༸གོང་ས་མཆོག་དབྱིན་ཡུལ་དུ་ཆིབས་བསྒྱུར་གནང་རྒྱུ།

༄༅༎དབྱིན་ཇིའི་སྲིད་བློན་ གྷོར་ཌོན་ བྷ་རའུན་ མཆོག་གིས་༸གོང་ས་མཆོག་ཕྱི་ཚེས་ ༢༣ ་ཉིན་མཇལ་འཕྲད་གནང་རྒྱུ་དང་

སྐབས་དེར་ཉེ་ཆར་བོད་ནང་བྱུང་བའི་དྲག་ཟིང་གི་གནས་ཚུལ་སྐོར་བཀའ་བསྡུར་གནང་རྒྱུ་ཡིན་པའི་སྐོར་སྲིད་བློན་མཆོག་གི་མགྲིན་ཚབ་པས་གསུངས་འདུག སྲིད་བློན་མཆོག་གི་མགྲིན་ཚབ་པས་སྲིད་བློན་གི་༸གོང་ས་མཆོག་དང་མཇལ་འཕྲད་དེ། ༸གོང་ས་མཆོག་ནི་ཆོས་ཀྱི་དབུ་ཁྲིད་ཅིག་ཡིན་པའི་ཆ་ནས་གཙོ་དོན་དང་མཇལ་འཕྲད་དེ་ཡང་སྲིད་བློན་ལས་ཁུངས་སུ་མ་ཡིན་པར་དབྱིན་ཇིའི་ཆོས་ལུགས་ཀྱི་དབུ་ཁྲིད་ ཨར་ཁ་བྷི་ཤོཔ་ ཨོཕ་ ཀེན་ཊར་བྷ་རི་ ཞེས་པའི་གཟིམ་ཤག་ཏུ་གནང་རྒྱུ་ཡིན་སྐོར་གསུངས་འདུག གསར་འགོད་པས་སྲིད་བློན་གྱི་མགྲིན་ཚབ་པར་དབུ་འཁྲིད་རྣམ་གཉིས་ཀྱི་མཇལ་འཕྲད་དེའི་སྐབས་སྲིད་དོན་གྱི་བཀའ་མོལ་གནང་རྒྱུ་ཡིན་མིན་སྐོར་འདྲི་བ་ཞུས་སྐབས། ཁོང་གིས་ད་ལྟའི་བོད་ནང་གི་གནས་སྟངས་སྐོར་བཀའ་གྲོས་གནང་རྒྱུའི་གོ་སྐབས་ཤིག་ཆགས་རྒྱུ་ཡིན་པའི་སྐོར་ལན་འདེབས་གནང་འདུག སྲིད་བློན་བྷ་རའུན་མཆོག་གི་སྔོན་མ་སྲིད་བློན་ཊོ་ནི་བྷེལེཡར་དང་སྲིད་བློན་ཇོན་མེཇོར་རྣམ་གཉིས་ཀྱིས་༸གོང་ས་མཆོག་དང་མཇལ་འཕྲད་དེ་སྲིད་བློན་ལས་ཁུངས་ཌའུང་ནིང་སྚིཊ་ཞེས་པ་དེར་གནང་ཡོད་པ་རེད།༸གོང་ས་མཆོག་ཕྱི་ཚེས་ ༢༣ ་ནས་དབུ་འཛུགས་བཞུགས་ཞག ༡༡ རིང་དབྱིན་ཡུལ་ནང་མཛད་འཕྲིན་བསྐྱང་འཆར་ཡོད་པའི་གནས་ཚུལ་ཐོན་འདུག།