ཕ་རན་སིའི་ནང་འཇིགས་སྐུལ་དྲག་སྤྱོད་པས་མི་༡༢༠ལྷག་བསད་ཡོད་པ།

༄༅། །ཉེ་ཆར་ཕ་རན་སིའི་རྒྱལ་ས་པེ་རིསིའི་ས་གནས་ཁག་ཏུ་འཇིགས་སྐུལ་དྲག་སྤྱོད་པས་དྲག་སྤྱོད་ཀྱི་དོན་རྐྱེན་བརྩམས་ཤིང་མི་གྲངས་༡༢༠་རྐྱེན་འདས་སུ་ཕྱིན་པའི་གནས་ཚུལ་དེ་ཐོན་རྗེས། རྒྱ་ནག་གི་སྲིད་འཛིན་ཞིའི་ཅིང་བིང་ནས། རྒྱ་ནག་ཕྱོགས་ནས་ཕ་རན་སི་དང་མཉམ་དུ་འཇིགས་སྐུལ་དྲག་སྤྱོད་པར་རྒོལ་རྡུང་་གཏོང་འདོད་ཡོད་པར་བརྗོད་འདུག
དེའང་ཁ་ས་རེས་གཟའ་སྤེན་པའི་ཉིན་རྒྱ་ནག་གི་སྲིད་འཛིན་ཞིའི་ཅིང་བིང་ནས་ཕ་རན་སིའི་སྲིད་འཛིན་ Fracois Hollande ལ་ཞལ་པར་ཕུལ་ཞིང་། ཞལ་པར་ཐོག་ཞིའི་ཅིང་བིང་ནས་། རྒྱ་ནག་ཕྱོགས་ནས་ཕ་རན་སི་དང་རྒྱལ་སྤྱིའི་སྤྱི་ཚོགས་མཉམ་དུ་བདེ་འཇགས་ཐོག་ཤུགས་སྣོན་རྒྱག་རྒྱུ་དང་འཇིགས་སྐུལ་དྲག་སྤྱོད་རིང་ལུགས་པར་རྒོལ་རྡུང་གཏོང་འདོད་ཡོད་པར་བརྗོད་ཡོད་པ་མ་ཟད་། ད་དུང་རྒྱ་ནག་ཕྱི་འབྲེལ་ལས་ཁང་གི་དྲ་རྒྱའི་ཐོག་སྤེལ་བའི་གནས་ཚུལ་ལྟར་ན། རྒྱ་ནག་གི་སྲིད་འཛིན་ཞིའི་ཅིང་བིང་ནས་ཕ་རན་སིའི་སྲིད་འཛིན་ Fracois Hollande ལ་ཞལ་པར་གནང་སྐབས།  ཁ་སངས་རེས་གཟའ་པ་སངས་ཉིན་གྱི་འཇིགས་སྐུལ་དྲག་སྤྱོད་པའི་གཏོར་རྒོལ་གྱི་བྱ་སྤྱོད་ལ་ཁ་བརྡུངས་བཏང་གནང་ཞིང་། དོན་རྐྱེན་ཐོག་རྐྱེན་འདས་སུ་ཕྱིན་པའི་མི་ཚོར་མྱང་ངན་དང་ཁོང་ཚོའི་ནང་མི་བུ་ཕྲུག་ཚོར་གདུང་སེམས་མཉམ་སྐྱེད་ཀྱི་འཚམས་འདྲི་ཞུས་ཡོད་པ་རེད་འདུག  ཡང་སྤྱི་ཚེས་༡༤ཉིན་པེ་རིསིའི་ཞིབ་དཔྱོད་ཁང་གི་དཔོན་རིགས་ཤིག་ནས་། རེས་གཟའ་པ་སངས་ཉིན་གྱི་དགོངས་དྲོ་འཇིགས་སྐུལ་དྲག་སྤྱོད་པའི་ཚོགས་ཆུང་གསུམ་ནས་པེ་རིསིའི་་གཏོར་རྒོལ་གྱི་བྱ་སྤྱོད་དེ་སྤེལ་ཡོད་པ་དང་། གཏོར་རྒོལ་གྱི་བྱ་སྤྱོད་དེའི་ཁྲོད་ཁྱོན་མི་༡༢༩རྐྱེན་འདས་སུ་ཕྱིན་ཞིང་། དེ་མིན་མི་༣༥༠ཐམས་པར་རྨས་སྐྱོན་བཏང་ཡོད་པར་གསུངས་འདུག་ལ། འཇིགས་སྐུལ་དྲག་སྤྱོད་པས་པེ་རིསི་གྲོང་ཁྱེར་ནང་ཡོད་པའི་ཟ་ཁང་གཅིག་དང་། ཆང་ཁང་གཅིག  རོལ་དབྱངས་གཏོང་ས་གཅིག ལུས་རྩལ་ཐང་ཆེན་གཅིག་བཅས་ཚུད་པའི་ས་གནས་ཁག་ཁ་ཤས་ཤིག་གི་ནང་སྟུད་མར་གཏོར་རྒོལ་གྱི་དོན་རྐྱེན་བརྩམས་ཡོད་པ་དང་། ཉེན་རྟོག་པས་གཏོར་རྒོལ་གྱི་བྱ་སྤྱོད་སྤེལ་མཁན་མི་བདུན་བསད་ཡོད་པ་དང་། དེ་མིན་དོན་རྐྱེན་དེ་དང་འབྲེལ་བ་ཡོད་པར་དྭོགས་པའི་མི་གསུམ་ཁ་ས་རེས་གཟའ་སྤེནཔའི་ཉིན་འཛིན་བཟུང་བྱེད་ཐུབ་ཡོད་པ་རེད་འདུག།

གསར་འགོད་པ་ཀུན་བཟང་རིག་འཛིན།