གཞན་ལ་བརྩེ་བའི་བསམ་པ་གོང་ནས་གོང་དུ་འཕེལ་བའི་ལག་རྗེས་སུ། སོ་སོའི་སེམས་ཞི་བདེ་ཆགས་ཀྱི་ཡོད་ཅེས། ༸གོང་ས་མཆོག་གིས་བཀའ་སྩལ་བ།

བོད་མིའི་དབུ་ཁྲིད་༸གོང་ས་མཆོག་གིས་རྒྱ་གར་བྱང་ཕྱོགས་ལ་དྭགས་ཀྱི་ཞི་བའི་ཚལ་ཕོ་བྲང་དུ། སྤྱི་ཟླ་༨པའི་ཚེས་༡༤ཉིན་ལ་དྭགས་པ་དང་ཕྱི་རྒྱལ་མི་རིགས་སོགས་ལ་མཇལ་ཁ་སྩལ་ཡོད་ཅིང་། སྐབས་དེར་༸གོང་ས་མཆོག་གིས་གཞན་ལ་བརྩེ་བའི་བསམ་པ་གོང་ནས་གོང་དུ་འཕེལ་བའི་ལག་རྗེས་སུ། སོ་སོའི་སེམས་རྦད་དེ་ཞི་བདེ་ཆགས་ཐུབ་ཀྱི་ཡོད་པ་དང་། ཁོང་ཁྲོ་དང་ང་རྒྱལ་སོགས་ཀྱིས་ནམ་རྒྱུན་སེམས་དཀྲུག་ཡོང་གི་ཡོད་པས། སངས་རྒྱས་པའི་ཆོས་དེ་སློབ་སྦྱོང་ཡག་པོ་བྱས་ཏེ་བསམ་བློ་ཡག་པོ་ཞིག་བཏང་ནས་ཕྱིན་པ་ཡིན་ན། ཧ་ཅང་ཡག་པོ་ཡོད་པ་རེད་ཅེས་བཀའ་སྩལ་གནང་གི་འདུག

ཡང་མཇལ་ཁ་དེའི་བརྙན་དང་ཆབས་ཅིག་ཏུ་དགའ་ལྡན་ཕོ་བྲང་གིས་དེ་སྔའི་༸གོང་ས་མཆོག་གི་བཀའ་སློབ་ཞིག་ཀྱང་བཞག་ཡོད་པའི་ནང་། ༸གོང་ས་མཆོག་གིས་ང་ཚོའི་མི་ཚེ་མགོ་ཚུགས་པའི་ཉིན་མོ་ནས་བརྩེ་བའི་འོག་ནས་འཚོས་ཡོད་པས། ཚོར་བ་དེ་ང་ཚོའི་ཁྲག་གི་གཏིང་ལ་སླེབས་ཡོད་པ་དང་། དེ་འདྲར་བརྟེན་མི་གདུག་པ་ཅན་ཞིག་ཡིན་ནའང་། གཞན་ཞིག་གིས་བརྩེ་བ་བྱས་ན་ཁོ་ལ་ཕལ་ཆེར་ཚོར་བ་བདེ་བ་ཞིག་ཏན་ཏན་ཡོང་གི་རེད་ཅེས་བཀའ་སྩལ་ཡོད་པ་རེད

བོད་མིའི་དབུ་ཁྲིད་༸གོང་ས་སྐྱབས་མགོན་ཆེན་པོ་མཆོག་སྤྱི་ཟླ་༧པའི་ཚེས་༡༡ནས་ལ་དྭགས་སུ་ཞབས་སོར་འཁོད་དེ། ཞི་བ་ཚལ་གྱི་གསུང་ཆོས་ར་བར་ཕྱི་ནང་གི་མི་མང་ཁྲི་ཚོ་བཞི་བརྒལ་བར། སྤྱི་ཟླ་༧པའི་ཚེས་༢༣ཉིན་འཕགས་པ་ཐུགས་རྗེ་ཆེན་པོའི་བཀའ་དབང་དང་། སྤྱི་ཚེས་༢༤ཉིན་བརྟན་བཞུགས་བསྟར་འབུལ་བཅས་གནང་ཡོད་པ་མ་ཟད། སྤྱི་ཚེས་༢༦ཉིན་ས་གནས་བོད་མི་ཚོར་དམིགས་བསལ་བཀའ་སློབ་དང་སྤྱི་ཚེས་༣༡ཉིན་ཏོག་ས་གནས་སུ་གནས་གཟིགས་བཀའ་དྲིན་བསྐྱངས་པ། སྤྱི་ཟླ་༨པའི་ཚེས་༧ཉིན་ལམ་སྒྲོན་སློབ་གྲྭའི་དབྱར་ཆོས་ལ་ཆིབས་བསྒྱུར་བཀའ་ཆོས་སྩལ་པ་དང་། སྤྱི་ཟླ་༨པའི་ཚེས་༡༢ཉིན་ལ་དྭགས་ཨེ་མམ་བྷར་གྷ་ཁ་ཆེའི་ཕྱག་ཁང་དུ་ཆིབས་བསྒྱུར་ལྗགས་སྨིན་གསོལ་ཏེ་བཀའ་སློབ་བཀའ་དྲིན་ཆེ་ཡོད་པ་དང་། རིང་མིན་སྤྱི་ཟླ་༨པའི་ཚེས་༡༨ཉིན་ལ་དྭགས་དབུས་འཛིན་སྐྱོང་མངའ་ཁུལ་གཤམ་རི་ལྗོངས་ནས་གསོལ་འདེབས་ཞུས་པ་ལྟར་ཆིབས་བསྒྱུར་གྱིས། སྤྱི་ཟླ་༨པའི་ཚེས་༡༩ཉིན་གཤམ་གྱི་མཁར་རྩེའི་གསུང་ཆོས་ར་བར་དད་ལྡན་མི་མང་ལ་སྒྲོལ་དཀར་གྱི་ཚེ་དབང་སྩལ་གཏན་ཁེལ་ཡོད་པ་རེད།

གསར་འགོད་པ། བློ་བྷེ།
རྩོམ་སྒྲིག་པ། བསྟན་འཛིན་འཕགས་སྒྲོན། ཡེ་ཤེས་ཟླ་བ།
དྲྭ་ཐོག་སྤེལ་མཁན། བསྟན་འཛིན་འཕགས་སྒྲོན།