད་འཕྲིན་ལས་མཆོག་གིས་ ཧི་མ་ལ་ཡ་རི་བརྒྱུད་ཀྱི་གནམ་གཤིས་ལ་འགྱུར་བ་འགྲོ་གི་ཡོད་པ་དེས། འབྲུག་ཡུལ་དེ་བཞིན་མ་འོངས་འཛམ་གླིང་ནང་ནས་ཆུ་གློག་གི་ནུས་ཤུགས་མཁོ་འདོན་བྱེད་མཁན་གྱི་རྒྱལ་ཁབ་ཆེ་ཤོས་ཆགས་རྒྱུའི་དམིགས་ཡུལ་ལ་གནོད་སྐྱོན་ཕོག་སྲིད་པའི་ཉེན་བརྡ་བཏང་གནང་འདུག།

རྒྱ་དཀར་ནག་གཉིས་དབར་ཆགས་པའི་རི་བརྒྱུད་རྒྱལ་ཁབ་འབྲུག་ནི་དཔལ་འབྱོར་གོང་འཕེལ་ཁོ་ནའི་ཐོག་བསམ་བློ་མ་བཏང་བར་། ཡུལ་གྱི་ཁོར་ཡུག་སྲུང་སྐྱོབ་དེ་བཞིན་རྒྱལ་ཁབ་ཡར་རྒྱས་གཏོང་རྒྱུའི་ཆ་རྐྱེན་གལ་ཆེ་ཞིག་ལ་རྩིས་ནས་མང་ཚོགས་ལ་བདེ་སྐྱིད་སྐྲུན་ཐབས་བྱེད་མཁན་གྱི་རྒྱལ་ཁབ་ཅིག་ཡིན་པ་རེད།

ཁྱོན་མི་འབོར་འབུམ་བདུན་ཙམ་གནས་སྡོད་བྱ་ཡུལ་འབྲུག་རྒྱལ་ཁབ་དེ་བཞིན་སོལ་ལའི་འབྱུང་ཁུངས་ཐོག་རྟེན་མི་དགོས་པར་གློག་ཤུགས་མཁོ་འདོན་བྱེད་ཀྱི་ཡོད་པ་དང༌། འབྲུག་སྤྱི་ཡོངས་ཀྱི་གློག་ཁང་ཡོངས་རྫོགས་གཙང་ཆུའི་ནུས་ཤུགས་ནས་འདོན་སྤེལ་བྱེད་ཀྱི་ཡོད་པ་རེད།

འབྲུག་ཡུལ་གྱི་སྲིད་བློན་འཇིགས་མེད་འཕྲིན་ལས་མཆོག་གིས་ ཕ་རེན་སི་གསར་ལས་ཁང་ལ། འབྲུག་ཁུལ་གྱི་ཆུའི་འབྱུང་ཁུངས་དང་ཧི་མ་ལ་ཡའི་འཁྱགས་རོམ་བཞུར་བ་ནས་གློག་ཤུགས་འདོན་སྤེལ་བྱ་རྒྱུའི་མ་འོངས་ལས་འཆར་ཁག་ལ་ཧི་མ་ལ་ཡའི་གནམ་གཤིས་འགྱུར་ལྡོག་གིས་གནོད་འཚེ་ཆེན་པོ་བཟོ་གི་ཡོད་པའི་རང་བཞིན་འབྱུང་བའི་དཀའ་ངལ་མེད་པ་བཟོ་རྒྱུའི་ནུས་པ་འབྲུག་ལ་མེད་པའི་སྐོར་འགྲེལ་བརྗོད་གནང་བཞག།

ད་ལྟའི་འཆར་ལས་མི་དང་འཕྲུལ་ལས་མཁས་པ་༢༠༠ནས་༣༠༠བར་ཞིག་གིས་ འབྲུག་ཡུལ་གྱི་ ལུ་ན་ལྭ་རྫོང་ཁུལ་ཡོད་པའི་ འཁྱགས་རོམ་གྱི་མཚོ་ཆེ་ཤོས་དེའི་ས་ངོས་མཐོ་ཚད་དམའ་རུ་གཏོང་རྒྱུའི་ལས་དོན་བྱེད་བཞིན་ཡོད་པ་རེད།