༧གོང་ས་མཆོག་གིས་ལ་དྭགས་ནས་ཆོས་འབྲེལ་གསུང་ཆོས་བསྩལ་གནང་མཛད་འཆར་འདུག

དེ་ཡང་བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གིས་ལ་དྭགས་ནས་འདི་ཚེས༢༨ནས་ཉིན་གྲངས་གསུམ་རིང་རིང་ཆོས་འབྲེལ་གསུང་ཆོས་སྩོལ་གནང་མཛད་རྒྱུ་ཡིན་པ་དགའ་ལྡན་ཕོ་བྲང་ཡིག་ཚང་གིས་གསལ་བསྒྲགས་གནང་འདུག
གསལ་བསྒྲགས་དེའི་ནང་། ལ་དྭགས་ནང་པའི་ཚོགས་པ་དང་དགོན་པ་ཚོགས་པ་ཐོུང་ནས་ཇི་ལྟར་གསོལ་འདེབས་ཞུས་དོན་ལྟར། ༧གོང་ས་༧སྐྱབས་མགོན་ཆེན་པོ་མཆོག་གིས་ལ་དྭགས་གླེ་ཞི་བའི་ཚལ་ཕོ་བྲང་གི་ཉེ་འདབས་གསུང་ཆོས་རྭ་བའི་ནང་། ཕྱི་ཚེས་༢༨དང་༢༩ཉིན་རྒྱལ་སྲས་ཆེན་པོ་ཞི་བ་ལྷས་མཛད་པའི་སྤྱོད་འཇུག་ཆེན་མོ་ལེའུ་དགུ་པ་ཤེས་རབ་ཀྱི་ལེའུའི་ཆོས་འབྲེལ་གསུང་ཆོས་དང་། ཕྱི་ཚེས་༣༠ཉིན་འཕགས་མཆོག་སྤྱན་རས་གཟིགས་ཀྱི་དབང་ཆེན་སྩོལ་གནང་མཛད་རྒྱུ་དང་བསྟུན། ལ་དྭགས་ནང་པའི་ཚོགས་པ་དང་དགོན་པ་ཚོགས་པ་ཐུན་མོང་ནས་༧གོང་ས་༧སྐྱབས་མགོན་ཆེན་པོ་མཆོག་ལ་བརྟན་བཞུགས་བསྟར་འབུལ་ཞུ་རྒྱུ་ཡིན་པ་བཀོད་འདུག
སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ལ་དྭགས་སུ་ཕྱི་ཟླ་༧ཚེས་༡༥ཉིན་ཞབས་སོར་འཁོད་གནང་མཛད་ཅིང་། དུས་ཡུན་ཇི་ཙམ་རིང་ལ་དྭགས་སུ་བཞུགས་བཞག་མཛད་མིན་དང་། གོང་ཞུས་གསུང་ཆོས་ལས་གཞན་པའི་མཛད་འཆར་གཞན་གང་ཡང་ད་ལྟའི་ཆར་གསལ་བསྒྲགས་གནང་མི་འདུག

གསར་འགོད་པ། སྐལ་ལྡན་བློ་གྲོས།
རྩོམ་སྒྲིག་པ། ཚེ་བརྟན་རྣམ་རྒྱལ།
དྲ་ཐོག་རྩོམ་སྒྲིག་པ། དཔལ་ལྡན་རྒྱལ།
དྲ་ཐོག་སྤེལ་མཁན། ཀླུ་འབུམ།