མོ་རོ་ཀོ་རྒྱལ་ཁབ་ཏུ་ས་ཡོམ་བརྒྱབས་ཏེ་རྐྱེན་ཆག་ཚབས་ཆེན་བྱུང་བར། ༸གོང་ས་མཆོག་གིས་ཐུགས་གསོའི་གསུང་འཕྲིན་སྩལ་བ།

ཨ་རབ་ཡུལ་གྱི་མོ་རོ་ཀོ་རྒྱལ་ཁབ་ཏུ་ཉེ་ལམ་སྤྱི་ཟླ་༩པའི་ཚེས་༨ཉིན། ས་ཡོམ་ཚད་རིམ་༦་༨ཅན་ཞིག་བརྒྱབས་ཏེ་མི་གྲངས་ཉིས་སྟོང་བརྒྱ་དང་ཉི་ཤུ་རྩ་གཉིས་རྐྱེན་ལམ་དུ་ཤོར་བ་མ་ཟད། ཡུལ་མི་འབུམ་ཁ་ཤས་ཀྱི་འཚོ་ཐབས་ལ་གནོད་འཚེ་ཚབས་ཆེན་ཕོག་ཡོད་པར་བརྟེན། བོད་མིའི་དབུ་ཁྲིད་༸གོང་ས་མཆོག་གིས་བཞུགས་སྒར་ཕོ་བྲང་དུ། སྤྱི་ཟླ་༩པའི་ཚེས་༡༡ཉིན་མོར་མོ་རོ་ཀོའི་སྲིད་བློན་གྱི་མཚན་ཐོག་ཏུ་ཐུགས་གསོའི་གསུང་འཕྲིན་ཞིག་ཕེབས་པའི་ནང་། ས་ཡོམ་གྱི་ཁྲོད་རྐྱེན་འདས་སུ་སོང་བའི་ནང་མི་ཚོར་གདུང་སེམས་མཉམ་བསྐྱེད་དང་། གོད་ཆག་ཕོག་པ་ཀུན་ལ་ཐུགས་སྨོན་སྐྱབས་འཇུག་གནང་གི་ཡོད་པ་མ་ཟད། མགོན་པོ་གང་ཉིད་ཀྱིས་དགའ་ལྡན་ཕོ་བྲང་ཡིག་ཚང་བརྒྱུད་ནས་ཞལ་འདེབས་གནང་རྒྱུ་ཡིན་པ་སོགས་འཁོད་ཡོད་པ། དགའ་ལྡན་ཕོ་བྲང་གི་དྲུང་ཆེ་ཆོས་སྐྱབས་པ་འཆི་མེད་རིག་འཛིན་ལགས་ནས་འགྲེལ་བརྗོད་གནང་གི་འདུག

སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་ད་དུང་གསུང་འཕྲིན་བཀའ་ཡིག་དེེར། མོ་རོ་ཀོ་གཞུང་གིས་ས་ཡོམ་བྱུང་ཡུལ་དེར་ཐབས་ཤེས་གང་དྲག་བཏོན་ནས་རོགས་སྐྱོར་དང་མྱུར་སྐྱོབ། ངལ་སེལ་གྱི་འབད་བརྩོན་བསྟེན་གང་ལེགས་བསྟེན་བཞིན་པའི་ཁར། རྒྱལ་སྤྱིའི་སྤྱི་ཚོགས་ཀྱིའང་འགན་ཡོད་གཞུང་སྒེར་ཚོགས་སྡེ་མང་པོས་ས་ཡོམ་བྱུང་འཕྲལ། རོགས་སྐྱོར་བཏང་དང་གཏོང་བཞིན་པ་ནི་ཡི་རང་གི་གནས་སུ་གྱུར་པ་འཁོད་ཡོད་ཅིང་། ༸གོང་ས་མཆོག་གིས་འགྲོ་བ་མི་གཅིག་གྱུར་གྱི་འདུ་ཤེས་ཐོག་ནས། སྔོན་མ་ཨ་ཧྥ་གྷ་ནི་སི་ཏན་དང་སེའུ་རི་ཡ། ཊིར་ཀི་སོགས་ཀྱི་ནང་དུ་འབྱུང་བའི་འཇིག་པ་བྱུང་སྐབས་ཀྱང་། བསྔོ་སྨོན་དང་ཐུགས་གསོའི་གསུང་འཕྲིན་ཕེབས་པ། ཞལ་འདེབས་རྒྱ་མི་ཆུང་བ་རེ་གནང་ལམ་ཡོད་པ་སོགས། དགའ་ལྡན་ཕོ་བྲང་གི་དྲུང་ཆེ་ཆོས་སྐྱབས་པ་འཆི་མེད་རིག་འཛིན་ལགས་ནས་འགྲེལ་བརྗོད་གནང་གི་འདུག

མོ་རོ་ཀོ་རྒྱལ་ཁབ་ནི་ཨ་ཧྥི་རི་ཀའི་བྱང་ཕྱོགས་སུ་ཆགས་པའི་ཨ་རབ་ཀྱི་མི་རིགས་དང་མི་འབོར་ས་ཡ་༣༧ལྷག་ཡོད་པ། གཙོ་ཆེར་ཁ་ཆེ་ཨི་སི་ལམ་ཆོས་ལུགས་ལ་དད་མོས་གནང་མཁན་གྱི་ཡུལ་གྲུ་ཞིག་ཡིན་པ་དང་། མོ་རོ་ཀོ་ནང་གནས་སྡོད་བོད་མི་ཞིག་གིས་གསུངས་ན། མོ་རོ་ཀོ་ནི་ཧྤ་རན་སིའི་སྐད་ཡིག་བེད་སྤྱོད་ཤུགས་ཆེ་གཏོང་མཁན་གྱི་རྒྱལ་ཁབ་ཞིག་ཡིན་པར་བརྟེན། ཡུལ་དེའི་མི་མང་པོ་ཞིག་གིས་ཧྥ་རན་སིའི་སྐད་ཡིག་གི་བརྒྱུད་ལམ་ནས་བོད་དོན་སྐོར་གོ་རྟོགས་དང་། བོད་མིའི་དབུ་ཁྲིད་༸གོང་ས་སྐྱབས་མགོན་ཆེན་པོ་མཆོག་གི་སྐོར་ཀྱང་ཤེས་རྟོགས་ཡག་པོ་ཡོད་པའི་ཡུལ་གྲུ་ཞིག་ཆགས་ཡོད་པའང་འགྲེལ་བརྗོད་གནང་གི་འདུག

གསར་འགོད་པ། བློ་བྷེ།
རྩོམ་སྒྲིག་པ། ཡེ་ཤེས་ཟླ་བ། བསྟན་འཛིན་འཕགས་སྒྲོན།
དྲྭ་ཐོག་སྤེལ་མཁན། བསྟན་འཛིན་འཕགས་སྒྲོན།