ཨ་རིའི་གནད་ཡོད་དཔོན་རིགས་ལ་ཉེན་བརྡ།

༄༅༎༧གོང་ས་༧སྐྱབས་མགོན་ཆེན་པོ་མཆོག་ལ་ཨ་རིའི་གཞུང་གི་གནད་ཡོད་དཔོན་རེིགས་ཚོས་མཇལ་འཕྲད་ཞུས་ན་འགྲིགས་ཀྱི་མེད་ལུགས་ཉེན་བརྡ་བཏང་ཡོད་པའི་གནས་ཚུལ་ཐོན་འདུག

ད་རིང་རེས་གཟའ་ཕུར་བུའི་འཆར་ཅན་གྱི་གསར་འགོད་ལྷན་ཚོགས་ཐོག་རྒྱ་ནག་ཕྱི་སྲིད་ལས་ཁུངས་ཀྱི་མགྲིན་ཚབ་པ་ཧོང་ ལེས། ཏཱ་ལའི་བླ་མས་རྒྱལ་ཁབ་ཁ་བྲལ་གཏོང་རྒྱུའི་ལས་དོན་སྤེལ་རྒྱུར་དགག་ཆ་ཡོད་པ་ཙམ་མ་ཟད་ཕྱིའི་རྒྱལ་ཁབ་དང་ཆབ་སྲིད་མི་སྣ་ཚོས་ཏཱ་ལའི་བླ་མའི་ལས་འགུལ་སྤེལ་ཕྱོགས་ལ་རྒྱབ་སྐྱོར་བྱེད་རྒྱུ་དེར་ཡང་ངོ་རྒོལ་ཡོད། དེ་འདྲ་ཡིན་དུས་ཨ་མི་རི་ཀའི་ངོས་ནས་ཀྱང་བོད་ཀྱི་གནད་དོན་ཐོག་ལངས་ཕྱོགས་འཛིན་ཕྱོགས་ལ་དེ་སྔ་ཁས་ལེན་བྱས་པ་རྣམས་ཀྱི་ཐོག་དམ་འཛིན་བྱེད་པའི་རེ་བ་ཡོད་ལ་དེར་གཞིགས་པས་འགྲོ་དགོས་རྒྱུ་གལ་ཆེན་པོ་མཐོང་གི་ཡོད་ཅེས་གསར་འགོད་པའི་འདྲི་བར་ལན་རྒྱབ་ཡོད་པ་སོགས་རྒྱ་ནག་གཞུང་ནས་བོད་ཀྱི་གནད་དོན་ཐོག་ཕྱིའི་རྒྱལ་ཁབ་ཁག་ནས་སྲིད་བྱུས་འཛིན་སྟངས་ཐོག་སྟངས་འཛིན་བྱེད་ཀྱི་ཡོད་པའི་རྣམ་པ་གསལ་པོ་བཏོན་ཡོད་པ་རེད།

རྩ་བའི་༧གོང་ས་༧སྐྱབས་མགོན་ཆེན་པོ་མཆོག་ཕྱི་རྒྱལ་ཡུལ་གྲུ་གང་དུ་ཆིབས་བསྒྱུར་གནང་ཡང་ཐོག་མཐའ་བར་གསུམ་དུ་རྒྱ་ནག་གཞུང་ནས་འཚམས་འདྲི་གནང་ཡུལ་གྱི་ཡུལ་གྲུ་དེ་དག་གི་ཐོག་དངོས་ཤུགས་བརྒྱུད་གསུམ་ནས་གནོན་ཤུགས་སྤྲད་དང་སྤྲོད་བཞིན་ཡོད་རེད་ལ་རྒྱ་ནག་ལ་དཔལ་འབྱོར་དང་ཚོང་འབྲེལ་གྱི་གནད་དོན་ཐོག་ནས་བསྟུན་མཁས་བྱེད་དགོས་པ་ཞིག་ཀྱང་ཆགས་ཀྱི་ཡོད་པའི་དཔྱད་ཞིབ་བྱེད་ཀྱི་ཡོད་པ་རེད།