མི་རིགས་དང་སྤྱི་ཚོགས་ཀྱི་འབྱུང་འགྱུར་དགེ་རྒན་ལ་རག་ལུས་ཡོད། ཟམ་གདོང་རིན་པོ་ཆེས།

མི་རིགས་དང་སྤྱི་ཚོགས་ཀྱི་འབྱུང་འགྱུར་གྱི་གནས་བབས་དེ་ཤེས་ཡོན་སློབ་གསོ་ལ་རག་ལུས་ཡོད་པ་དང་ཤེས་ཡོན་སློབ་གསོ་དེ་དགེ་རྒན་ལ་རག་ལུས་ཡོད་པ་སློབ་དཔོན་ཟམ་གདོང་རིན་པོ་ཆེ་མཆོག་གིས་གསུངས་འདུག
དེ་ཡང་ཤེས་རིག་ལས་ཁུངས་ཀྱིས་སྐོང་ཚོགས་གནང་བའི་ཤེས་རིག་ཚོགས་ཆེན་ཐེངས་བདུན་པའི་ཉིན་གསུམ་པ་འདི་ཚེས་༢༥ཉིན། བོད་མིའི་སྒྲིག་འཛུགས་ཀྱི་བཀའ་བློན་ཁྲི་ཟུར་སློབ་དཔོན་ཟམ་གདོང་རིན་པོ་ཆེ་མཆོག་གིས་དགེ་རྒན་གྱི་ལས་གནས་ནི་ལས་ཚན་གཞན་ལས་ཁྱད་དུ་འཕགས་པ་དགོས་པའི་རྒྱུ་མཚན་དང་དགེ་རྒན་གྱི་ཀུན་སྤྱོད་དང་འགན་འཁུར་གནང་ཕྱོགས་དང་འབྲེལ་བའི་བརྗོད་གཞིའི་སྐོར་བཀའ་སློབ་གནང་སྐབས། ཆབ་སྲིད་དང་འཛུགས་སྐྲུན་གྱི་ལས་གཞི་ལག་བསྟར་སྐབས་མི་རིགས་དང་སྤྱི་ཚོགས་ཀྱི་འབྱུང་འགྱུར་གྱི་གནས་འབབས་ལ་ཁྱད་པར་བཟོ་ཐུབ་པའི་ནུས་པ་མེད་པ་ཀྱང་།  ཤེས་ཡོན་གྱི་སློབ་གསོའི་ཐོག་ཞན་ཆ་བྱུང་བ་ཡིན་ན་མི་རིགས་དེའི་སྤྱི་དོན་དང་འབྲེལ་བའི་འབྱུང་འགྱུར་གྱི་གནས་འབབས་ལ་ཁྱད་པར་འགྲོ་བའི་ནུས་པ་ཡོད་པར་བརྟེན།  དགེ་རྒན་ཚོར་སློབ་ཕྲུག་གི་ཞན་ཆ། ཕ་མའི་ཞན་ཆ། དགེ་རྒན་རང་ཉིད་ཀྱི་ཞན་ཆ། སྤྱི་ཚོགས་ཀྱི་ཞན་ཆ་སོགས་དགེ་རྒན་ཚོས་སེལ་ཐུབ་པ་ཞིག་ཡིན་སྟབས། ལས་ཀ་དེ་ཁྱད་དུ་འཕགས་པ་ཞིག་ཡིན་པ་གསུངས་འདུག
ཡང་རིན་པོ་ཆེ་མཆོག་གིས། དོན་ལ་དགེ་རྒན་ཞེས་པའི་གོ་དོན་དེང་རབས་ཀྱི་ལན་སྐྱེལ་མཁན་གྱི་རྒྱུད་ལམ་ལྟ་བུ་ཞིག་ངོས་འཛིན་བྱེད་ཡོད་དེ་ལྟར་མ་ཡིན་པར། སློབ་ཕྲུག་ལ་བྱ་བ་གང་ཞིག་ཡང་དག་འམ་ཡང་དག་པ་མ་ཡིན་པ་བཅོས་ཐུབ་མཁན་ཞིག་དང་རིག་པའི་གནས་ལ་སློབ་ཕྲུག་ལས་ཕྱུག་པ་དང་རྒན་པ་ཡིན་པའི་ཆ་ནས་སློབ་ཚན་དེ་སོ་རང་ཉིད་ནས་ཆ་ཚང་ཤེས་པ་ཞིག་དགོས་པ་མ་ཟད་གྲོགས་པའི་འདུ་ཤེས་དང་བརྩེ་སེམས་ཀྱི་ཐོག་ནས་སློབ་ཁྲིད་གནང་དགོས་ཀྱི་རེད་ཅེས་གསུངས་ཡོད་ལ། ཡང་དགེ་རྒན་གྱི་མིང་གཞན་ཡོངས་འཛིན་ཞེས་པ་དེ་ནི་སློབ་ཕྲུག་གི་ལུས་ངག་ཡིད་གསུམ་གྱི་དགོས་མཁོ་གང་ཡང་རུང་བ་ཞིག་ཆ་ཚང་བ་ཞིག་འགྲུབ་ཐུབ་མཁན་ཞིག་དང་། དེ་བཞིན་སློབ་ཕྲུག་གི་སེམས་མ་ཞུམ་པ་བཟོ་ཡག སློབ་སྦྱོང་ལ་སྤྲོ་སྣང་དང་དོ་དབྱིངས་སྐྲུན་ཐབས་བྱེད་ནས་སློབ་སྦྱོང་དངའབྲེལ་བའི་དཀའ་ངལ་གང་འདྲི་ཞིག་ཡོད་ཀྱང་དེ་སེལ་དགོས་པའི་འགན་དེ་དགེ་རྒན་ཚོར་ཡོད་པ་གསུངས་ཡོད་པ་རེད།
ལྷག་པར་དུ་སློབ་ཕྲུག་ཚོ་སྤྱི་ཚོགས་ཀྱི་གཡོག་པོ་ལྟ་བུ་བཟོ་རྒྱུར་མ་བལྟ་བར་ཁོང་ཚོ་སྤྱི་ཚོགས་ལ་ཕན་ཐོག་བྱེད་མཁན་ཞིག་བཟོ་ཐུབ་མཁན་ཞིག་ཏུ་ངོས་འཛིན་བྱ་རྒྱུ་ནི་ཧ་ཅང་གི་གལ་ཆེ་ཡིན་པ་གསུངས་འདུག