ང་ལ་དགའ་པོ་ཡོད་ན་ང་བློ་བདེ་བོ་ཡོང་བ་ཞིག་བྱེད་དགོས།

༧གོང་ས་མཆོག་གིས་ཐེ་ལན་ཊའི་དགེ་འདུན་པ་ཁག་གཅིག་ལ་མཇལ་ཁ་གནང་བ། ༢༠༡༧།༦།༧།

༧གོང་ས་སྐྱབས་མགོན་ཆེན་པོ་མཆོག་གིས་བཞུགས་སྒར་དུ་གཞོན་སྐྱེས་ཚོར་ནང་ཆོས་ངོ་སྤྲོད་ཀྱི་ཉིན་མཐའ་མར་བོད་མི་གཞོན་སྐྱེས་ཚོར་ཁྱེད་རང་ཚོ་ང་ཚོའི་རེ་བ་རྒྱག་ས་དེ་ཆགས་ཡོད་ཅེས་བཀའ་སློབ་གནང་འདུག
དེ་ཡང་སྤྱི་ཚེས་༧ཉིན། ༧གོང་ས་སྐྱབས་མགོན་ཆེན་པོ་མཆོག་གིས་བོད་མི་གཞོན་སྐྱེས་རྣམས་ལ་ནང་ཆོས་ངོ་སྤྲོད་ཐེངས་བཅུ་གཅིག་པའི་ཉིན་མཐའ་མ་དེར། དམིགས་བསལ་གྱིས་བོད་མི་གཞོན་སྐྱེས་རྣམས་ལ་འཛམ་གླིང་གི་གཅེས་ནོར་དུ་འབོད་ཆོག་པའི་སངས་རྒྱས་ཀྱི་བསྟན་པ་དེ་ང་ཚོའི་མི་ཐོག་འདིའི་དུས་ད་ལྟ་བར་དུ་ཉར་ཡོད་པ་རེད། ད་ནས་ཁྱེད་རང་ཚོས་ཧུར་ཐག་བྱེད་དགོས་པ་རེད་ཅེས་དང་། ཡང་གོང་ས་མཆོག་གིས་གལ་སྲིད་ཁྱེད་རང་ཚོ་ང་ལ་དགའ་པོ་ཡོད་ན་ང་ཤི་བའི་སྐབས་ང་བློ་བདེ་བོ་ཡོང་བ་ཞིག་བྱེད་དགོས་པ་རེད་ཅེས་གསུངས་འདུག
དེ་བཞིན་གོང་ས་མཆོག་གིས་ཁྱེད་རང་ཚོ་གཞོན་སྐྱེས་ཚོ་ང་ཚོས་རེ་བ་རྒྱག་ས་དེ་ཆགས་ཡོད་པ་རེད། བོད་ནང་བོད་གངས་ཅན་ལྗོངས་ཆོལ་ཁ་གསུམ་དབྱེ་བ་མེད་པར་མི་གྲངས་ས་ཡ་དྲུག་བདུན་ཡོད་པ་དེ་དག་གིས་དཀའ་ངལ་ཆེན་པོའི་འོག་ནས་སོ་སོའི་མི་རིགས་དང་། སྐད་ཡིག་རིག་གཞུང་ལ་བདག་པོ་བརྒྱབ་ནས་བསྡད་ཡོད་དུས། ང་ཚོ་རང་དབང་ལུང་བར་ཡོད་པ་ཚོས་ཁོང་ཚོའི་རེ་བ་དེ་བསྒྲུབ་དགོས་པ་རེད་ཅེས་གསུངས་འདུག
གཞན་ཡང་སྤྱི་ཚེས་༧ཉིན་ཐེ་ལན་གྱི་དགེ་འདུན་པ་དྲུག་ཅུ་ཡིས་༧གོང་ས་སྐྱབས་མགོན་ཆེན་པོ་མཆོག་གིས་གཞོན་སྐྱེས་ཚོར་ནང་ཆོས་ངོ་སྤྲོད་ཀྱི་ཉིན་མཐའ་མའི་བཀའ་སློབ་ལ་གསན་རྗེས། ཁོང་ཚོས་ཞི་བདེའི་གོམ་བགྲོད་དེ་བཞུགས་སྒར་དྷ་རམ་ས་ལའི་ཐེག་ཆེན་ཆོས་གླིང་གཙུག་ལག་ཁང་ནས་འགོ་འཛུགས་གནང་ཡོད་འདུག
གོམ་བགྲོད་དེ་བཞིན་བཞུགས་སྒར་དུ་རྟེན་གཞི་བྱེད་པའི་Thai-Dharmshala Charity Society འམ་Thai-Dharamshala དགེ་རྩ་ཚོགས་པས་གོ་སྒྲིག་བྱས་ཡོད་ཅིང་། གོམ་བགྲོད་དེའི་ནང་མཉམ་ཞུགས་གནང་མཁན་ཐེ་དགེ་འདུན་པ་ཞིག་གིས། ད་རེས་གོམ་བགྲོད་ཀྱི་དམིགས་ཡུལ་དེ་ནི་སྙིང་རྗེ་དང་བྱམས་བརྩེ་སྤྱི་དང་། ཡང་སྒོས་རྒྱ་ཆེ་ས་ནས་འཛམ་གླིང་ཞི་བདེའི་གོང་འཕེལ་ཆེད་དུ་དམིགས་པ་ཞིག་ཡིན་པ་གསུངས་འདུག

གསར་འགོད་པ་ལྕགས་མོ་འཚོ། གུ་རུ་ཆོས་སྐྱིད།