༧གོང་ས་མཆོག་གིས་རྒྱལ་ཡོངས་སྨོན་ལམ་ཚོཊ་བཅར་པར་བཀའ་སློབ།

འགྲོ་བ་མི་ཐེར་འབུམ་བདུན་དབར་གཅིག་གྱུར་གྱི་འདུ་ཤེས་ཞིག་འབྱུང་ཚེ་འཛམ་གླིང་ནང་འཕྲད་བཞིན་པའི་དཀའ་ངལ་མང་དག་ཅིག་སེལ་ཐུབ།
དེ་ཡང་ཁ་ས་ཕྱི་ཟླ་༢ཚེས་༤ཉིན་བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་ཚེས་༥ཉིན་གྱི་ཨ་རིའི་རྒྱལ་ཡོངས་ཞོགས་ཇའི་སྐབས་ཀྱི་སྨོན་ལམ་དུ་ཕེབས་པའི་ཚོགས་བཅར་བ་ཡོངས་ལ་ཉིན་གུང་གསོལ་ཚིགས་སྐབས་བཀའ་སློབ་གསུང་བཤད་གནང་ཡོད་པ་དང་། སྐབས་དེར་འགྲོ་བ་མི་ཐེར་འབུམ་བདུན་ཙམ་ཡོད་པ་དེ་དག་ཚང་མ་བདེ་བ་འདོད་པ་དང་སྡུག་བསྔལ་མི་འདོད་པ་གཅིག་མཚུངས་ཡིན་ཞིང་། རང་རང་སོ་སོའི་ངོས་ནས་རང་ཉིད་དང་འགྲོ་བ་མི་ཐེར་འབུམ་བདུན་དབར་གཅིག་གྱུར་གྱི་འདུ་ཤེས་ཞིག་འབྱུང་ཚེ་འཛམ་གླིང་ནང་འཕྲད་བཞིན་པའི་དཀའ་ངལ་མང་དག་ཅིག་སེལ་ཐུབ་རྒྱུ་ཡིན་པ་བཀའ་གནང་འདུག ༧གོང་ས་༧སྐྱབས་མགོན་ཆེན་པོ་མཆོག་གིས་རང་གཞན་གཉིས་ཀའི་མ་འོངས་པའི་མདུན་ལམ་ནི་ཕན་ཚུན་གཅིག་ལ་བརྟེན་ཡིན་སྟབས། གཅིག་གྱུར་བསམ་པའི་འཁྱེར་བཟོ་འདི་ནི་རང་དང་གཞན་གཉིས་ཀའི་བདེ་སྐྱིད་བསྐྲུན་རྒྱུར་མེད་དུ་མི་རུང་བ་ཞིག་ཡིན་པ་ཞིག་རེད་ཅེས་དང་། འཛམ་གླིང་གི་ཚ་དྲོད་རྒྱས་བཞིན་པའི་དཀའ་རྙོག་དང་། ཆོས་ལུགས་ཀྱི་མིང་གི་ཐོག་ནས་བྱུང་བའི་རྙོག་དྲ་སོགས་མི་བཟོད་པའི་དཀའ་ངལ་དེ་དག་སྤྱི་ཚོགས་སྤྱིའི་བསམ་བློའི་འགྲོ་ལུགས་དང་ཕན་ཚུན་མཉམ་འབྲེལ་གྱི་ཐོག་ནས་སེལ་དགོས་པ་ལས་བྱེ་ཐང་ཞིག་གི་ཐོག་གཅིག་པུར་བསྡད་སྟེ་དཀའ་ངལ་དེ་དག་སེལ་ཐུབ་ཐབས་མེད་པ་བཀའ་གནང་ཡོད་པ་རེད།
གཞན་ཡང་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་བྱམས་པ་དང་སྙིང་རྗེ། བཟོད་སྒོམ་སོགས་ནི་འཛམ་གླིང་ནང་གི་ཆོས་ལུགས་ཆེ་ཁག་ཚང་མས་ཐོུང་གི་བསླབ་བྱ་དེ་ཡིན་སྟབས། ཆོས་ལུགས་ཁག་གི་དམིགས་ཡུལ་གཙོ་བོ་ནི་བསླབ་བྱ་དེ་དག་ཉམས་སུ་བླང་བའི་ཐོག་ནས་མི་བཟང་པོ་ཞིག་བཟོ་ཐབས་དེ་རེད་ཅེས་དང་། དེར་བརྟེན་ཐོུང་གི་བསླབ་བྱ་དེ་དག་གཞི་རྩར་བཞག་པའི་ཐོག་ནས་ཆོས་ལུགས་ཕན་ཚུན་གུས་ཞབས་དང་བརྩི་བཀུར་ངེས་པར་ཞུ་དགོས་གལ་ཆེ་བ་ཡིན་པ་བཀའ་གནང་འདུག
དེ་བཞིན་༧གོང་ས་༧སྐྱབས་མགོན་ཆེན་པོ་མཆོག་ནས་འཛམ་གླིང་ནང་དབུལ་ཕྱུག་གི་ཁྱད་པར་ཇེ་ཆེར་འགྲོ་བཞིན་པའི་དཀའ་ངལ་སེལ་ཐབས་ཐད་འབད་བརྩོན་བྱེད་དགོས་པ་བཀའ་གནང་སྐབས། ཆོས་པ་ཚོས་དབུལ་པོའི་དཀའ་ངལ་སེལ་བར་ཤོག་ཅེས་ཚིག་ཙམ་གྱི་སྨོན་ལམ་འདེབས་པ་གཅིག་པུས་དཀའ་ངལ་དེ་སེལ་ཐུབ་ཐབས་མེད་སྟབས། ངེས་པར་ཕན་ཐོགས་ངེས་ཅན་གྱི་ལས་དོན་སྤེལ་དགོས་པ་བཀའ་གནང་འདུག

གསར་འགོད་པ་སྤྱི་ཁྱབ་རྩོམ་སྒྲིག་འགན་འཛིན་སྐལ་ལྡན་བློ་གྲོས།