ཡོ་རོབ་གྲོས་ཚོགས་ཀྱིས་རྒྱ་ནག་གཞུང་ལ་སྐྱོན་བརྗོད་གནང་བ།

རྒྱ་ནག་གཞུང་གིས་བོད་ཀྱི་འགྲོ་བ་མིའི་ཐོབ་ཐང་རྩིས་མེད་རྡོག་རོལ་གཏོང་བཞིན་ཡོད་པར་ཡོ་རོབ་གྲོས་ཚོགས་ཀྱིས་སྐྱོན་བརྗོད་གནང་ཡོད་པ་རེད།
དེ་ཡང་ཁ་ས་ཕྱི་ཚེས་༡༦་ཉིན་ཡོ་རོབ་གྲོས་ཚོགས་ནང་། ཡོ་རོབ་མཐུན་ཚོགས་དང་། རྒྱ་ནག་གི་འབྲེལ་ལམ་ཞེས་པའི་གནད་དོན་ཐོག་སྙན་ཐོ་འདོན་སྤེལ་གནང་བའི་སྐབས། བོད་དང་། རྒྱ་ནག ཤར་ཏུ་ཀི་སི་ཏན་སོགས་ཀྱི་ནང་འགྲོ་བ་མིའི་ཐོབ་ཐང་གི་གནས་སྟངས་ཇེ་སྡུག་ཏུ་འགྲོ་བཞིན་ཡོད་པའི་སྐོར་སྐྱོན་བརྗོད་ཤུགས་ཆེ་བྱུང་ཡོད་པ་རེད།
སྙན་ཐོ་དེ་བཞིན་ཡོ་རོབ་གྲོས་ཚོགས་ཀྱི་ཕྱི་འབྲེལ་ཚན་པའི་ཚོགས་ཆུང་ནས་གྲ་སྒྲིག་གནང་ཡོད་ཅིང་། དེའི་ཐོག་བོད་ནང་འགྲོ་བ་མིའི་ཐོབ་ཐང་གི་གནས་སྟངས་ཇེ་ཞན་ཇེ་སྡུག་ཏུ་འགྲོ་བཞིན་ཡོད་པའི་སྐོར་གནས་ཚུལ་ཁ་གསལ་བཀོད་གནང་ཡོད་པ་ནི་རྒྱ་ནག་གཞུང་གིས་བོད་ཐོག་འཛིན་བཞིན་པའི་དྲག་པོའི་སྲིད་ཇུས་ལ་ངོ་རྒོལ་ཆེད་ཕྱི་ལོ་༢༠༠༩་ལོའི་ཕྱི་ཟླ་གཉིས་པ་ནས་འགོ་བཙུགས་ཀྱིས་ད་བར་བོད་མི་༡༤༢་ཙམ་གྱིས་སྐུ་ལུས་མེར་སྲེག་བཏང་གནང་བའི་ཐོག་ནས་གསལ་པོ་ཤེས་དགོས་པ་ཞིག་རེད་ཅེས་དང་། དེའི་ཐད་ཐུགས་ཚབས་ཆེན་པོ་ཡོད་པ་སོགས་ཀྱི་གནས་ཚུལ་སྙན་ཐོ་དེའི་ནང་བཀོད་གནང་ཡོད་པ་རེད།
ད་དུང་སྙན་ཐོ་དེའི་ནང་རྒྱ་ནག་གཞུང་གིས་བོད་ནང་མུ་མཐུད་དམ་དྲག་གི་སྲིད་བྱུས་འཛིན་བཞིན་པ་དང་། ༧གོང་ས་སྐྱབས་མགོན་ཆེན་པོ་མཆོག་གིས་བཏོན་གནང་བའི་དབུ་མའི་ལམ་གྱི་སྲིད་བྱུས་དེ་རང་བཙན་རྩོད་ལེན་དང་། ཁ་བྲལ་རིང་ལུགས་པའི་བྱ་སྤྱོད་ཡིན་པ་བརྗོད་པ་དང་། དེ་བཞིན་བོད་ནང་གི་སློབ་གྲ་ཁག་ཏུ་རྒྱ་ཡིག་གཙོ་བོར་འཛིན་དགོས་པའི་རྒྱ་ནག་གཞུང་གིས་འཆར་གཞི་དང་། སྲིད་བྱུས་ལ་སྐྱོན་བརྗོད་དང་། རྒྱ་ནག་གཞུང་གིས་བོད་ཐོག་འཛིན་བཞིན་པའི་བྱ་སྤྱོད་དེར་ཡོ་རོབ་སྤྱི་མཐུན་རྒྱལ་ཁབ་ནས་ཐུགས་ཚབས་ཆེན་པོ་ཡོད་པ་སོགས་སྙན་ཐོ་དེའི་ནང་བཀོད་གནང་ཡོད་པ་རེད།

གསར་འགོད་པ་དབྱངས་སྒྲོན།