རྒྱ་ནག་གཞུང་གི་ལས་བྱེད་ནས་གཞུང་དངུལ་རྐུ་འཁྱེར།

༄༅༎རྒྱ་གཞུང་གི་ལས་བྱེད་པ་ཚོས་འདས་པའི་ལོ་ངོ་༣༠ནང་གཞུང་གི་དངུལ་ཨ་རིའི་གྲོ་ལར་འཐེར་འབུམ་༥༠ཙམ་མ་གནས་རྐུ་འཁྱེར་བྱས་ནས་ཕྱི་རྒྱལ་གྱི་ཡུལ་གྲུ་ཁག་ལ་བྲོས་བྱོལ་དུ་ཕྱིན་ཡོད་པ་རྒྱ་གཞུང་གི་ཁྲིམས་གཞི་ཞིབ་བཤེར་ཚན་པས་བརྗོད་ཡོད་པ་རེད་

རྒྱ་གཞུང་གི་ཁྲིམས་གཞི་ཞིབ་བཤེར་ཚན་པའི་དྲ་རྒྱའི་ནང་གནས་ཚུལ་བཏོན་པར་གཞིགས་ན་གོང་ཞུས་རྒྱ་གཞུང་གི་ལས་བྱེད་པ་དེ་ཚོས་ཕྱི་རྒྱལ་གྱི་ཁྲིམས་འགལ་ནག་ཅན་རུ་ཁག་དང་ལག་འབྲེལ་བྱས་ནས་ཁྲིམས་འགལ་ཐོག་ བཟོས་པའི་དངུལ་ཁྲིམས་མཐུན་བཟོས་པ་དང་ཁང་པ་་ཉོ་སྒྲུབ་དང་ངོ་སྤྲོད་ལག་འཁྱེར་རྫུན་བཟོ་བྱས་ཡོད་སྐོར་གནས་ཚུལ་བཏོན་ཡོད་པ་རེད་ གོང་ཞུས་རྒྱ་གཞུང་གི་ཁྲིམས་ཁང་གི་ཚན་པ་དེས་གཞུང་གི་དངུལ་རྐུ་འཁྱེར་བྱེད་མཁན་གྱི་ལས་བྱེད་པ་དེ་དག་ཡར་ཐོན་ཅན་གྱི་རྒྱལ་ཁབ་ཁག་ནང་བྲོས་བྱོལ་ཕྱིན་པའི་ཁུངས་ཨ་རི་དང་ཨོ་སི་ཀྲོ་ལི་ཡ་ཡུལ་གཉིས་ཚུད་ཀྱི་ཡོད་སྐོར་གནས་ཚུལ་བཀོད་ཡོད་པ་རེད་

གནས་ཚུལ་འདི་རིགས་མི་འབྱུང་ཆེད་རྒྱ་གཞུང་གི་ཚན་པ་ཁག་མཉམ་རུབ་ཐོག་ལས་དོན་རུ་ཁག་ཅིག་ཆེད་འཛུགས་བྱས་ཡོད་ཅིང་       ལས་དོན་རུ་ཁག་དེའི་ནང་སྤྱི་བདེ་མི་སྣ་དང་ཁྲིམས་དོན་ལས་ཁང་དང་ཕྱི་སྲིད་ལྷན་ཁང་མཉམ་རུབ་ཀྱི་རུ་ཁག་དེས་ཁྲིམས་འགལ་དེ་རིགས་མི་འབྱུང་བ་གནང་རྒྱུ་ཡིན་པ་རེད་

རྒྱ་གཞུང་གི་ཁྲིམས་གཞི་ཞིབ་བཤེར་ཚན་པས་གཞུང་གི་ལས་བྱེད་པ་༤༠༠༠གིས་ད་བར་དངུལ་ཨ་རིའི་གྲོ་ལར་འཐེར་འབུམ་༥༠ཙམ་ཞིག་ཕྱི་རྒྱལ་གྱི་ཡུལ་གྲུ་ཁག་ནང་རྐུ་འཁྱེར་བྱས་པའི་གནས་ཚུལ་བཏོན་ཡང་གོང་ཞུས་ཀྱི་གྲངས་འབོར་དེ་ཇི་འདྲ་ཆགས་ཀྱི་ཡོད་པའི་ཞིབ་ཆའི་གསལ་བཤད་གང་ཡང་གནང་མེད་པ་རེད་ དེ་བཞིན་གཞུང་གི་དངུལ་རྐུ་འཁྱེར་བྱེད་མཁན་གྱི་ལས་བྱེད་པ་དེ་དག་འཛིན་བཟུང་དང་ཡུལ་གྱི་ཁྲིམས་ཐོག་ཇི་ལྟར་ལག་ལྟར་བྱེད་རྒྱུའི་འཆར་གཞི་ཡང་ཁ་གསལ་གང་ཡང་མེད་པའི་གནས་ཚུལ་ཐོན་འདུག