ཨོ་སི་ཀྲོ་ལི་ཡའི་རྒྱ་ནག་གཞུང་ཚབ་ཁང་ལ་ལྷམ་གཡུགས་ཡོད་པ།

༄༅༎ཁ་ས་ཨོ་སི་ཀྲོ་ལི་ཡའི་ནང་གནས་བཞུགས་བོད་མི་ཞིག་གིས་རྒྱ་ནག་གཞུང་ཚབ་ཁང་ལ་ཆབ་ཆེན་གྱིས་ཁེངས་པའི་ལྷམ་གཡུགས་ནས་རྒྱ་ནག་གཞུང་གིས་བོད་བཅིངས་བཀྲོལ་བཏང་བ་ཟེར་བའི་དུས་ཆེན་སྲུང་བརྩིར་ངོ་རྒོལ་ཡོད་པའི་རྣམ་པ་ཤུགས་ཆེ་བསྟན་འདུག

ཨེ་སྦི་སི་ཞེས་ཨོ་སི་ཀྲོ་ལི་ཡའི་རྒྱལ་ཡོངས་རླུང་འཕྲིན་ཁང་གིས་གནས་ཚུལ་སྤེལ་དོན་ལྟར་ན་རྒྱ་མིའི་བཙན་དབང་ལ་བོད་མི་མང་གིས་རང་དབང་སྒེར་ལངས་གནང་སྟེ་ལོ་ལྔ་བཅུ་འཁོར་བ་དང་བསྟུན་ནས་རྒྱ་ནག་གཞུང་གིས་ཁ་ས་བོད་ཀྱི་ཞིང་བྲན་ཁྲི་ཚོ་བརྒྱར་བཅིངས་བཀྲོལ་ཐོབ་པའི་ཉིན་ཟེར་བའི་གསར་གཏོད་ཀྱི་དུས་ཆེན་དེ་སྲུང་བརྩི་བྱས་པ་མ་ཟད་བོད་སྐོར་འཁྱོག་བཤད་ཀྱི་དྲིལ་བསྒྲགས་ཤུགས་ཆེ་བྱས་པ་དེར་ཨོ་སི་ཀྲོ་ལི་ཡའི་ནང་གནས་བཞུགས་བོད་མི་དང་བོད་དོན་རྒྱབ་སྐྱོར་བ་བརྒྱ་འཁོར་གཅིག་ལྷག་གིས་གྲོང་ཁྱེར་སིཌི་ནིར་ཡོད་པའི་རྒྱ་ནག་གཞུང་ཚབ་མདུན་ངོ་རྒོལ་སྐད་འབོད་ཤུགས་ཆེ་གནང་འདུག

སྐབས་དེར་བསྟན་པ་འབྲུག་གྲགས་ལགས་ཀྱིས་ཁོང་རང་གི་ཆབ་ཆེན་གྱིས་ཁེངས་པའི་ལྷམ་ཞིག་རྒྱ་ནག་གཞུང་ཚབ་ཀྱི་སྒོ་རའི་ནང་གཡུགས་འདུག ཁོང་གིས་དེ་ནི་ང་ཚོའི་ངོས་ནས་རྒྱ་ནག་གཞུང་ལ་སྤྲོད་རྒྱུའི་བརྡ་ལན་མཚོན་གྱི་ཡོད་སྐོར་དང་རྒྱ་ནག་དམར་ཤོག་ཚོགས་པས་ང་ཚོར་བརྡ་སྤྲད་པ་དེར་ང་ཚོའི་ངོས་ནས་ཆབ་ཆེན་སྐྱག་པ་ཞེས་པའི་བརྡ་ལན་སྤྲོད་འདོད་ཡོད་ལ་ཉེ་དུས་རྒྱ་ནག་གཞུང་གིས་བོད་ཀྱི་ཞིང་བྲན་ཁྲི་ཚོ་བརྒྱར་བཅིངས་བཀྲོལ་ཐོབ་པའི་དུས་ཆེན་གསར་བཟོ་བྱས་པ་དེ་ནི་བོད་མི་མང་ལ་དམའ་འབེབས་དང་འཁྲུག་རྐྱེན་སློང་གཞི་ཞིག་ཡིན་པའི་འགྲེལ་བརྗོད་ཀྱང་གནང་ཡོད་པའི་གནས་ཚུལ་འདུག།