བོད་རང་དབང་ལས་འགུལ་ཚོགས་པས་པེ་ཅིང་གི་ངོ་རྒོལ་བར་རྒྱབ་སྐྱོར་གྱི་འཕྲེད་དར་དཔྱང་འདུག

དབྱིན་ཡུལ་ནང་གི་བོད་རང་དབང་ལས་འགུལ་ཚོགས་པས་པེ་ཅིང་གི་ངོ་རྒོལ་བར་རྒྱབ་སྐྱོར་ཆེད་ལོན་ཌོན་གྱི་(Westminster)་ཟམ་པའི་སྟེང་འཕྲེད་དར་དཔྱང་འདུག
དེ་ཡང་རྒྱ་ནག་དམར་ཤོག་ཏང་གི་ཚོགས་ཆེན་༢༠པ་ཚོགས་རྒྱུར་ཉིན་གྲངས་གསུམ་ལས་མེད་པའི་སྐབས་དང་བསྟུན། ཚེས་༡༣ཉིན་པེ་ཅིན་གྱི་འཁྲུག་ཆ་དོད་པའི་ས་ཁུལ་(Haidian)་རྗོང་གི་(Sitong)་ཞེས་པའི་ཟམ་པའི་སྟེང་། རྒྱ་མི་ཞིག་གིས་སློབ་མཚམས་དང་ལས་མཚམས་བཞག་སྟེ་སྲིད་དབང་སྒེར་གཅོད་ཀྱི་རྒྱལ་འཚོང་ནང་རུལ་པ་ཞི་ཅིང་ཕིང་གནས་དབྱུང་གཏོང་དགོས་ཞེས་འབོད་ཚིག་འདྲ་མིན་བྲིས་བའི་འཕྲེད་དར་ཁག་ཁ་ཤས་དཔྱང་ནས་ངོ་རྒོལ་གྱི་ལས་འགུལ་སྤེལ་བར། འདི་ཚེས་༢༠ཉིན། དབྱིན་ཡུལ་གྱི་བོད་རང་དབང་ལས་འགུལ་ཚོགས་པས་སྣེ་ཁྲིད་འོག་ཁོང་གི་ལས་འགུལ་ལ་རྒྱབ་སྐྱོར་དང་གདུང་སེམས་མཉམ་སྐྱེས་ཆེད། འབོད་ཚིག་གཅིག་པ་འཁོད་པའི་འཕྲེད་དར་ཞིག་དབྱིན་ཡུལ་གྱི་རྒྱལ་སའི་(Westminster)་ཟམ་པའི་སྟེང་དུ་དཔྱང་ཡོད་པ་རེད།
བོད་རང་དབང་ལས་འགུལ་ཚོགས་པའི་བསྟན་འཛིན་ཀུན་དགའ་ལགས་ཀྱིས། འཕྲད་དར་དེ་འཛམ་གླིང་ཐོག་ལས་འགུལ་བ་གཞན་ཚོར་བཏང་ནས། རང་རང་སོ་སོའི་ས་གནས་སུ་གདུང་སེམས་མཉམ་སྐྱེས་ཀྱི་ལས་འགུལ་སྤེལ་ནས། པེ་ཅིང་དུ་བྱུང་བའི་གནས་ཚུལ་དེ་འཛམ་གླིང་ཐོག་ཕྱིར་བསྒྲགས་ཡོང་རྒྱུར་སྐུལ་འདེད་བྱེད་བཞིན་པ་དང་། བོད་པ་ཞིག་ཡིན་པའི་ཆ་ཤས་རྒྱ་ནག་གི་སྲིད་འཛིན་ཞི་ཅིན་ཕིན་གྱི་ཏོག་དབྱིབས་ནད་ཡམས་རྩ་མེད་གཏོང་བ་ཟེར་བའི་སྲིད་ཇུས་དེས། རྒྱ་ནག་གིས་བཙན་བཟུང་བྱས་བསྡད་ཡོད་པའི་བོད་ནང་གི་བོད་མི་སྤུན་ཟླ་ཚོར་དཀའ་སྡུག་ཇི་ཙམ་སྤྲོད་བཞིན་པ་དང་། ཡུ་གུར་མི་རིགས་ཚོར་དཀའ་ངལ་དང་། ཧོང་ཀོང་ནང་གི་རང་དབང་རྩ་བརླག་བཏང་བ་སོགས་ལ་བརྟེན། རྒྱ་ནག་ནང་གི་(Peng)་ཟེར་བའི་ཁེར་རྐྱང་གི་ངོ་རྒོལ་བ་ཁོང་གི་སེམས་ཁམས་དེ་ཤེས་རྟོགས་ཐུབ་ངེས་རེད་ཅེས་གསུང་ཡོད་པ་རེད།
ད་རེས་རྒྱ་ནག་གི་རྒྱལ་ས་པེ་ཅིང་དུ་ནམ་རྒྱུན་མཐོང་དཀོན་པའི་ཞི་ཅིན་ཕིན་ལ་ངོ་རྒོལ་གྱི་གནས་ཚུལ་བྱུང་རྗེས། ཁེར་རྐྱང་ལས་འགུལ་བ་དེར་རྒྱབ་སྐྱོར་ཆེད་རྒྱལ་སྤྱིའི་ཡུལ་གྲུ་གང་སར་ཞི་ཅིན་ཕིན་ལ་ངོ་རྒོལ་གྱི་ལས་འགུལ་སྤེལ་བཞིན་འདུག

གསར་འགོད་པ། ཚེ་བརྟན་རྡོ་རྗེ།
རྩོམ་སྒྲིག་པ། རྡོ་རྗེ་དགྲ་འདུལ།
དྲྭ་ཐོག་རྩོམ་སྒྲིག་པ། དཔལ་ལྡན་རྒྱལ།
དྲྭ་ཐོག་སྤེལ་མཁན། ཀླུ་འབུམ།