བོད་ཀྱི་དབུ་ཁྲིད་༧གོང་ས་མཆོག་གིས་སྐུ་ཉིས་ད་དུང་ཡང་ལོ་བརྒྱ་སྐོར་ལ་འཚོ་བའི་ཐོག་ནས་སེམས་ཅན་ལ་ཕན་ཐོགས་སྒྲུབ་རྒྱུ་ཡིན་པ་གསུངས་འདུག
དེ་ཡང་འདི་ཚེས་༣་ཉིན་བོད་མིའི་བླ་ན་མེད་པའི་དབུ་ཁྲིད་༧སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ལ་རྒྱ་གར་བྱང་ཤར་ཀ་སྦུག་དང་། རྡོར་གླིང་། སྒང་ཐོག དེ་བཞིན་ར་ཝང་ལ་བཅས་སུ་གནས་སྡོད་བོད་རིགས་དང་། རྡ་སར་ཡོད་པའི་དབུས་གཙང་ཆོལ་ཁ་དང་། མདོ་སྨད་ཆོལ་ཁ། རྡ་སར་རྟེན་གཞི་བྱེད་པའི་ཆུ་སྒང་རྒྱུན་ལས་བཅས་ཀྱིས་སྒྲོལ་དཀར་ཡིད་བཞིན་འཁོར་ལོའི་སྒོ་ནས་བརྟན་ཞུགས་བསྟར་འབུལ་ཞུས་འདུག་ཅིང་། ༧གོང་ས་མཆོག་གིས། སྐུ་ཉིད་ད་དུང་ཡང་ལོ་བརྒྱ་སྐོར་ལ་འཚོ་བའི་ཐོག་ནས་བོད་མིས་མཚོན་རྒྱ་དཀར་ནག་གི་ནང་པ་གཙོ་བོར་གྱུར་པའི་སེམས་ཅན་ཚོར་ཕན་ཐོགས་སྒྲུབ་རྒྱུ་ཡིན་པ་སོགས་ཞལ་བཞེས་གནང་འདུག
འདི་ག་རླུང་འཕྲིན་ཁང་གི་གསར་འགོད་པ་བློ་བྷེ་ཡིས་གནས་ཚུལ་བཏང་བར་གཞིགས་ན། ༧གོང་ས་མཆོག་གིས་བཀའ་གནང་བར། སྟོན་པ་འཁོར་དང་བཅས་པའི་ལེགས་པར་བཤད་པ་རྨད་དུ་བྱུང་བ་དེ་དག་འཛམ་གླིང་ནང་ངོ་སྤྲོད་བྱས་ཏེ་གང་ཐུབ་ཀྱི་ཉམས་པ་སོར་ཆུད་མི་ཉམས་གོང་འཕེལ་འབྱུང་ཐབས་བྱེད་ཀྱི་ཡོད་ཅེས་དང་། མདོར་ན། བསྟན་པ་རིན་ཆེན་མཆོག་གིས་མ་ཁྱབ་པའམ། ཁྱབ་ཀྱང་ཉམས་པར་གྱུར་པའི་ཕྱོགས་དེར་ནི། སྙིང་རྗེ་ཆེན་པོས་ཡིད་རབ་བསྐྱོད་པ་ཡིས། །ཕན་བདེའི་གཏེར་དེ་གསལ་བར་བྱེད་པར་ཤོག ཅེས་བཀའ་སློབ་གནང་འདུག
༧གོང་ས་མཆོག་གིས་མུ་མཐུད་བཀའ་སློབ་ཕེབས་པར། སྙིགས་མ་ལྔ་བདོ་བའི་དུས་འདིར་བོད་སྐད་རང་གི་ཐོག་ནས་གཞི་ལམ་འབྲས་གསུམ་མཐིལ་ཕྱིན་པ་འགྲེལ་བཤད་རྒྱག་རྒྱུ་ཡོད་པ་དང་། བོད་མི་རིགས་ཀྱི་རྣམ་དཔྱོད་ངོམ་རྒྱུའི་སྐད་ཡིག་དེ་བོད་ཀྱི་མེས་པོ་རྣམས་ཀྱི་སངས་རྒྱས་ཀྱི་བསྟན་པ་སྔར་མེད་གསར་དུ་བཙུགས་ཡོད་པ་དེ་མི་ཉམས་རྒྱུན་འཛིན་བྱ་རྒྱུ་ང་ཚོའི་ལས་འགན་རེད་ཅེས་བཀའ་གནང་འདུག
༧གོང་ས་མཆོག་ལ་བརྟན་བཞུགས་བསྟར་འབུལ་གྱི་མཛད་སྒོར་བོད་རིགས་གཙོ་བོར་གྱུར་པའི་ཕྱི་རྒྱལ་ཡུལ་གྲུ་ཁག་ནས་ཕེབས་པའི་དད་ལྡན་པ་མི་གྲངས་ལྔ་སྟོང་ཙམ་འདུ་འཛོམས་བྱུང་འདུག།
གསར་འགོད་པ་ཚེ་བརྟན་རྣམ་རྒྱལ་དང་། བློ་བྷེ།
0:00 / 0:00