རྒྱ་ནག་གིས་བོད་ལ་ཡར་རྒྱས་འཛུགས་བསྐྲུན་སྐོར་དྲིལ་བསྒྲགས།

རྒྱ་ནག་གིས་བོད་རིཊ་སྐུ་ཚབ་ཁག་གཅིག་ཨ་རིར་བཏང་ནས་བོད་ནང་འཛུགས་བསྐྲུན་དང་། ཡར་རྒྱས་ཡོད་ལུགས་དྲིལ་བསྒྲགས་བྱེད་བཞིན་པ་རེད།
དེ་ཡང་རྒྱ་ནག་མི་མང་འཐུས་མི་ཚོགས་ཆེན་གྱི་འཐུས་མི་དང་། བོད་རང་སྐྱོང་ལྗོངས་མི་མང་འཐུས་མི་ཚོགས་ཆེན་གྱི་རྒྱུན་ལས་ཨུ་ཡོན་ལྷན་ཁང་གི་ཚོགས་གཞོན་ཤིང་རྩ་ཆོས་གྲགས་རིན་པོ་ཆེ་ཞུ་བས་སྣེ་ཁྲིད་པའི་བོད་རིགས་སྐུ་ཚབ་གསུམ་རེས་གཟའ་མིག་དམར་ཉིན་ཨ་རིའི་Californiaམངའ་སྡེའི་གྲོང་ཁྱེར་San Franciscoརུ་སྐོར་བསྐྱོད་འབྱོར་ཏེ་རྒྱ་ནག་གཞུང་ཚབ་ཁང་དུ་གསར་འགོད་ལྷན་ཚོགས་ཤིག་སྐོང་ཚོགས་བྱས་ཡོད་པ་དང་། གསར་འགོད་ལྷན་ཚོགས་དེའི་ཐོག་ཤིང་རྩ་ཆོས་གྲགས་རིན་པོ་ཆེ་ནས་ཁོང་རྣམས་ཀྱིས་སྐོར་བསྐྱོད་འདི་བརྒྱུད་བོད་ཀྱི་དངོས་ཡོད་གནས་སྟངས་ཇི་ཡིན་ཐད། འཛམ་གླིང་མང་ཚོགས་ལ་གོ་རྟོགས་ཁྱབ་སྤེལ་གྱི་དམིགས་ཡུལ་གཙོ་དོན་བཞེས་ཀྱི་ཡོད་པ་ལྟར། རྒྱ་ནག་དབུས་གཞུང་དང་། རྒྱ་ནག་ནང་གི་མི་རིགས་གཞན་ཚོས་མཐུན་འགྱུར་རོགས་རམ་ལ་བརྟེན་ནས་འདས་པའི་ལོ་ངོ་༦༠ནང་ཚུད་བོད་ཀྱི་གནས་སྟངས་ལ་འགྱུར་བ་ཤིན་ཏུ་ཆེན་པོ་ཐེབས་ཡོད་ལུགས་དང་། འཛུགས་བསྐྲུན་གྱི་ཡར་རྒྱས་ཧ་ཅང་ཆེན་པོ་བྱུང་ཡོད་ལུགས་དྲིལ་བསྒྲགས་ཀྱི་གཏམ་བཤད་སྤེལ་འདུག རྒྱ་ནག་གཞུང་གིས་བོད་ནང་ཕྱོགས་གང་ས་ནས་ཡར་རྒྱས་ཆེན་པོ་ཕྱིན་ཡོད་ལུགས་གཏམ་བཤད་དང་དྲིལ་བསྒྲགས་བསྟུད་མར་བྱེད་བཞིིན་ཡོད་རུང་ཕྱི་ཕྱོགས་ནས་གཞུང་འབྲེལ་དང་གཞུང་འབྲེལ་མ་ཡིན་པའི་ཚོགས་སྡེ་ཁག་དང་། འགྲོ་བ་མིའི་ཐོབ་ཐང་ཚོགས་པ་བཅས་ནས་རྒྱ་ནག་གཞུང་གི་བོད་ཐོག་དྲག་གནོན་དང་དམ་བསྒྲགས་ཀྱི་སྲིད་ཇུས་འོག་བོད་མིར་འགྲོ་བ་མིའི་ཐོབ་ཐང་མེད་པ་དང་། སྨྲ་བརྗོད་རང་དབང་མེད་པ། ཆོས་དད་རང་དབང་མེད་པ། ཐ་ན་འཛུགས་བསྐྲུན་གྱི་ཁེ་ཕན་ཡང་བོད་མིར་ཐོབ་ཀྱི་མེད་པའི་གནས་སྟངས་གནས་ལུགས་གསལ་འདོན་གནང་སྟེ། ༢༠༠༩ནས་བཟུང་ད་བར་བོད་མི་༡༣༨ཀྱིས་རང་ལུས་མེར་བསྲེགས་ཀྱིས་རྒྱ་ནག་གི་སྲིད་ཇུས་ལ་ངོ་རྒོལ་མཚོན་ཐབས་བྱས་ཡོད་པ་རེད།

གསར་འགོད་པ་དོན་གྲུབ་རྣམ་རྒྱལ།