གྲངས་ཉུང་མི་རིགས་ཀྱི་སྐུ་ཚབ་དང་མཇལ་འཕྲད།

༄༅༎རྒྱ་ནག་གི་སྲིད་འཛིན་ཧུ་ཅིན་ཐའོའི་གཙོས་པས་རྒྱ་ནག་གི་ཆེས་མཐོའི་དབུ་ཁྲིད་རྣམས་ཀྱིས་རྒྱ་ནག་མི་མང་འཐུས་མི་ཚོགས་ཆེན་གྱི་ཞོར་དུ་བོད་རིགས་གཙོས་པའི་མི་རིགས་འདྲ་མིན་གྱི་སྐུ་ཚབ་རྣམས་མཇལ་འཕྲད་ཀྱིས་གྲངས་ཉུང་མི་རིགས་ཀྱིས་སྐུ་ཚབ་ཚོས་རང་འཁྲིའི་ལས་འགན་ཚུལ་བཞིན་འགྲུབ་དགོས་པ་དང་མི་མང་གི་བདེ་སྡུག་དུས་ཐོག་གཞུང་ལ་ཞུ་དགོས་པའི་ལམ་སྟོན་དང་འབོད་སྐུལ་ཞུས་གནང་འདུག
རེས་གཟའ་སྤེན་པའི་ཕྱི་དྲོ་རྒྱ་ནག་ཆེས་མཐོའི་དཔོན་རིགས་རྣམས་པེ་ཅིན་ནང་མི་མང་ཚོགས་ཁང་ཆེན་མོའི་ནང་གསོལ་ཇའི་འདུ་འཛོམས་ཐོག་དབུ་ཁྲིད་རྣམ་པ་ཚོས་གྲངས་ཉུང་མི་རིགས་ཚོའི་སྐུ་ཚབ་ཚོར་རང་འཁྲིའི་ལས་འགལ་ཚུལ་བཞིན་འགྲུབ་དགོས་པ་དང་མི་མང་གི་བདེ་སྡུག་དུས་ཐོག་གཞུང་ལ་ཞུ་དགོས་པའི་ལམ་སྟོན་དང་སྦྲགས། གྲངས་ཉུང་མི་རིགས་ས་ཁུལ་ཚོའི་ཡར་རྒྱས་ཆེད་ཆིག་སྒྲིལ་དགོས་པའི་སྐུལ་དེད་ནན་པོ་གནང་ཡོད་ལུགས་གཞུང་འབྲེལ་གསལ་བསྒྲགས་གནང་འདུག སྲིད་འཛིན་ཧུ་ཐའོ་ཡིས་སྐབས་དེ་བོད་དང་ཤར་ཏུརྐིསྟན་རང་སྐྱོང་ལྗོངས་ས་ཁུལ་གཉིས་ཀྱི་སྐུ་ཚབ་དང་ཟུར་ཐུགས་འཕྲད་ཀྱིས་མི་མང་གི་བདེ་སྡུག་ལ་ལྟ་རྟོག་ཐད་ཟབ་ནན་བྱེད་དགོས་པའི་ལམ་སྟོན་ཡང་གནང་ཡོད་འདུག།