༄༅༎རྒྱ་ནག་གི་སྲིད་བློན་ལྦན་ཇའི་པའོ་ཡི་བདུན་རྗེས་མའི་བལ་ཡུལ་གྱི་གཟིགས་བསྐོར་དེ་སྲུང་སྐྱོབ་ཀྱི་ཉེན་ཚབས་དང་འབྲེལ་བའི་ཐོག་དུས་ཚོད་ངེས་མེད་ཐོག་ཕྱིར་འགྱང་བྱས་པ་བལ་ཡུལ་གྱི་གྲོས་ཚོགས་ཀྱི་དཔོན་རིགས་རྣམས་ཀྱིས་གསུང་ཡོད་པ་རེད་ བལ་ཡུལ་གྱི་ཕྱི་སྲིད་བློན་ཆེན་སྐུ་ཞབས་ན་ར་ཡན་ཤེརེསི་ཐ་ཡི་སྐུ་སྒེར་དྲུང་ཆེ་ཧི་ར་ལལ་ཅའོ་རྡ་རི་ཡིས་རྒྱ་མིའི་ཕྱོགས་ནས་སྲིད་བློན་ལྦན་ཇའི་པའོ་ཡི་གཟིགས་བསྐོར་དེ་ཕྱིར་འཐེན་བྱེད་རྒྱུའི་དགོས་འདུན་བཏོན་པར་དེར་ང་ཚོའི་ངོས་ནས་ངོས་ལེན་བྱས་པ་ཡིན་ཞེས་གསུང་འདུག
བལ་ཡུལ་གྱི་དཔོན་རིགས་རྣམས་ཀྱིས་རྒྱ་ནག་གི་སྲིད་བློན་མཆོག་གི་ད་ཐེངས་ཀྱི་བལ་ཡུལ་གྱི་རྒྱལ་དོན་འཚམས་གཟིགས་དེ་ཕྱིར་འགྱང་གནང་དགོས་པའི་རྒྱུ་མཚན་འགྲེལ་བརྗོད་གནང་མེད་ཀྱང་ཁོང་ཚོས་རྒྱ་མིའི་ངོས་ནས་ཁོང་གི་སྲུང་སྐྱོབ་དང་བལ་ཡུལ་ནང་ཡོད་པའི་བོད་མི་རྣམས་ཀྱིས་ངོ་རྒོལ་གྱི་ལས་འགུལ་སྤེལ་ཡོང་སྙམ་པའི་བློ་འཚབ་ཡོད་སྐོར་གསུང་ཡོད་པ་རེད་ ཡང་བལ་ཡུལ་གྱི་དཔོན་རིགས་རྣམས་ཀྱིས་སྲིད་བློན་ལྦན་གྱི་བལ་ཡུལ་གྱི་གཟིགས་བསྐོར་གྱི་ཚེས་ཆ་དེ་རྒྱ་ནག་གཞུང་གི་གོང་བལ་ཡུལ་གཞུང་ཕྱོགས་ནས་གསལ་བསྒྲགས་གནང་བར་རྒྱ་ནག་ཁོང་ཁྲོ་ལངས་སྐོར་བལ་ཡུལ་གྱི་དཔོན་རིགས་རྣམས་ཀྱིས་གསུང་འདུག སྔོན་འཆར་ལྟར་ན་སྲིད་བློན་ལྦན་དང་བལ་ཡུལ་གྱི་སྲིད་བློན་སྦ་སྦུ་རམ་བ་ཏ་རའེ་རྣམ་གཉིས་ཀྱིས་བལ་ཡུལ་ལ་དངུལ་གྲོ་ལར་འཐེར་འབུམ་མང་པོའི་ཚོང་གི་མ་རྩ་འཛུགས་འཇོག་སྐོར་གྲོས་མོལ་དང་རྒྱ་མིའི་ངོས་ནས་བོད་ནས་བོད་མི་སྐྱབས་བཅོལ་བ་རྣམས་བལ་ཡུལ་ནང་ཡོང་རྒྱུ་དེ་མཚམས་འཇོག་ཡོང་རྒྱུའི་ཐོག་དགོས་འདུན་བཏོན་རྒྱུ་ཡིན་པ་རེད་།
