སྐུ་ཞབས་ཁ་ཊར་མཆོག་མགྱོགས་མྱུར་དྲག་སྐྱེད་ཡོང་བའི་ཐུགས་སྨོན།

སྤྱི་ཚེས་༡༢ཉིན་གནས་ཚུལ་ཐོན་པ་ལྟར་ན། ཨ་རིའི་སྲིད་འཛིན་ཟུར་པ་སྐུ་ཞབས་ཇིམ་མི་ཁ་ཊར་( Jimmy Carter )མཆོག་རེས་གཟའ་ཟླ་བའི་ཉིན་ཁོང་གི་གཟིམ་ཤག་ནས་སར་འགྱེལ་བའི་རྐྱེན་གྱིས་སྨན་ཁང་དུ་བཞུགས་དགོས་བྱུང་བར་བརྟེན། སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་དེ་མ་ཐག་སྲིད་འཛིན་ཟུར་པ་མཆོག་ལ་ཐུགས་གསོའི་གསུང་འཕྲིན་ཞིག་བསྩལ་བའི་ནང་འཁོད་དོན། སྐུ་ཉིད་ནས་མི་ཚེ་དོན་དང་ལྡན་པ་ཞིག་བསྐྱལ་ཡོད། ངོས་ཀྱིས་སྐུ་ཉིད་ནས་ལོ་མང་རིང་མི་མང་ཉམ་ཐག་རྣམས་ཀྱི་ཆེད་དུ་བློས་བཏང་གིས་ཕྱག་ལས་རླབས་ཆེན་ཧུར་ཐག་གནང་བར་རྗེས་སུ་ཡི་རངས་དང་བསྔགས་བརྗོད་ཞུ་རྒྱུ་ཡིན། སྐུ་ཉིད་ནས་ང་ཚོར་གཞན་ཕན་གྱི་ཕྱག་ལས་ཇི་ལྟར་གནང་དགོས་པའི་སྐོར་མིག་དཔེ་བཟང་པོ་བསྟན་ཡོད། སྐུ་ཉིད་མགྱོགས་མྱུར་དྲག་སྐྱེད་ཡོང་བའི་སྨོན་ལམ་དང་བཅས།ཞེས་མཚམས་འཕྲིན་བསྩལ་གནང་ཡོད་པ་རེད།

སྲིད་འཛིན་ཟུར་བ་ཇིམ་མི་ཁ་ཊར་རེས་གཟའ་ཟླ་བའི་དགོང་དྲོར་སར་འགྱེལ་ནས་དབུ་ལ་རྨ་བཟོས་པ་དང་། ད་ལྟའི་ཆར་ཨེཊ་ལེན་ཊ་(Atlanta)གྲོང་ཁྱེར་ནང་ཡོད་པའི་ཨེ་མོ་རི་(Emory)གཙུག་ལག་སློབ་གྲྭ་ཆེན་མོའི་སྨན་ཁང་དུ་སྨན་བཅོས་གནང་བཞིན་ཡོད་པ་ཁ་ཊར་ལྟེ་གནས་ཁང་གིས་འགྲེལ་བརྗོད་གནང་འདུག

སྐུ་ཞབས་ཇིམ་མི་ཁ་ཊར་མཆོག་གིས་ ༡༩༧༧ ལོ་ནས ༡༩༨༡ བར་ཨ་རིའི་སྲིད་འཛིན་གནང་ཡོད་པ་དང་། དེང་སྐབས་དགུང་ལོ་༩༥ཕེབས་ཡོད་པ་རེད།།