གོང་ས་མཆོག་དབུ་བཞུགས་ཀྱིས་ཉི་ཧོང་ནང་ས་ཡོམ་གནོད་འཚེའི་ཁྲོད་རྐྱེན་འདས་སུ་གྱུར་བ་ཚོའི་ཆེད་ཐུགས་སྨོན་གསོལ་འདེབས།

བོད་མིའི་བླ་ན་མེད་པའི་དབུ་ཁྲིད་༧སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་ཉི་ཧོང་གི་Kumamoto ས་གནས་སུ་ས་ཡོམ་དང་ཆུ་ལོག་སོགས་རང་བཞིན་འབྱུང་བའི་གནོད་པ་བྱུང་སྟེ་རྐྱེན་འདས་སུ་གྱུར་བ་ཚོའི་ཆེད་ཐུགས་སྨོན་གསོལ་འདེབས་གནང་འདུག        ༧གོང་ས་མཆོག་ལ་ཉི་ཧོང་བོད་རྒྱུད་ནང་བསྟན་གྱི་རྗེས་འཇུག་པ་ཚོས་་གསོལ་བ་བཏབ་པ་ལྟར་་ཉི་ཧོང་གི་ལྷོ་ཕྱོགས་Fukuoka ས་གནས་ཀྱི་Tochoji  དགོན་པའི་ནང་ས་ཡོམ་དང་། ཆུ་ལོག་གི་རང་བྱུང་གནོད་འཚེ་བྱུང་སྟེ་རྐྱེན་འདས་སུ་གྱུར་བ་ཚོའི་ཆེད་གོང་ས་མཆོག་གིས་དེར་འདུས་པའི་དགེ་འདུན་པ་ཞལ་གྲངས་ཆིག་སྟོང་བརྒྱད་བརྒྱ་ཙམ་དང་ལྷན་དུ་ཞལ་འདོན་གནང་ནས་ཐུགས་སྨོན་གསོལ་འདེབས་གནང་རྗེས་བཀའ་སློབ་བཀའ་དྲིན་བསྐྱངས་གནང་འདུག     དེ་ཡང་༧གོང་ས་མཆོག་གིས་ཕྱི་ལོ་༢༠༡༦ ལོར་ས་ཡོམ་གྱི་འཇིག་པ་དང་། དེ་ནས་ཆུ་ལོག་སོགས་རང་བཞིན་འབྱུང་བའི་གནོད་པ་བྱུང་བར་གདུང་སེམས་མཉམ་བསྐྱེད་ཡོད་པ་དང་།    ཐུགས་ཚབས་བྱུང་བ་སོགས་ཀྱི་སྐོར་བཀའ་གནང་འདུག       སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གི་ཉི་ཧོང་ནང་གི་མཛད་འཕྲིན་ཁག་ལེགས་པར་གྲུབ་སྟེ་རྒྱ་གར་ཕྱོགས་ལ་ཆིབས་ཞལ་བསྒྱུར་ཡོད་པ་དང་།   བཞུགས་སྒར་རྡ་རམ་ས་ལར་སྤྱི་ཚེས་༢༥ཉིན་ཞབས་སོར་འཁོད་རྒྱུ་ཡིན་པ་དགའ་ལྡན་ཕོ་བྲང་ཡིག་ཚང་ནས་གསུངས་འདུག

གསར་འགོད་པ་ཚེ་བརྟན་རྣམ་རྒྱལ་དང་རིག་ལྡན་སྒྲོལ་མ།