བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཞོན་སྒྲོལ་མ་ཚེ་རིང་ལགས་ནས་རྒྱ་གར་རྒྱལ་ས་ལྡི་ལིར་རྟེན་གཞི་བྱས་པའི་ཨ་རིའི་གཞུང་ཚབ་ཀྱི་སྐུ་ཚབ་ཚོགས་ཆུང་དང་ལྷན་ད་ལྟའི་བོད་ནང་གི་ཛ་དྲག་གནས་སྟངས་སྐོར་བཀའ་བསྡུར་ལྷུགས་པོ་གནང་ཡོད་པ།

ཕྱི་ལོ་ ༢༠༢༤ ཟླ་ ༡༠ ཚེས་ ༨ ཉིན་གྱི་སྔ་དྲོ་རྒྱ་གར་རྒྱལ་ས་ལྡི་ལིར་རྟེན་གཞི་བྱས་པའི་ཨ་རིའི་གཞུང་ཚབ་ཁང་གི་ལས་བྱེད་སྐུ་ཞབས་ཇེམ་སི་པ་ལས་མན་ (James Plasman) ལགས་དང་། མེཀ་ཁེ་རེ་མར་ (Mike Cramer) ལགས། ཨཇེ་དྷ་ཡལ་ (Ajay Dayal) ལགས་བཅས་ལས་གྲུབ་པའི་ཨ་རིའི་གཞུང་ཚབ་ཁང་གི་སྐུ་ཚབ་ཚོགས་ཆུང་ཞིག་བོད་མི་མང་སྤྱི་འཐུས་ལྷན་ཁང་དུ་ཕེབས་པ་དང་། སྐབས་དེར་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཞོན་སྒྲོལ་མ་ཚེ་རིང་ལགས་ནས། ཨ་རིའི་གཞུང་དང་གྲོས་ཚོགས་དེ་བཞིན་མང་ཚོགས་བཅས་ནས་བོད་ཀྱི་བདེན་པའི་འཐབ་རྩོད་ཐད་རྒྱབ་སྐྱོར་དང་མཐུན་འགྱུར་ཟམ་མི་ཆད་པ་གནང་བར་བཀའ་དྲིན་ཆེ་ཞེས་ཞུས་ཡོད་པ་དང་། རྒྱ་ནག་གཅིག་གི་སྲིད་བྱུས་དེར་ལོ་རྒྱུས་ཀྱི་གསལ་ཁ་ཞན་པའི་རྐྱེན་གྱིས་བོད་ལ་ནམ་ཡང་འཇུག་ཐབས་མེད་པ་དང་བདེན་པ་དག་སྐྱེལ་འཕེར་བ་ཞིག་གང་ཡང་མེད་ཅེས་གསུངས་པ་དང་སྦྲགས། རྒྱལ་སྤྱིའི་སྤྱི་ཚོགས་ནས་རྒྱ་ནག་གི་འཁྱོག་བཤད་དེ་དག་གི་འོག་མི་ཚུད་པ་གནང་དགོས་གལ་ཆེ་བ་རེད་ཅེས་གསུངས་འདུག

མ་ཟད་ཚོགས་གཞོན་སྒྲོལ་མ་ཚེ་རིང་ལགས་ནས། རྒྱ་ནག་གཞུང་གིས་བོད་ནང་མི་རིགས་རྒྱ་སྒྱུར་དང་མི་རིགས་རྩ་མེད་ཀྱི་སྲིད་བྱུས་འོག བོད་ཀྱི་ཆོས་དང་སྐད་ཡིག་ལ་དམ་དྲག་གིས་བོད་པའི་ཕྲུག་གུ་རྣམས་རྒྱ་ནག་གཞུང་གིས་ཆེད་བཙུགས་བྱས་པའི་གཏན་འཇགས་སློབ་གྲྭར་བཙན་གྱིས་བཏང་བ་དང་། བོད་དང་རྒྱ་ཧན་མི་རིགས་དབར་བཙན་གྱིས་གཉེན་སྒྲིག་བྱེད་བཅུག་པ་སོགས་ཀྱི་ཛ་དྲག་གནས་ཚུལ་ཁག་གཅིག་ངོ་སྤྲོད་གནང་བ་དང་། ལྷག་པར་བོད་ཀྱི་ཁོར་ཡུག་དང་གཙང་པོ་རྣམས་ནི་ཨེ་ཤི་ཡ་ཙམ་མ་ཟད་གོ་ལ་སྤྱི་ཡོངས་ཀྱི་གནམ་གཤིས་འགྱུར་ལྡོག་དང་ཐད་ཀར་འབྲེལ་བ་ཆགས་ཀྱི་ཡོད་སྐོར་སོགས་བོད་མཐོ་སྒང་ཁོར་ཡུག་གི་གལ་གནད་ཞིབ་རྒྱས་འགྲེལ་བརྗོད་གནང་ཡོད་པ་རེད་འདུག

གཞན་ཡང་ཚོགས་གཞོན་སྒྲོལ་མ་ཚེ་རིང་ལགས་ནས་ཨ་རིའི་གཞུང་ཚབ་ཁང་གི་སྐུ་ཚབ་ཚོགས་ཆུང་དང་ལྷན་བོད་ཀྱི་མང་གཙོའི་འཕེལ་རིམ་དང་འབྲེལ་བོད་མི་མང་སྤྱི་འཐུས་ལྷན་ཚོགས་ཀྱི་བྱུང་རིམ་དང་གྲུབ་ཆ་སོགས་ཀྱི་སྐོར་ལ་བཀའ་བསྡུར་ལྷུག་པོ་གནང་ཡོད་པ་རེད་འདུག

གསར་འགོད་པ། བདེ་སྐྱིད་ཀུན་སྒྲོལ།

དྲྭ་ཐོག་སྤེལ་མཁན། བདེ་སྐྱིད་ཀུན་སྒྲོལ།