༧གོང་ས་མཆོག་གིས་ཨོ་ས་ཀྲེ་རི་ལི་ཡར་ཆོས་འབྲེལ་དབུ་བཙུཊ།

༧གོང་ས་མཆོག་གིས་ཨོ་ས་ཀྲེ་རི་ལི་ཡའི་ནང་དཔལ་རྡོ་རྗེ་འཇིགས་བྱེད་ཀྱི་བཀའ་དབང་དང་ཆོས་འབྲེལ་དབུ་བཙུགས་གནང་ཡོད་པ་རེད།
དེ་ཡང་བོད་ཀྱི་བླ་ན་མེད་པའི་དབུ་འཁྲིད་༧སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་དེང་སྐབས་ཨོ་ས་ཀྲེ་རི་ལི་ཡའི་ནང་བཀྲིན་ཆིབས་བསྒྱུར་གྱི་མཛད་འཆར་བསྐྱོངས་གནང་མཛད་བཞིན་པ་དང་། དེ་རིང་ཚེས་༥ཉིན་གཉིས་པའི་སྐབས་ཨོ་ས་ཀྲེ་རི་ལི་ཡའི་Blue Mountainཞེས་པའི་གྲོང་ཁྱེར་ས་གནས་སུ་གོང་ས་མཆོག་གིས་དད་ལྡན་ཆོས་ཞུ་བ་རྣམས་ལ་ ཉིན་གྲངས་ལྔའི་རིང་དཔལ་རྡོ་རྗེ་འཇིགས་བྱེད་ཀྱི་བཀའ་དབང་དང་ཆོས་འབྲེལ་དབུ་བཙུགས་གནང་ཡོད་པ་དང་། འདི་གའི་གསར་འགོད་པས་ས་གནས་ནས་གནས་ཚུལ་བཏང་བ་ལྟར་ན། ༧གོང་ས་མཆོག་གིས་དཔལ་རྡོ་རྗེ་འཇིགས་བྱེད་ཀྱི་བཀའ་དབང་དེའི་ནང་དད་ལྡན་ཆོས་ཞུ་བ་ཁོ་ན་མ་གཏོགས་དོད་རྒྱལ་རྗེས་འབྲངས་པ་དང་། ཕྱི་ནང་གསར་འགོད་པ་སོགས་གསུངས་ཆོས་ར་བའི་ནང་འཛུལ་བཞུགས་ཆོག་གི་མེད་པ་རེད།
མཛད་འཆར་གཞིར་བཟུང་ལྟར་ན། ད་རེས་༧གོང་ས་སྐྱབས་མགོན་ཆེན་པོ་མཆོག་གིས་ཨོ་ས་ཀྲེ་རི་ལི་ཡའི་ནང་ཉིན་གྲངས་བཅུའི་རིང་གི་མཛད་འཆར་ཁོངས་སུ་ཕྱི་ཚེས་༨ཉིན་ཨོ་སི་ཊོ་ལི་ཡའི་Leuraས་གནས་སུ་བཟོད་པ་ཉམས་ལེན་སྐོར་བཀའ་སློབ་སྩལ་གནང་མཛད་རྒྱུ་དང་། ཕྱི་ཚེས་༡༡ཉིན་གྱི་སྔ་དྲོར་ཨོ་སི་ཀྲེ་རི་ལི་ཡའི་Brisbaneགྲོང་ཁྱེར་དུ་ཆོས་ལུགས་འདྲ་མིན་གྱི་ལྷན་ཚོགས་སུ་ལྷན་ཞུགས་མཛད་རྒྱུ་དང་། ཡང་ཕྱི་ཚེས་༡༡དང་༡༢བཅས་ཉིན་གྲངས་གཉིས་རིང་Brisbaneགྲོང་ཁྱེར་གྱི་ཚོགས་ཁང་ཆེན་མོའི་ནང་མགོན་པོ་ཀླུ་སྒྲུབ་ཀྱིས་མཛད་པའི་དབུ་མ་རིན་ཆེན་ཕྲེང་བའི་བཀའ་ཆོས་སྩལ་རྒྱུ་ཡིན་འདུག ཕྱི་ཚེས་༡༢ཉིན་Brisbaneགྱི་ Riverstageཞེས་པར་Wisdom of Compassionའམ་སྙིང་རྗེའི་ཉམས་ལེན་སྐོར་མང་ཚོགས་ལ་བཀའ་སློབ་སྩལ་རྒྱུ་དང་། ཕྱི་ཚེས་༡༤ཉིན་གྱི་ཕྱི་དྲོར་ཡུལ་དེའི་ནུབ་ཕྱོགས་Perth གྲོང་ཁྱེར་དུ་གཏོང་ལེན་སྐོར་བཀའ་སློབ་སྩལ་རྒྱུ་ཡིན་པ་གསལ་འདུག
The Sydney Morning Heraldཞེས་པའི་ཡུལ་དེའི་གསར་ཤོག་གིས་གནས་ཚུལ་བཀོད་པའི་ནང་། ཚེས་༨ཉིན་༧གོང་ས་མཆོག་གིས་Leuraས་གནས་སུ་ཆོས་འབྲེལ་སྐབས་དོལ་རྒྱལ་རྗེས་འབྲངས་པ་ཁག་གཅིག་གིས་དེ་ཁུལ་ནས་༧གོང་ས་མཆོག་ལ་ངོ་རྒོལ་གྱི་ལས་འགུལ་སྤེལ་རྒྱུ་ཡིན་ལུགས་རྒྱལ་སྤྱིའི་ཤུགས་ལྡན་ཚོགས་པ་ཞེས་པའི་མགྲིན་ཚབ་པ་Nicholas Pitts ཟེར་བས་བརྗོད་པ་བཀོད་འདུག

གསར་འགོད་པ་དོན་གྲུབ་རྣམ་རྒྱལ།

འབྲེལ་ཡོད་གནས་ཚུལ་འདི་གའི་ཆེད་མངགས་གསར་འགོད་པ་ནོར་བུ་དགྲ་འདུལ་གྱིས་ས་གནས་ནས་བཏང་བར་གསན་རོགས།

འབྲེལ་ཡོད་གནས་ཚུལ་འདི་གའི་ཆེད་མངགས་གསར་འགོད་པ་ར་ལོ་དོན་ལྡན་གྱིས་ས་གནས་ནས་བཏང་བར་གསན་རོགས།