རྒྱལ་སྤྱིའི་ཧི་མ་ལ་ཡའི་རི་རྒྱུད་ཀྱི་ནང་པའི་ལྷན་ཚོགས་སྐོར།

༄༅༎རྒྱལ་སྤྱིའི་ཧི་མ་ལ་ཡའི་རི་རྒྱུད་ཀྱི་ནང་པའི་ལྷན་ཚོགས་ཐེངས་དང་པོ་དེ་སྟོན་པ་སངས་རྒྱས་བཅོམ་ལྡན་འདས་སྐུ་བལྟམས་པའི་ཡུལ་གནས་མཆོག་ལུམ་བི་ནིར་ ཕྱི་ཟླ་ ༡༡ ཚེས་ ༢༢ ནས་ ༢༤ བར་ཚུགས་འདུག།
ལྷན་ཚོགས་དེའི་ཐོག་ དགའ་ལྡན་ཁྲི་པ་སྐྱབས་རྗེ་རི་རྫོང་རིན་པོ་ཆེ་དབུས་སོག་པོའི་མཁན་པོ་བླ་མ་ཆོས་ཀྱི་རྒྱ་མཚོ་དང་ར་ཤི་ཡའི་མངའ་འོག་ནང་པའི་ཡུལ་གྲུ་ཀལ་མིཀ་ཀྱི་དབུ་བླ་ཏེ་ལོ་རིན་པོ་ཆེ་གཞན་ཡང་ལ་དྭགས་དང་ ཁུ་ནུ་ སྤི་ཏི་ ཟངས་དཀར་ འབྲས་ལྗོངས་ མོན་ བལ་ཡུལ་ཁུལ་གྱི་ནང་པའི་སྐུ་ཚབ་དང་ དེ་བཞིན་མཁན་པོ་དང་བླ་མ་  དགེ་བཤེས་དང་མཁས་དབང་ མི་སྣ་སོགས་མཉམ་ཞུགས་གནང་ཡོད་འདུག།
ཧི་མ་ལ་ཡའི་རི་བརྒྱུད་ནང་པའི་ཡུལ་གྲུ་དེ་དག་ནང་གི་ནང་པ་ཚོ་ནི་དཔལ་ན་ལེན་ཌའི་བཞེད་པ་རྒྱུན་འཛིན་གནང་མཁན་ བོད་བརྒྱུད་ནང་པ་ཤ་སྟག་ཡིན་པ་དང་ ལྷན་ཚོགས་དེའི་ཐོག་ནས་གཏེན་བེབས་གནང་པའི་གྲོས་ཆོད་ཀྱི་ནང་ མི་ཐོག་མང་པོའི་རིང་སྤྱི་ཚོགས་ནས་ཟུར་འབུད་བྱས་པ་དང་ རང་རང་སོའི་རིག་གཞུང་ཉམས་རྒུད་སོང་བ། ཤེས་ཡོན་དང་འཕྲོད་བསྟེན་ འཕེལ་རྒྱས་དང་ སྤྱི་ཚོགས་ཀྱི་ནང་འདྲ་མཉམ་ཐོབ་ཐང་མ་སྤྲད་པ་སོགས་ཀྱི་དཀའ་སྡུག་མྱང་པའི་ཧི་མ་ལ་ཡའི་རི་བརྒྱུད་ཀྱི་ནང་པའི་ཡུལ་མི་ཚོར་ སྤྱི་ཚོགས་ཀྱི་ནང་འདྲ་མཉམ་གྱི་ཐོབ་ཐང་དགོས་པ་དང་ སོ་སོའི་གནས་ཡུལ་རྒྱལ་ཁབ་དང་ དེ་བཞིན་འཛམ་གླིང་མཉམ་འབྲེལ་རྒྱལ་ཚོགས་ཀྱི་གདོད་མའི་མི་རིགས་ཀྱི་ཐོབ་ཐང་གསལ་བསྒྲགས་ཁྲིམས་ཡིག་ཚུད་པའི་ རྒྱལ་སྤྱིའི་ཁྲིམས་ཡིག་མང་དག་ཞིག་གི་ནང་གསལ་བའི་ སོ་སོའི་རིག་གཞུང་མི་ཉམས་རྒྱུན་འཛིན་བྱེད་དབང་གི་ཐོབ་ཐང་ཁག་སླར་གསོ་དགོས་རྒྱུ་གསལ་ཡོད་ཅིང༌།
དེ་བཞིན་མུ་འཐུད་གྲོས་ཆོད་དེའི་ནང་གནས་མཆོག་ལུམ་བི་ནིའི་འཕེལ་རྒྱས་འཛུགས་བསྐྲུན་ལས་གཞི་ཇི་སྙེད་གཅིག་སྤེལ་ཡང་ དེའི་ནང་བལ་ཡུལ་གྱི་ནང་པ་ཚོར་དམིགས་བསལ་འགོ་འཁྲིད་ཀྱི་འོས་འགན་དགོས་པ་དང་ ལྷག་པར་དུ་ལས་དོན་ཚོགས་ཆུང་འདྲ་མིན་གྱི་ནང་བལ་ཡུལ་གྱི་ནང་པའི་འཐུས་ཚབ་མང་བ་དགོས་རྒྱུ་ཡང་འཁོད་ཡོད་པ་རེད།
ཡང་རྒྱལ་སྤྱིའི་ཧི་མ་ལ་ཡའི་རི་བརྒྱུད་ཀྱི་ནང་པའི་ལྷན་ཚོགས་ཐེངས་དང་པོ་འདིའི་གྲོས་ཆོད་ཀྱི་ནང་ཧི་ལ་མ་ཡའི་རི་རྒྱུད་ཁུལ་དུ་དཔལ་ན་ལེན་ཌའམ་བོད་བརྒྱུད་ནང་བསྟན་གྱི་ཁྱབ་པའི་ས་ཁུལ་གྱི་ནང་ བོད་ཡིག་མི་ཉམས་རྒྱུན་འཛིན་དང་སྲུང་སྐྱོབ་བྱེད་དགོས་པ་དང་དགོན་སྡེ་ཁག་ནང་གི་གྲྭ་བཙུན་ཚོར་ཚད་ལྡན་ནང་པའི་གཞུང་ལུགས་ཀྱི་སློབ་གཉེར་སྤྲོད་དགོས་པ་སོགས་འཁོད་ཡོད་འདུག།