བྱང་ཨ་རིའི་བོད་མིའི་སྤྱི་འཐུས་ཞབས་སྟེགས་མང་དུ་གཏོང་གཏན།

༄༅༎བོད་མི་མང་སྤྱི་འཐུས་ལྷན་ཚོགས་ནས་བྱང་ཨ་རི་ཁུལ་གྱི་བོད་མིའི་སྤྱི་འཐུས་ཀྱི་ཞབས་སྟེགས་མང་དུ་གཏོང་རྒྱུའི་གྲོས་ཆོད་གཏན་འབེབས་བྱུང་ཡོད་པའི་གནས་ཚུལ་ཐོན་འདུག་༎

དེ་ཡང་ཚེས་༩ཉིན་བཙན་བྱོལ་བོད་གཞུང་གི་དྲ་རྒྱའི་ཐོག་གནས་ཚུལ་བཀོད་པར་གཞིགས་ན་ དེང་བཞུགས་སྒར་རྡ་རམ་ས་ལར་ལྷན་ཚོགས་གནང་བཞིན་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བཅུ་པའི་ཐོག་ཨ་རི་དང་ཀེ་ན་ཌ་གཅིག་ཏུ་སྒྲིལ་བའི་བྱང་ཨ་རི་ཁུལ་ནས་ད་ཡོད་སྤྱི་འཐུས་ཀྱི་ཞབས་སྟེགས་གཅིག་ནས་གཉིས་བར་མང་དུ་གཏོང་རྒྱུའི་གྲོས་འཆར་དེར་ བོད་མི་མང་སྤྱི་འཐུས་རྣམ་པ་ཚོས་ མང་མོས་རྒྱབ་སྐྱོར་ཐོག་ནས་གྲོས་ཆོད་གཏན་འབེབས་བྱུང་ཡོད་པ་རེད་

བོད་མི་མང་སྤྱི་འཐུས་ལྷན་ཚོགས་ནང་བྱང་ཨ་རིའི་བོད་མིའི་སྤྱི་འཐུས་ཀྱི་ཞབས་སྟེགས་མང་དུ་གཏོང་རྒྱུའི་གྲོས་འཆར་དེ་བཞིན་བྱང་ཨ་རིའི་སྤྱི་འཐུས་བསྟན་འཛིན་ཆོས་ལྡན་ལགས་ཀྱིས་སྟོན་ཡོད་པ་རེད་ སྤྱི་འཐུས་བསྟན་འཛིན་ཆོས་ལྡན་ལགས་ཀྱིས་ཨ་རི་དང་ཀེ་ན་ཌ་གཉིས་ཐེ་བས་བྱང་ཨ་རི་ཁུལ་དུ་བོད་མིའི་གྲངས་འབོར་༣༠༠༠༠ལྷག་ཡོད་པ་དང་ ས་གནས་བོད་མིའི་སྤྱི་མཐུན་ཚོགས་པ་ཡང་ཁག་སུམ་ཅུ་ཙམ་ཡོད་སྟབས་ ཨ་རི་དང་ཀེ་ན་ཌ་རྒྱལ་ཁབ་གཉིས་ནས་བོད་མི་མང་སྤྱི་འཐུས་ལྷན་ཚོགས་ནང་བོད་མིའི་སྤྱི་འཐུས་ཀྱི་ཞབས་སྟེགས་ལོགས་སུ་དགོས་གལ་སྐོར་བསྐྱར་བཅོས་ཀྱི་གྲོས་འཆར་ཡང་བཏོན་གནང་འདུག ཡིན་ཡང་གྲོས་འཆར་དེར་བོད་མི་མང་སྤྱི་འཐུས་༢༤ཡིས་རྒྱབ་སྐྱོར་དང་སྤྱི་འཐུས་བཞི་ཡིས་མོས་མཐུན་མ་ཞུས་པའི་དབང་གིས་སྤྱི་འཐུས་གསུམ་ཆ་གཉིས་ཀྱི་མང་མོས་རྒྱབ་སྐྱོར་ཁ་ལོངས་བྱུང་མེད་པར་སོང་གྲོས་འཆར་ལམ་ལྷོང་བྱུང་མེད་པ་རེད་༎