རྒྱ་རི་རིན་པོ་ཆེའི་སྐུ་ཕུང་སྨིན་གྲོལ་གླིང་དགོན་པར་གདན་ཞུ།

བཀའ་ཟུར་རྒྱ་རི་རིན་པོ་ཆེ་མཆོག་ཕྱི་ཟླ་ ༡༠ ཚེས་ ༢༩ ཉིན་ཨ་རིའི་ནུབ་ཕྱོགས་ཀྱི་གྲོང་ཁྱེར་སན་ཧྥརན་སིསྀ་ཀོའི་སྨན་ཁང་ཞིག་གི་ནང་དགོངས་པ་རྫོགས་ཡོད་པ་དང་། ཁོང་གི་སྐུ་ཕུང་ཕྱི་ཟླ་ ༡༡ ཚེས་ ༥ ཉིན་ཨ་རི་ནས་རྒྱ་གར་གྱི་རྒྱལ་ས་ལྡི་ལི་བརྒྱུད།  རྒྱ་གར་བྱང་ཕྱོགས་ཌེ་ར་ཌུན་དུ་ཡོད་པའི་སྨིན་གྲོལ་གླིང་དགོན་པར་གདན་འདྲེན་ཞུས་ཡོད་པ་རེད།

ཌེ་ར་ཌུན་གནམ་ཐང་དུ་སྐྱབས་རྗེ་མཁོ་ཁྱིམ་རིན་པོ་ཆེ་དང་།  དོན་གྲུབ་གླིང་གཞིས་ཆགས་ཀྱི་འགོ་འཛིན།  སྨིན་གླིང་མཁན་རིན་པོ་ཆེ། དབུས་བོད་ཀྱི་གཞོན་ནུ་ལྷན་ཚོགས་ཀྱི་ཚོཊ་གཞོན། རྒྱ་གར་གྱི་ལུས་སྦྱོང་རྣལ་འབྱོར་བ་ཆེན་པོ་སཝཱ་མི་རམ་དེཝ།  ལྡི་ལི་ནས་ལ་དྭགས་བླ་མ་བློ་བཟང་།  གཞན་ཡང་ས་གནས་བོད་པའི་གཞུང་འབྲེལ་དང་གཞུང་འབྲེལ་མ་ཡིན་པའི་སྒྲིག་འཛུགས་ཁག་གི་སྐུ་ཚབ་དང་། དགོན་སྡེ་ཁག་ཚང་མའི་སྐུ་ཚབ་བཅས་ནས་རྒྱ་རི་རིན་པོ་ཆེ་མཆོག་གི་སྐུ་ཕུང་ལ་མཇལ་དར་ཕུལ་ཡོད་པ་རེད། རིན་པོ་ཆེ་མཆོག་གི་སྐུ་ཕུང་ཞུགས་འབུལ་ཕྱི་ཟླ་༡༡ཚེས་༡༨  བོད་ཟླ་༡༠ཚེས་༡༠ཉིན་གནང་གཏན་འཁེལ་འདུག

གསར་འགོད་པ་རྡོ་རྗེ་མཚོ།