བོད་མི་དམངས་སྐབས་བཅུ་བདུན་པའི་སྤྱི་འཐུས་རྣམ་པའི་དམ་འབུལ་དང་ཚོགས་འདུ་ཕར་འགྱངས་གནང་འདུག

ཕྱི་ཟླ་ ༥ ཚེས་ ༢༨ ཉིན་རྒྱ་གར་ཧི་མ་ཅལ་མངའ་སྡེའི་གཞུང་གིས་ཏོག་དབྱིབས་ནད་ཡམས་སྔོན་འགོག་ཆེད་ཁྱིམ་སྡོད་བཀག་རྒྱ་ཕྱི་ཟླ་ ༦ ཚེས་ ༧ བར་བྱེད་དགོས་པའི་བཀའ་རྩ་གསལ་བསྒྲགས་བྱས་ཤིང་། ཐོག་མར་ལྟར་ན་སྐབས་བཅུ་བདུན་པའི་བདམས་ཐོན་སྤྱི་འཐུས་རྣམ་པས་ཕྱི་ཚེས་ ༢༩ ཉིན་འབྱོར་ཐོ་གནང་སྟེ། ཕྱི་ཚེས་ ༣༠ ཉིན་དམ་འབུལ་གནང་རྒྱུ་སྤྱི་འཐུས་ཚོགས་དྲུང་ཡིག་ཚང་གིས་གསལ་བསྒྲགས་སྔོན་སོང་ལྟར་ན་ཡང་། ཕྱི་ཚེས་ ༢༩ ཕྱི་དྲོ་སླར་ཡང་ཚོགས་དྲུང་ཡིག་ཚང་ནས་གསལ་བསྒྲགས་གསར་པ་ཞིག་གནང་པ་དེའི་ནང་། དབུས་འོས་བསྡུ་ལྷན་ཁང་དང་བཀའ་བསྡུར་གྱིས་སྤྱི་འཐུས་གསར་པའི་དམ་འབུལ་དང་ཚོགས་འདུ་ཕྱི་ཟླ་ ༦ ཚེས་ ༨ བར་ཕར་འགྱངས་གནང་རྒྱུ་ཡིན་པ་བཀོད་འདུག

གསལ་བསྒྲགས་དེའི་ནང་། ཕྱི་ཚེས་ ༨ ཉིན་སྤྱི་འཐུས་ལྷན་ཚོགས་ཀྱི་བར་བརྒལ་ཚོགས་གཙོས་ཁྲིམས་ཞིབ་པ་ཆེ་བའི་མདུན་དུ་ལས་ཁུར་དམ་འབུལ་གནང་རྒྱུ་དང་། དེ་རྗེས་སྐབས་བཅུ་བདུན་པའི་བདམས་ཐོན་སྤྱི་འཐུས་རྣམ་པས་བར་བརྒལ་ཚོགས་གཙོའི་མདུན་དུ་ལས་ཁུར་དམ་འབུལ་ཞུ་རྒྱུ་ཡིན་འདུག་ཅིང་། ཕྱི་ཟླ་ ༦ ཚེས་ ༨ ཉིན་རྒྱབ་སྤྱི་འཐུས་སྐབས་བཅུ་བདུན་པའི་ཚོགས་གཙོ་དང་ཚོགས་གཞོན་འོས་འདེམས་གནང་རྒྱུ་ཡིན་པ་བཀོད་འདུག

ཕྱི་ཚེས་ ༩ ཉིན་འདེམས་ཐོན་ཚོགས་གཙོ་དང་ཚོགས་གཞོན་རྣམ་གཉིས་ནས་ཁྲིམས་ཞིབ་ཆེ་བའི་མདུན་དུ་ལས་འཁུར་དམ་འབུལ་ཞུ་རྒྱུ་ཡིན་འདུག