ཉི་ཧོང་གི་སྲིད་བློན་ཟུར་པ་ཐེ་ལྦན་དུ་འཚམས་གཟིཌ་སུ་ཕེབས་པ།

༄༅༎ཉི་ཧོང་གི་སྲིད་བློན་ཟུར་པ་སྐུ་ཞབས་ཤིན་ཛོ་ཨ་སྦེ་མཆོག་དེ་རིང་རེས་གཟའ་ཉི་མའི་ཉིན་ཐེ་ལྦན་དུ་འཚམས་འདྲིར་ཕེབས་ཐོན་གནང་ཡོད་པ་ནི། ཉི་ཧོང་དང་རྒྱ་ནག་བར་ལ་ཤར་རྒྱ་ནག་གི་རྒྱ་མཚོའི་ནང་དུ་ཡོད་པའི་གླིང་ཕྲན་གི་བདག་དབང་རྩོད་གཞིའི་གནད་དོན་དེའི་ཐོག་ཐེ་ལྦན་དང་གྲོས་མོལ་བྱ་རྒྱུའི་འཆར་གཞི་ཡོད་སྲིད་པའི་ངོས་འཛིན་བྱེད་ཀྱི་ཡོད་པ་རེད།

སྲིད་བློན་ཟུར་པ་སྐུ་ཞབས་ཤིན་ཛོ་ཨ་སྦེ་མཆོག་གིས་ཉི་ཧོང་གི་རྒྱལ་ས་ཀྲོག་ཡོ་ནང་དུ་ཡོད་པའི་ཧ་ནེ་ཌ་གནམ་ཐང་ནས་ཐེ་ལྦན་གྱི་རྒྱལ་ས་ཐེ་ཕེ་ནང་གི་སུང་ཧྲན་གནམ་ཐང་བར་གསར་དུ་སྒོ་མོ་ཕྱེ་བའི་མཁའ་ལམ་བརྒྱུད་ཐེ་ལྦན་དུ་འཚམས་འདྲི་ཕེབས་འབྱོང་བྱུང་ཡོད་ཅིང༌། དེ་རིང་ཕྱི་དྲོ་ཐེ་ལྦན་གྱི་སྲིད་འཛིན་མའ་དབྱིང་ཅོ་དང་མཇལ་འཕྲད་གནང་རྒྱུ་ཡིན་པ་དང༌། ཡིན་ནའང་ཁོང་རྣམ་གཉིས་ཀྱི་མཇལ་འཕྲད་སྐབས། ཉི་ཧོང་དང་ཐེ་ལྦན། རྒྱ་ནག་བར་ལ་ཤར་རྒྱ་ནག་རྒྱ་མཚོའི་བདག་དབང་གི་རྩོད་ལེན་བྱེད་པའི་གནད་དོན་དེའི་ཐོག་ལ་གླེང་སློང་གནང་གི་ཡོད་མེད་གནས་ཚུལ་ཁ་གསལ་པོ་མེད་པ་རེད། ཡིན་ནའང་སྐུ་ཞབས་ཨ་སྦེ་ཕྱི་ཟླ་བཅུ་པའི་འགོ་སྟོད་དུ་ཨ་མེ་རི་ཀའི་རྒྱལ་ས་ལྦ་ཤིང་ཀྲོན་དུ་འཚམས་འདྲིར་ཕེབས་པའི་སྐབས། དེ་སྔ་འཇར་མ་ནིའི་ན་ཛི་དུས་རབས་ཀྱི་དབང་བསྒྱུར་བྱེད་སྟངས་ལུང་འདྲེན་བྱས་ཏེ་རྒྱ་ནག་གི་འདོད་རྔམ་ལ་སྐྱོན་བརྗོད་བྱེད་མྱོང་ཡོད་པ་རེད། ཉི་ཧོང་དང་རྒྱ་ནག་གྱི་ཕྱི་འབྲེལ་གྱི་འབྲེལ་ལམ་བར་ལམ་ཞིག་ནས་ཇེ་སྡུག་ཏུ་ཕྱིན་ཡོད་པ་ནི། ཁ་སྔོན་ཕྱི་ཟླ་དགུ་པའི་ནང་ཉི་ཧོང་གཞུང་གིས། ཕྱོགས་གཉིས་བར་ལ་བདག་དབང་གི་རྩོད་གཞིར་གནས་པའི་ཤར་རྒྱ་ནག་གི་རྒྱ་མཚོའི་ཐོག་ནས་རྒྱ་ནག་གི་ཉ་འཛིན་གྲུ་འཛིངས་ཀྱི་གྲུ་དཔོན་འཛིན་བཟུང་བྱས་ཏེ་བཀག་ཉར་བྱས་པའི་གནད་དོན་གྱིས་རྐྱེན་པས་འབྲེལ་ལམ་ཛ་དྲག་ཏུ་ཕྱིན་ཡོད་ཅིང༌། ཉི་ཧོང་དང་ཐེ་ལྦན། རྒྱ་ནག་གསུམ་གྱིས་བདག་དབང་གི་རྩོད་གཞིའི་གླིང་ཕྲན་དེར་རྒྱ་ནག་གིས་ཏའོ་ཡུའུ་ཟེར་བ་དང། ཉི་ཧོང་གི་སེན་ཀ་ཀུ་ཞེས་འབོད་ཀྱི་ཡོད་པ་མ་ཟད། གླིང་ཕྲན་གནས་ཡུལ་གྱི་རྒྱ་མཚོའི་དེ་ནི་ཉའི་ཐོན་ཁུངས་ཆེན་པོ་ཡོད་པའི་ཁར་སྣུམ་དང་རང་འབྱུང་གི་གཏེར་ཁའི་ཐོན་ཁུངས་ཕྱུག་པོ་ལྡན་པ་ཞིག་ཡིན་པར་ངོས་འཛིན་བྱེད་ཀྱི་ཡོད་པ་རེད།