ཇོ་མོ་གླང་མའི་ཁོར་ཡུག་ཆེད་ཕྲལ་སེལ་གསང་གཅོད་དགོས་གལ།

• 
  2011-10-13

༄༅༎ཁོར་ཡུག་སྲུང་སྐྱོབ་ཚོགས་པ་ཞིག་གིས་བལ་ཡུལ་གཞུང་ལ་རི་བོ་ཇོ་མོ་གླང་མའི་རི་རྩེར་འཛེགས་མཁན་ཚོའི་ཆེད་དུ་སྤོ་འཁྱེར་བདེ་བའི་ཕྲལ་སེལ་གསང་སྤྱོད་བཟོ་རྒྱུའི་བསམ་གཞིགས་གནང་དགོས་པའི་སྐོར་གསུང་འདུག།
ཨེ་ཁོ་ཧི་མལ་(Eco Himal)ཞེས་པའི་ཁོར་ཡུག་སྲུང་སྐྱོབ་ཚོགས་པས་ ལོ་ལྟར་བལ་ཡུལ་ཕྱོགས་ཀྱི་ ཇོ་མོ་གླང་མའི་ལྷོ་ངོས་རྟེན་གཞི་ནས་ རི་རྩེར་འཛེགས་སྐྱོད་བྱེད་མཁན་རི་འཛེགས་པ་སྟོང་ཕྲག་འགའ་ཤས་ཡོད་པ་དེ་ཚོ་དང་ཁོང་ཚོའི་དོ་པོ་འོར་མཁན་ཚོའི་ཆེད་དུ་ཕྲལ་སེལ་གསང་སྤྱོད་བཟོས་པ་ཡིན་ན། ཇོ་མོ་གླང་མའི་ཁོར་ཡུག་གཙང་མ་འཇོག་རྒྱུར་ཕན་ཐོགས་ངེས་ཅན་ཞིག་ཡོང་རྒྱུ་ཡིན་སྐོར་གསུངས་བཞག།
ཨེ་ཁོ་ཧི་མལ་ཚོགས་པའི་ངེས་སྟོན་པ་ཕུན་ཚོགས་ཤར་པ་ཡིས་ ཕྱི་རྒྱལ་གྱི་རི་འཛེགས་ཚོགས་པ་ཚོས་ སྟབས་བདེའི་གསང་སྤྱོད་ལྕགས་ཀྲིན་མཉམ་འཁྱེར་བྱེད་སྲོལ་ཡོད་ནའང༌། ཁོང་ཚོའི་དོ་པོ་འོར་མཁན་གླ་མི་ཚོ་ཉེ་འཁྲིས་གངས་ཀྱི་དཀྱིལ་ལ་གཙོག་གཅིན་གཏོང་རྒྱུ་མ་གཏོགས་ཐབས་ཤེས་གཞན་མེད་སྟབས། ཇོ་མོ་གླང་མའི་ཁོར་ཡུག་ལ་སྦག་གཙོག་ཤོར་གྱི་ཡོད་སྟབས། སྤྱི་སྤྱོད་གསང་གཅོད་ངེས་པར་དུ་དགོས་ཀྱི་འདུག་ཅེས་འགྲེལ་བརྗོད་བྱས་འདུག།
ཁོར་ཡུག་སྲུང་སྐྱོབ་དོན་གཉེར་བ་ཚོས་གསུངས་ན། དེ་སྔོན་རི་འཛེགས་བྱེད་མཁན་ཚོས་ རི་བོ་ཇོ་མོ་གླང་མའི་གཡས་གཡོན་གད་སྙིགས་མང་པོ་བཟོ་གི་ཡོད་པ་དང༌། རི་འཛེགས་སྐབས་སྲོག་སྐྱོན་བྱུང་བའི་མིའི་ཕུང་པོ་དེ་ཚོ་གནམ་གཤིས་གྲངས་ངར་ཆེ་བའི་རྐྱེན་གྱིས་རུལ་ནས་གཙང་མ་ཆགས་ཡག་ལ་ལོ་བཅུ་ཕྲག་འགའ་ཤས་འགོར་གྱི་ཡོད་པ་རེད།
རི་བོ་ཇོ་མོ་གླང་མའི་འདབས་རོལ་གསང་སྤྱོད་བཟོ་རྒྱུའི་འཆར་གཞི་དེ་བལ་ཡུལ་གཞུང་གི་གད་སྙིགས་གཙང་སེལ་འཆར་གཞི་ཁུངས་གཏོགས་གྲོས་བསྡུར་གནང་རྒྱུ་ཡིན་ལུགས་ཕུན་ཚོགས་ཤར་པས་འགྲེལ་བརྗོད་བྱས་འདུག།